Blik 1976/Vélbátar í Vestmannaeyjum

Úr Heimaslóð, Sögusetri Vestmannaeyja
Fara í flakk Fara í leit

Efnisyfirlit Blik 1976



Vélbátar Vestmannaeyinga


Blik á í fórum sínum 50-60 myndir af vélbátum Vestmannaeyinga frá fyrstu áratugum aldarinnar. Að þessu sinni birtum við 20 myndir af bátum þessum. Flestir voru bátarnir kunnir fyrir aflasæld og formennirnir viðurkenndir dugnaðar sjómenn. Karl Guðmundsson frá Reykholti (nr.15) við Urðaveg gaf Bliki fyrir nokkrum árum skýringarnar við myndirnar og tók þann fróðleik úr bókum Bátaábyrgðarfélags Vestmannaeyja. Blik kann honum kærar þakkir fyrir þá hjálp.

ctr


V/b Svanur VE-152.


V/b Svanur, VE 152, 10 rúmlestir að stærð. Hann var smíðaður í Danmörku árið 1911. Eigendur voru Ágúst Gíslason í Valhöll o.fl. Fyrsti formaður á báti þessum var Jóhann Einarsson, Brimnesi, og svo Ólafur Ingileifsson, síðar kenndur við Heiðarbæ vestan við Strembuhæðina.


ctr


V/b Ásdís VE-144.


V/b Ásdís, VE 144. Eigandi var Gísli J. Johnsen. Báturinn var smíðaður í Danmörku árið 1912. Svo sem greint var frá í Bliki 1974, bls. 138, þá kom norskur söngkór til Vestmannaeyja árið 1924 og söng hér bæði í samkomuhúsi og undir berum himni. Svo sem sést á myndinni, þá er vélbáturinn Ásdís hlaðinn fólki. Verið er að flytja norska söngkórinn frá Bæjarbryggjunni til skips.- Húfur kórfélagana á lofti. - Eyjabúar kvaddir.


ctr


V/b Sísí VE-265.


V/b Sísí, VE-265. Bátur þessi var smíðaður í Danmörku, líklega 1914. Eigandi Gísli J. Johnsen. Fyrsti formaður á honum var Árni Finnbogason frá Norðurgarði.


ctr


V/b Ísleifur VE-63.


V/b Ísleifur, VE 63, 30 rúmlestir að stærð. Hann var smíðaður í Reykjavík árið 1916 og keyptur til Eyja 1928. Eigandi: Ársæll Sveinsson útgerðarmaður, sem var formaður á bátnum um árabil. Báturinn var tekinn út af skrá Bátaábyrgðarfélagsins árið 1967.


ctr


Sjöstjarnan VE-92.


V/b Sjöstjarnan, VE 92, 55 rúmlestir að stærð. Bátur þessi var smíðaður 1916 og var gerður út frá Akureyri fyrstu árin. Eigandi í Vestmannaeyjum var Tómas M. Guðjónsson o. fl., Höfn (nr. 1) við Bakkastíg. Fyrsti formaður á honum í Eyjum var Ásmundur Friðriksson frá Stóru-Löndum.


ctr


V/b Skúli fógeti.


V/b Skúli fógeti. Byggður í Vestmannaeyjum 1916, 11,75 rúmlestir að stærð. Tapaðist á vertíð 1938.


ctr


V/b Faxi.


V/b Faxi, sem áður hét Hilmir, VE 282, 38 rúmlestir að stærð. Bátur þessi var smíðaður í Danmörku árið 1917 og keyptur til Vestmannaeyja 1929. Eigendur: Gunnar Ólafsson o. fl. Fyrsti formaður á bátnum í Eyjum var Runólfur Sigfússon. Þegar þetta er skráð, er eigandi bátsins Haukur útgerðarmaður og skipsjóri Jóhannson.


ctr


V/b Halkion VE-27.


V/b Halkion, VE 27. Þessi bátur hét áður Kári og var smíðaður í Danmörku 1917, 35 smálestir að stærð. Fyrsti eigandi í Eyjum var Sigurður útgerðarmaður og formaður Bjarnason í Svanhól (nr. 24) við Austurveg.


ctr


V/b Ingólfur Arnarson VE-187.


V/b Ingólfur Arnarson, VE 187, 11 rúmlestir. Hann var smíðaður í Vestmannaeyjum árið 1917. Það gjörði Guðmundur Jónsson á Háeyri. Eigendur þá: Bjarni Einarsson útgerðarmaður í Hlaðbæ o. fl. formaður var fyrstu árin Sveinn Jónsson á Landamótum (nr.3 A) við Vesturveg.


ctr


V/b Halkion VE-205.


V/b Halkion, VE 205, 14 rúmlestir. Hann var smíðaður á Stokkseyri árið 1917. Eigandi bátsins var Stefán Guðlaugsson í Gerði o. fl. Stefán Guðlaugsson var formaður á bátnum alls 23 vetrarvertíðir.


ctr


V/b Hansína VE-200.


V/b Hansína, VE 200, 12 smálestir að stærð. Báturinn var smíðaður í Vestmannaeyjum árið 1917. Bátasmíðameistarinn var Ástgeir Guðmundsson í Litlabæ. Eigandi var Magnús bóndi Guðmundsson á Vesturhúsum o. fl. Hann var formaður á bátnum.


ctr


V/b Emma VE-219.


V/b Emma, VE 219, 16 smálestir að stærð. Báturinn var smíðaður á Ísafirði árið 1919. Fyrsti eigandi var Jóhann Reyndal. Þá var formaður á bátnum Guðmundur Kristjánsson. Síðar eignaðist Eiríkur Ásbjörnsson o. fl. þennan bát, og var Eiríkur sjálfur formaður á honum um árabil. Þá var Björn Bjarnason í Bólstaðarhlíð (nr. 39) við Heimagötu vélstjóri á bátnum og meðeigandi. Síðast var formaður á báti þessum Eyjólfur Gíslason frá Bessastöðum í Eyjum.


ctr


V/b Kap VE-272.


V/b Kap, VE 272, 27 smálestir að stærð. Bátur þessi var smíðaður í Noregi árið 1919, en var keyptur til Vestmannaeyja 1925. Eigandi: Jón útgerðarmaður Jónsson í Hlíð (nr. 4) við Skólaveg. Fyrsti formaður á bátnum var Runólfur Sigfússon. Báturinn var tekinn af skipaskrá árið 1967.


ctr


V/b Kópur VE-212.


V/b Kópur, VE 212. Hann var smíðaður í Vestmannaeyjum árið 1919. Eigendur bátsins voru Georg Gíslason o. fl. Fyrsti formaður á bátnum var Valdimar Ástgeirsson frá Litlabæ.


ctr


V/b Friðþjófur VE- 98.


V/b Friðþjófur, VE 98, 14 smálestir að stærð. Hann var smíðaður í Færeyjum árið 1921. Eigendur voru Friðrik Svipmundsson, síðar Andrés Einarsson, Baldurshaga, og svo Ásmundur Friðriksson, sonur Friðriks Svipmundssonar og konu hans, frú Elínar Þorsteinsdóttur.


ctr


V/b Auður VE-3.


V/b Auður, VE 3, 15 rúmlestir að stærð. Bát þennan smíðaði Gunnar Marel Jónsson, bátasmiður í Vestmannaeyjum, árið 1925. Eigendur voru þá Ágúst Jónsson í Varmahlíð (nr. 21) við Miðstræti (áður nr. 18 við Vesturveg) o.fl. Formaður á bátnum var Ágúst Jónsson.


ctr


V/b Gullveig VE-331.


V/b Gullveig, VE 331, 39 rúmlestir að stærð. Bátur þessi var smíðaður árið 1926 og keyptur til Vestmannaeyja 1940. Eigandi: Sæmundur Jónsson frá Jómsborg og fyrsti formaður var Óskar Þorsteinsson, síðar bóksali í Vestmannaeyjum.


ctr


Freyja VE-260.


V/b Freyja (Gamla Freyja), VE 260, 24 smálestir að stærð. Þessi bátur var keyptur frá Noregi árið 1928. Eigendur voru Jón kaupfélagsstjóri Hinriksson o. fl. Fyrsti formaður á bátnum var Hannes Hansson, Hvoli.


ctr


V/b Lagarfoss VE-292.


V/b Lagarfoss, VE 292, 21 rúmlest að stærð. Hann var smíðaður í Danmörku árið 1929. Eigendur voru: Tómas M. Guðjónsson o.fl. Fyrsti formaður á bátnum var Ólafur Ísleifsson, Miðgarði (nr. 13A) við Vestmannabraut. Bátur þessi var notaður í Eyjum til ársins 1967, en þá hafði hann verið stækkaður (1942) og efldur að traustleika.


ctr


V/b Veiga VE-291.


V/b Veiga, VE 291, 24 rúmlestir að stærð. Bátur þessi var smíðaður í Noregi 1930. Eigandi var Ólafur Auðunsson, útgerðarmaður í Þinghól (nr.19) við Kirkjuveg. Fyrsti formaður á bátnum var Finnbogi Finnbogason frá Norðurgarði.


ctr


V/b Baldur VE-24.


V/b Baldur, VE 24, 55 rúmlestir að stærð. Hann var smíðaður í Danmörku árið 1930, en keyptur til Vestmannaeyja árið 1939. Eigendur voru: Jónas Jónsson verzlunarmaður og Haraldur Hannesson í Fagurlyst, sem var formaður á bátnum.