Ágústína Jónsdóttir (Ásgarði)

Ágústína (Ágústa) Jónsdóttir frá Ásgarði, húsfreyja og ráðskona Eyjum, húsfreyja í Hafnarfirði fæddist 11. mars 1906 í Framnesi í Hraunshverfi á Eyrarbakka og lést 1. nóvember 1989.
Faðir Ágústínu var Jón formaður að Gamla-Hrauni á Eyrarbakka, f. 17. september 1856, d. 8. september 1941, Guðmundsson bónda og formanns á Gamla-Hrauni 1860, f. 10. júlí 1830, d. 21. febrúar 1914, Þorkelssonar bónda í Mundakoti, f. 1802, d. 29. apríl 1880, Einarssonar „ríka“ Hannessonar, og konu Þorkels í Mundakoti, Guðrúnar húsfreyju, f. 1804, d. 8. júní 1863, Magnúsdóttur í Mundakoti Arasonar.
Móðir Jóns á Gamla-Hrauni og kona Guðmundar Þorkelssonar var Þóra húsfreyja, f. 24. október 1830, d. 4. september 1918, Símonardóttir bónda, skipasmiðs og formanns í Brautartungu í Stokkseyrarhreppi, en lengst á Gamla-Hrauni, f. 1801 í Simbakoti, d. 21. nóvember 1881, Þorkelssonar bónda, skipasmiðs og hreppstjóra á Gamla-Hrauni, Jónssonar og konu Þorkels, Valgerðar húsfreyju, f. 1765, d. 7. febrúar 1859, Aradóttur Jónssonar.
Þóra var eftirsótt til hjúskapar. Tyrfingur Snorrason formaður á Stokkseyri var einn þeirra, sem á sóttu, en missti af til Guðmundar Þorkelssonar. Tyrfingur kvæntist ekki. Hann kvað:

Eg á fljóðum fæ ei ást,

finn því hljóður trega,

því sú góða Þóra brást;

það fór slóðalega.

Móðir Þóru og kona Símonar var Sesselja húsfreyja og móðir amk. 15 barna, f. 1801, d. 1859, Jónsdóttir bónda á Ásgautsstöðum, Óseyrarnesi (Nesi), síðast á Selfossi, f. 1767, d. 8. febrúar 1856, Símonarsonar og konu Jóns Símonarsonar, Guðrúnar húsfreyju frá Kakkarhjáleigu (síðar nefnt Hoftún), f. 1769, d. 15. apríl 1837, Snorradóttur, Knútssonar.

Móðir Ágústínu og kona Jóns á Gamla-Hrauni var Ingibjörg Gíslína húsfreyja á Gamla-Hrauni, f. 1. september 1867, d. 2. apríl 1937, Jónsdóttir bónda á Miðhúsum í Sandvíkurhreppi, f. 12. apríl 1834, d. 19. júní 1872, Jónssonar bónda á Vötnum í Ölfusi, f. 1801, d. 19. febrúar 1865, Þórðarsonar, Jónssonar, og konu Þórðar, Ingveldar Guðnadóttur.
Móðir Jóns á Míðhúsum og kona Jóns á Vötnum var Sigríður húsfreyja, f. 28. maí 1806, d. 25. mars 1868, Gísladóttir bónda og hreppstjóra í Reykjakoti í Ölfusi, f. 1760, d. 27. maí 1840, Guðnasonar, og konu Gísla, Guðríðar húsfreyju, f. 1765 að Sogni í Ölfusi, d. 6. maí 1837, Jónsdóttur.
Móðir Ingibjargar Gíslínu og kona Jóns á Miðhúsum var Aðalbjörg húsfreyja, f. 31. janúar 1830 á Álftanesi, d. 15. október 1917, Eyjólfsdóttir bónda á Brekkuflöt á Álftanesi 1845, f. 29. ágúst 1800, d. 12. mars 1868, Eyjólfssonar, Jónssonar.
Móðir Aðalbjargar og kona Eyjólfs á Brekkuflöt var Ingibjörg húsfreyja, f. 5. desember 1797 á Þórustöðum í Grímsnesi, d. 22. maí 1866, Sturludóttir bónda á Þórustöðum, skírður 19. desember 1750, d. 27. ágúst 1823, Jónssonar.

Börn Jóns Guðmundssonar á Gamla-Hrauni og Ingibjargar Gíslínu Jónsdóttur húsfreyju voru:
1. Vigdís Jónsdóttir húsfreyja í Selkirk í Kanada, f. 27. júní 1885.
2. Þórður Jónsson formaður og skipasmiður á Bergi, f. 10. júní 1887, d. 1. febrúar 1939.
3. Guðmundur Jónsson formaður, skipasmiður á Háeyri, f. 14. október 1888, d. 27. nóvember 1976.
4. Guðrún Aðalbjörg Jónsdóttir húsfreyja á Tjörn á Stokkseyri, f. 22. október 1889, d. 6. október 1976.
5. Gunnar Marel Jónsson formaður og skipasmiður, f. 6. janúar 1891, d. 7. maí 1979.
6. Magnús Valdimar Jónsson skipasmiður á Bergi, f. 27. október 1892, d. 13. október 1920.
7. Ágúst Jónsson, f. 9. ágúst 1894, d. 4. desember 1905.
8. Ingiríður Dagmar Jónsdóttir húsfreyja í Reykjavík, f. 12. ágúst 1895, d. 7. maí 1986.
9. Haraldur Jónsson sjómaður á Bergi, f. 18. nóvember 1899, d. 20. febrúar 1962.
10. Guðni Jónsson prófessor, f. 22. júlí 1901, d. 4. mars 1974. Hann var kennari við unglingaskóla í Eyjum 1926-1927.
11. Sigurbjörg Jónsdóttir húsfreyja á Akureyri, f. 3. ágúst 1903, d. 1. september 1995.
12. Lúðvík Jónsson bakarameistari, síðar á Selfossi, f. 14. október 1904, d. 21. mars 1983. Hann ólst upp hjá Árna Filippussyni og Gíslínu Jónsdóttur í Ásgarði, en Gíslína var móðursystir hans.
13. Ágústína Jónsdóttir húsfreyja í Hafnarfirði, f. 11. mars 1906, d. 1. nóvember 1989. Hún ólst upp um skeið hjá Þórði á Bergi, en lengst í Ásgarði hjá Árna og Gíslínu.
14. Guðmundur Júníus Jónsson sjómaður í Eyjum, síðar skipstjóri á Akranesi, f. 29. júní 1908, d. 22. ágúst 1972.
15. Þorsteinn Páll Jónsson símavarðstjóri í Reykjavík, f. 15. ágúst 1909, d. 25. júlí 1982.
16. Jónína Helga Jónsdóttir húsfreyja í Reykjavík, f. 29. desember 1910, d. 31. janúar 1992.
17. Anna Katrín Jónsdóttir húsfreyja í Reykjavík, f. 27. apríl 1912, d. 23. maí 1999.

Móðursystur systkinanna voru:
1. Gíslína Jónsdóttir húsfreyja í Ásgarði, f. 18. apríl 1871, d. 18. júlí 1953.
2. Aðalbjörg Jónsdóttir í Miðey, húsfreyja, f. 14. september 1863, d. 2. júlí 1947.

Ágústína var með foreldrum sínum fyrstu ævárin, var hjá þeim á Gamla-Hrauni 1910.
Hún var tökubarn hjá Þórði bróður sínum og Jónínu Ástgeirsdóttur á Bergi 1911, var enn á Bergi með Þórði 1919, en hjá Gíslínu móðursystur sinni í Ásgarði 1920 og þar var Lúðvík bróðir hennar einnig í fóstri. Þau voru þar enn 1927.
Ágústína giftist Einari Guðbjartssyni loftskeytamanni í Reykjavík 1927. Hann týndist í hafi í lok júni á því ári.
Hún bjó nokkur ár með Karli Rósenkjær í Eyjum, í Sunnudal við Kirkjuveg 28 við fæðingu Árna 1932, síðar í Dagsbrún um skeið, þá á Landagötu 21 skamma stund, en við Bakkastíg við andlát Karls 1939.
Ágústína gerðist ráðskona við AKÓGES uns hún fluttist með Árna til Hafnarfjarðar 1944.
Hún giftist Skarphéðni stýrimanni 1953. Þau voru barnlaus.
Ágústína lést 1989, jarðsett undir nafninu Ágústa, en það nafn hafði hún notað áratugum saman.

Ágústína átti 3 menn.
I. Fyrsti maður hennar, (7. maí 1927), Einar Guðbjartsson loftskeytamaður frá Ísafirði, f. 19. mars 1903, drukknaði af e.s. Brúarfossi 30. júní 1927. Foreldrar hans voru Guðbjartur Jónsson beykir og smiður á Ísafirði og í Viðey, f. 16. september 1865, d. 20. nóvember 1945, og kona hans Kristín María Ásgeirsdóttir húsfreyja, f. 29. nóvember 1861, d. 25. ágúst 1942.

II. Sambýlismaður hennar var Carl Rosenkjær verslunarmaður, f. 11. apríl 1895 í Kaupmannahön, d. 16. mars 1939.
Barn þeirra var
1. Árni Karlsson Rosenkjær rafvirki í Hafnarfirði, f. 28. febrúar 1932 í Eyjum.

III. Þriðji maður Ágústínu, (16. janúar 1953), var Skarphéðinn Helgason stýrimaður frá Forsæti í V-Landeyjum, f. 24. október 1915, d. 18. febrúar 1998. Foreldrar hans voru Helgi Bjarnason bóndi og smiður, f. 12. júlí 1888, d. 30. mars 1959, og kona hans María Jónsdóttir húsfreyja frá Skeggjastöðum í V-Landeyjum, f. 21. október 1895, d. 18. júní 1972.

---

Heimildir

• Samantekt: Víglundur Þór Þorsteinsson.
• Árni Rosenkjær.
• Bergsætt II. útgáfa. Guðni Jónsson 1966.
• Íslendingabók.is.
• Manntöl.
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---