Þúfutittlingur
| Sjófuglar |
|---|
| Vaðfuglar |
| Mávar, kjóar, þernur |
| Andfuglar |
| Spörfuglar |
| Annað |
| Útdauðir fuglar |
Þúfutittlingur Anthusn pratensis
Þúfutittlingurinn er oft betur þekktur sem Grátittlingur og er af erluætt. Hann er farfugl. Fuglinn er að mestu leiti brúngulur, mógulur eða gulgrænn að lit. Á smágerðu höfðinu, baki og niður á miðjar síður og á tiltölulega breiðum vænjunum, ofanverðum, bogadregnum til endanna er hann að jafnaði dekkstur. Á framhálsi, bringu og kvið er gult meira ráðandi og jafnvel niður í ljósgrátt. Þar ofan í koma einnig svartir, ílangir dílar, mest áberandi á kverk og frambringu. Endar vængfjaðra eru ljósgulir en stélfjaðra hvítir. Nefið er fíngert, ljóst við nefrót en dökknar þaðan fram. Fætur eru brúngulir. Þúfutittlingurinn er um 15 cm á lengd, þyngd milli 15–25 grömm og vænghafið er 22-25 cm.
Hann er algengur um land allt, kjörlendi hans hans er í þurru og blautu graslendi, en einnig í kjarrlendi og vel grónum hraunum. Eins og aðrir spörfuglar lifir hann aðallega á skordýrum og öðrum smádýrum. Einnig étur hann fræ ef því er að skipta. Hjúskapur þúfutittlingsins er iðulega einkvæni og verpir hann oftast tvisvar á sumri. Varp hefst í seinni hluta maí. Þúfutittlingurinn gerir hreiðurkörfu inni í þúfu, holu eða kjarri, byggð úr stráum og hárum. Eggin eru oftast 5-6. Þau eru hvít eða ljósgræn, þakin brúnum blettum. Útungun tekur 11-15 daga, en ungarnir verða fleygir 10-14 daga gamlir og eru svo mataðir af foreldrum í tvær vikur í viðbót. Kynþroska er náð að ári liðnu. Stofnstærð á Íslandi er talin vera 500.000–1.000.000 varppör.