Sigurgeir Jónsson (Þorlaugargerði)

Björgvin, Ólafur og Sigurgeir í hljómsveitinni Qmen7.

Sigurgeir Jónsson frá Þorlaugargerði eystra fæddist 26. júní 1942 að Eyjarhólum við Hásteinsveg.
Foreldrar hans voru Jón Guðjónsson frá Oddsstöðum, bóndi og skipasmiður í Þorlaugargerði, f. 2. ágúst 1903, d. 12. feb. 1967, og kona hans Guðrún Jóhanna Jónsdóttir frá Suðurgarði, húsfreyja, f. 17. febrúar 1906, d. 16. ágúst 1953.

Systir Sigurgeirs er
1. Ingibjörg Jónsdóttir húsfreyja í Þorlaugargerði eystra, f. 14. mars 1934.
Uppeldissystir Sigurgeirs er
2. Anna Jóhanna Oddgeirs húsfreyja í Reykjavík, f. 30. okt. 1932.

Sigurgeir flutti með foreldrum sínum og systrum að Þorlaugargerði árið 1944, þegar þau Jón og Guðrún tóku við búi þar af Rósu Eyjólfsdóttur húsfreyju, fósturmóður Jóns, en hún lést það sama ár. Þar ólst hann upp við almenn sveitastörf, skepnuhirðingu og heyskap, reytingu á fugli, rekatínslu í Klauf og Brimurð, sölvatínslu á Sölvaflánni norðan í Stórhöfða og útróðrum á áraskipum úr Klaufinni.
Þegar Guðrún Jóhanna móðir hans lést 1952, fór hann í fóstur til uppeldissystur sinnar Önnu Jóhönnu og Friðriks Ágústs Hjörleifssonar í rúmt ár, en fluttist síðan aftur upp að Þorlaugargerði þar sem Jón, faðir hans, réði ráðskonur til starfa næstu þrjú árin. Síðan tóku Ingibjörg, systir hans og Garðar Arason eiginmaður hennar við búskap í Þorlaugargerði.
Sigurgeir lauk gagnfræðaprófi frá Gagnfræðaskólanum í Vestmannaeyjum í janúar 1969 og vann þann vetur í Sjúkrasamlagi Vestmannaeyja, en réði sig á mb. Faxa VE um sumarið til síldveiða fyrir Norðurlandi. Þá um haustið fór hann á mótornámskeið Fiskifélags Íslands í Vestmannaeyjum og útskrifaðist þaðan í janúar 1960. Reri hann á vetrarvertíð það ár á Magnúsi Magnússyni VE og hélt áfram sjómennsku til haustsins 1961, er hann hélt til Reykjavíkur til náms í Kennarskóla Íslands.
Hann lauk kennaraprófi 1965, en stundaði sjómennsku á sumrin meðan á náminu stóð. Réðist kennari við Barnaskólann í Vestmannaeyjum haustið 1965 og kenndi þar til ársins 1973, þegar gaus í Vestmannaeyjum.
Þá kenndi hann börnum frá Eyjum í Hveragerði til vorsins, en kenndi síðan eitt ár við Gagnfræðaskólann í Hveragerði.
Hann var til sjós í tvö ár, en hóf aftur kennslustörf við Gagnfræðaskólann í Vestmannaeyjum 1976.
Sigurgeir var æskulýðsfulltrúi Vestmannaeyjabæjar um tveggja ára skeið, frá 1980 til 1981, en hóf þá nám í Stýrimannaskólanum í Vestmannaeyjum og lauk þaðan skipstjórnarprófi II. stigs 1984. Sama ár hóf hann kennslu við Stýrimannaskólann og kenndi þar samfleytt til ársins 2000, þegar skipstjórnarnám var lagt af í Vestmannaeyjum. Hann kenndi þó áfram um nokkurra ára skeið á skipstjórnarnámskeiðum, sem haldin voru í Eyjum.
Sigurgeir réðist kennari við Framhaldsskólann í Vestmannaeyjum og kenndi þar íslensku og stærðfræði til ársins 2009, er hann ákvað að láta af störfum vegna aldurs. Árið 1968 lauk Sigurgeir námi frá matsveinadeild Stýrimannaskólans í Vestmannaeyjum og starfaði ýmist sem matsveinn, vélstjóri eða stýrimaður á skipum Eyjaflotans í sumarfríum sínum allt til ársins 2000 er hann lét af sjómennsku.
Þau Katrín Lovísa ráku ritfanga- og gjafaverslunina Oddann við Strandveg 1989-1999.
Sigurgeir eignaðist barnið Fanneyju með Ölmu Þorvarðardóttur 1965.
Hann kvæntist Katrínu Lovísu kennara árið 1967 og eignuðust þau 4 börn.
Þau Sigurgeir hófu búskap sinn að Laugalandi, (Vestmannabraut 53 b), árið 1967, bjuggu á Vesturhúsum og Skólavegi 29 árin 1972 til 1973, en fluttu þá í nýbyggt hús sitt að Hrauntúni 20, nokkrum mánuðum áður en gaus í Eyjum.
Þau bjuggu í Hveragerði og kenndu þar 1973 til 1974, en fluttu þá aftur til Eyja, í hús sitt í Hrauntúninu.
Árið 1980 keyptu þau Boðaslóð 15 og bjuggu þar til ársins 2001, er þau reistu sér nýtt hús fyrir Ofan hraun og gáfu því nafnið Gvendarhús.

Ritstörf:
Sigurgeir gaf út sitt eigið blað á Kennaraskólaárunum og nefndi það Gaddavír, var blaðamaður á Vikunni sumarið 1965 og tók við ritstjórn Fylkis, málgagns sjálfstæðismanna í Vestmannaeyjum 1966. Hann sat síðan í ritnefnd sama blaðs til ársins 1972, réðst til starfa á Blaðið Fréttir, (síðar Eyjafréttir) í Vestmannaeyjum sem blaðamaður og prófarkalesari árið 1984 og starfar þar enn sem slíkur. Hann var ritstjóri Sjómannadagsblaðs Vestmannaeyja 1976 og aftur 1985. Hefur einnig tekið fjölda viðtala fyrir blaðið Fiskifréttir.
Eftir Sigurgeir liggja eftirtalin ritverk:
1. Félagslíf í Vestmannaeyjum. Útg. Vestmannaeyjabær 1981.
2. Vestmannaeyjar. Úr bókaflokknum Ísland í eina öld. Útg.Genealogica Islandorum. 2000.
3. Vestmannaeyjar. Í safnritinu Iceland today. Útg. Prentleikni Rvk. 2005.
4. Nýjar sögur og sagnir úr Vestmannaeyjum. Útg. Bókaútg. Hólar Rvk. 2007.
5. Viðurnefni í Vestmannaeyjum. Útg. Bókaútg. Hólar Rvk. 2008.
6. Golfklúbbur Vestmannaeyja í 70 ár. Útg. Golfklúbbur Vestm. 2008.
7. Fleiri sögur og sagnir úr Vestmannaeyjum. Útg. Bókaútg. Hólar Rvk. 2009.
8. Saga Útvegsbændafélags Vestmannaeyja 1920 – 2010. Útg. Útvegsbændafélag Vestm. 2010.
9. Íþróttafélagið Þór Vestmannaeyjum í 100 ár. Útg. Íþróttafélagið Þór. 2013.

I. Barnsmóðir Sigurgeirs er Alma Þorvarðardóttir, f. 16. nóvember 1943.
Barn þeirra er
1. Fanney Sigurgeirsdóttir bókasafnsfræðingur í Kópavogi, f. 1. mars 1965. Maður hennar er Þórir Ólafur Skúlason tölvunarfræðingur. Þau eiga 4 börn.

II. Kona Sigurgeirs, (1967), er Katrín Lovísa Magnúsdóttir húsfreyja, kennari, deildarstjóri, f. 29. mars 1944 að Ketilsstöðum í Hvammssveit í Dalasýslu.
Börn þeirra eru:
2. Jarl Sigurgeirsson stýrimaður, tónlistarkennari, skólastjóri í Vestmannaeyjum, f. 3. nóv. 1967. Kona hans er Sigurveig Steinarsdóttir matráður. Þau eiga fjögur börn.
3. Dís Sigurgeirsdóttir lögfræðingur, búsett í Brüssel, f. 2. ágúst 1970. Fyrrum sambúðarmaður Markús Guðmundsson verkfræðingur. Maður hennar er Jónas Jóhannsson lögfræðingur. Þau eiga fimm börn.
4. Hersir Sigurgeirsson stærðfræðingur, doktor í stærðfræði, kennir við við Háskóla Íslands, f. 16. janúar 1972. Kona hans er Guðný Guðmundsdóttir matvælafræðingur. Þau eiga tvö börn.
5. Dögg Lára Sigurgeirsdóttir kennari í Reykjavík, f. 15. okt. 1974. Maður hennar er Björgvin Ívar Guðbrandsson kennari. Þau eiga tvö börn.

---

Heimildir

• Samantekt: Víglundur Þór Þorsteinsson.
• Að mestu byggt á samantekt Sigurgeirs Jónssonar.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---

Myndir

• 
• 
• 
• 
• 
•