Högni Sigurðsson (Vatnsdal)

Sjá aðgreiningarsíðuna fyrir aðra sem hafa borið nafnið „Högni Sigurðsson“

---

Högni og Guðný, ásamt börnum

Vestmannaeyjar

Ein er sú í Atlants-álum

öld af öld í ramma-slag.

Byltir af sér báru-fálum,

bifast ei vð högg né lag.

Rán og Kári úr reiðiskálum

ryðja á hana nótt og dag.

Aðdáendur áttu marga,

undurfagra eyjan mín;

tigin reisn og töfrar bjarga

tignaráhrif eykur þín.

Engin sprengja örg má farga

unaðsþokka, er af þér skín.

Þegar sumarsól í heiði

sindrar gulli' á klæðin þín,

dýrðleg ert sem dögg á meiði,

djúp þín ljúfu brosin fín.

Er þá furða' að að sér seiði

okkur, mætust eyjan mín?

Öll nú eitt í einu skrifi

upp með húrra fyrir þér,

svo undirtaki í Kletti og Klifi

kveðjuhróp frá þér og mér.

Vestmannaeyjar lengi lifi,

lofaðar, sem verðugt er.

Högni Sigurðsson í Vatnsdal fæddist 23. september 1874 að Görðum í Eyjum og lést 14. maí 1961, nær 87 ára að aldri. Móðir hans var Þorgerður Gísladóttir í Skel og faðir hans Sigurður Sigurfinnsson.

Högni var hálfbróðir Einars ríka en þeir áttu sama föður. Hann ólst upp í Boston til 19 ára aldurs. Hann var allæs 8 ára gamall, sem var óvenjulegt þá. Fyrri kona Högna hét Sigríður Brynjólfsdóttir og eignuðust þau 6 börn saman. Þau hétu Sigurður (1897), Ágústa Þorgerður (1900), Hildur Ísfold (1904), Guðmundur (1908), Haukur (1912) og Elín Esther (1917). Sigríður lést árið 1921, eftir 22 ára hjónband, einungis 44 ára. Rúmu ári eftir missinn, kvæntist Högni öðru sinni. Seinni kona Högna hét Guðný Magnúsdóttir. Eignuðust þau eitt barn, Hilmi.

Högni stundaði ýmis störf á unglingsárum þar til hann hóf nám við Flensborgarskólann í Hafnarfirði. Þaðan lauk hann kennaraprófi árið 1895. Hann fluttist á Norðfjörð í framhaldinu og þar var hann með stundakennslu og bauð þeim sem vildu upp á kennslu. Einng reri hann til sjós á sumrin frá Norðfirði. Ýmislegt þurfti hann að gera til þess að framfleyta fjölskyldu sinni og þurfti hann selja úr og harmonikku til þess að redda málunum. Högni var barnakennari í Vestmannaeyjum árin 1904-1908. Barnakennslan var aðeins lítill hluti af því sem að hann tók sér fyrir hendur. Hann var í landbúskapi, útgerð og við íshúsvörslu hjá Ísfélagi Vestmannaeyja. Högni var fyrsti vélstjóri sem keyrir frystivél í Eyjum. Hann fór til Danmerkur í nám, og var það til þess að Vestmannaeyingar gátu fryst vatn og vörur. Þar áður þurfti að treysta á frosið vatn í Vilpu og Herjólfsdalstjörn, börnum til mikillar mæðu. Í íshúsinu var beita kæld og höfð tilbúin til veiða. Högni var hagmæltur og gerði mikið að því að kveða ljóð. Hann samdi um margt og verður eitt kvæði birt hér til hliðar sem hann samdi um eyjuna. Högna var mikið annt um Vestmannaeyjar og tók þátt í ýmis konar menningarstarfi. Hann var kosinn til setu í fyrstu bæjarstjórn Vestmannaeyjabæjar, en hann sat á fjórum af þeim sjö flokkum sem buðu fram til kosninganna.

Úr fórum Árna Árnasonar

Gullskreyttur sem general

Eftir Högna Sigurðsson í Vatnsdal

Stefán Árnason

Gullskreyttur sem general,

góðkunnur frá Mandal.

Er í leynum allsstaðar,

en alltaf laus við skandal.

Þegar bófar brjótast inn,

bæði á nóttu og degi,

yfirþjóninn ávallt finn

uppi á Kirkjuvegi.

Gísli Finnsson

Mikið hefir maður reynt

meðal vor á jörðu,

ekið bíl og blásið horn

og braski lent í hörðu.

Munnhörpur og mandólín

mönnum vildi selja.

Það er ekki heiglum hent

hörmung hans að telja.

Einar Sigurðsson

(Var að byggja neðanjarðaríshúsið).

Maður nokkur byggði bæ

bjargföstum á steini

og að ári aðra hæð

og undirgang í leyni.

Nú á prjónum hefir haft

húsinu að skjóta

upp á háan Heimaklett,

hárunum til bóta.

Baldur Ólafsson

(Var þá með umboð fyrir Egilsöl og Bláa borðann).

Maður nokkur býr á Borg

býsna toginleitur,

því að norskum eplum af

enginn verður feitur.

Líka reyndi Egilsöl,

ekkert bættist hagur.

Blái borðinn bestur er,

en Baldur er jafn magur.

Jóhann Gunnar Ólafsson bæjarstjóri

(þá í deilum við Gróu).

Borgarstjórans ljúfu lund

létt er mjög að særa.

Gróa hefir gert það nóg,

grimm var mjög sú skæra.

Frúin vildi ei fara burt

fyrir Kirkjuvegi.

Veslings Gunnar bað og bauð,

en bænir tjáðu eigi.

Ólafur Kristjánsson

Óli nokkur arkitekt

alveg hætti að smíða.

Það er ekki undarlegt,

þó eitthvað yrði að bíða.

Núna selur náttpotta,

netagarn og tjöru.

Það kvað þykja feikna fínt

að fást við þessa vöru.

Sigurbjörn Kárason

Kárason er kvensamur,

kætir ungar meyjar.

Vinnukonur veiðir hann

víða um þessar eyjar.

Yngismeyjar afgreiðir

með undirkjóla og sokka.

Ræl og tangó virkta vel

vinurinn kann að skokka.

Sigurður Guttormsson

Siggi Gutt er gáfaður

og gefinn fyrir móðinn,

unni funkis, þýskri þjóð,

Þorsteins kunni ljóðin.

En kapítal og krónujakt

kvað hann djúpt í fallinn.

Klárast þetta kom í ljós,

er keypt hann Thomsens hjallinn.

Leifur á Bakka

Leifur málar hænsnahús

höfðingjanna í bænum.

Fimur er í fjallgöngum.

(hér vantar ljóðlínu )

Ekur stiga út um bæ

einhver var að hlæja.

Sá hlær best sem síðast hlær,

en vi estas gæja.

Siggi Jónsson (orðtak: eins og hundarnir á hinum bæjunum).

Góðar vörur fást í Fram,

fangalína og krani.

Siggi Jóns er sagður þar

sífellt vera á spani,

sem hundarnir á hinum bæ

í hverju máli geltir,

og sannfæringin síviljug

síðasta manninn eltir.

Skynji hani hanagal.

hann fer líka að gala

eins vill Siggi í umræðum

í öllum málum tala.

Viðlag:

Það skeður enn, það skrafa menn,

það skeður alla tíma,

það skeður nær það skeður fjær,

það skeður líka í síma.

það skeður æ um sveit og sæ,

það skeður líka á fundum,

það skeður nú og skilur þú,

það skeður öllum stundum.

Jóhannes Long Jóhannesson

Strákur nokkur austan að

öllu góðu kunnur, :

umboðsmaður útsmoginn,

andans mesti brunnur.

Áður seldi Akra smjör,

öl og kaffibæti.

Gefjun hefir græjað hann

gott í kaupmanns sæti.

Kjartan Jónsson, Búastöðum

Sjóveituna situr við

sæll í öðrum heimi.

Óttalegur andafans

oft er þar á sveimi.

Kjartan unir kátur þar

í kuldahríð og gjósti,

því átján pakka af opelskro

andar sendu í pósti.

Guðmundur skósmiður Jónsson

(Var þá nýrekinn úr stjórn Kaupfélags Alþýðu.

Guðmundur er góðmenni,

glaður öllum stundum.

Alltaf sést hans blíða bros,

en best á kratafundum.

Kaupfélagi kratanna

kom hann upp með Jónum.

Núna hefir hugur hans

hallast mest að skónum.

Óskar Bjarnasen

(Vantaði alltaf í nefið)

Alltaf hljóma orðin söm

á okkar skemmtifundum,

þegar blíður Bjarnasen

byrjar ræður stundum.

Lokar augum, hóstar hátt,

hábölvað er kvefið.

Geturðu ekki, greyið mitt,

gefið mér í nefið.

Gísli rafvirki,

(kallaður Pexikon,

fékkst við loftnetauppsetningu).

Uppi á strompum allsstaðar,

einn í ströngu jobbi.

Lýður horfir hugfanginn,

heldur að þar sé Tobbi.

Karlar hafa kvartað mjög,

kjöt úr strompum týnist.

Poka hefir Pexikon

og plokkar þegar sýnist.

Myndir

• 
• 
• 
• 
• 
• 
• 
• 
• 
• 
• 
• 

---

Heimildir

• Hilmir Högnason. Munnleg heimild.