Katrín Lovísa Magnúsdóttir
Katrín Lovísa Magnúsdóttir kennari fæddist 29. mars 1944 að Ketilsstöðum í Hvammssveit í Dalasýslu.
Foreldrar hennar voru Magnús Halldórsson bóndi, f. 7. júní 1904, d. 24. nóv. 1992 og kona hans Lára Björg Ólafsdóttir húsfreyja, f. 4. mars 1903, d. 17. nóv. 1992.
Systkini Katrínar Lovísu:
1. Halldór Sverris Magnússon smiður og bifreiðarstjóri í Reykjavík, f. 27. maí 1930, d. 13. janúar 2013.
2. Ingibjörg Sverris Magnúsdóttir húsfreyja í Reykjavík, f. 9. mars 1932, d. 25. júlí 2009.
3. Ólafur Þór Magnússon verkamaður í Reykjavík, f. 26. mars 1937.
4. Steinunn Rannveig Magnúsdóttir húsfreyja í Reykjavík, f. 29. júní 1942.
Katrín Lovísa stundaði nám við Héraðsskólann á Laugarvatni 1960 til 1961 og Húsmæðraskólann á Laugarvatni 1962 til 1963.
Hún stundaði nám við lýðháskólann Hoptrup Höjskole í Danmörku 1963.
Þá lauk hún íþróttakennaraprófi frá Íþróttakennaraskóla Íslands að Laugarvatni 1965 og kennaraprófi frá undirbúningsdeild Kennaraskóla Íslands 1966.
Hún kenndi við Barnaskólann í Vestmannaeyjum 1966 til 1972, við Barnaskólann í Hveragerði á gosárunum 1973 til 1974 og síðan aftur við Barnaskólann í Vestmannaeyjum og síðar Grunnskóla Vestmannaeyja frá 1975 til 2014.
Katrín Lovísa kenndi sund í Vestmannaeyjum á árunum fyrir gos og var einnig forstöðumaður Vinnuskóla Vestmannaeyja á árunum 1975 til 1980.
Á árunum 2001 til 2002 stundaði Katrín Lovísa nám við Kennaraháskóla Íslands í sérkennslufræðum og starfaði eftir það sem deildarstjóri sérkennslu og síðar almennur deildarstjóri við Hamarsskóla í Vestmannaeyjum þar til hún lét af störfum vegna aldurs árið 2014.
Katrín Lovísa keppti í frjálsum íþróttum á yngri árum og átti um tíma nokkur héraðsmet hjá UMF Skarphéðni. Á síðasta áratug liðinnar aldar hóf hún að æfa og leika golf og hefur náð góðum árangri í þeirri íþrótt, m.a. þrívegis orðið Vestmannaeyjameistari kvenna og árið 2007 Íslandsmeistari í öldungaflokki kvenna með forgjöf. Þá hefur hún sungið í Kór Landakirkju í Vestmannaeyjum frá árinu 1985.
Þau Sigurgeir ráku ritfanga- og gjafaverslunina Oddann við Strandveg 1989-1999.
Katrín Lovísa giftist árið 1967 Sigurgeiri Jónssyni kennara rithöfundi og blaðamanni í. Þau eignuðust 4 börn.
Þau hófu sinn búskap að Laugalandi, (Vestmannabraut 53b), árið 1967, bjuggu á Vesturhúsum og Skólavegi 29 árin 1972 til 1973, en fluttu þá í nýbyggt hús sitt að Hrauntúni 20, nokkrum mánuðum áður en gaus í Eyjum.
Þau bjuggu í Hveragerði 1973 til 1974, en fluttu þá aftur til Eyja, í hús sitt í Hrauntúninu.
Árið 1980 keyptu þau Boðaslóð 15 og bjuggu þar til ársins 2001, er þau reistu sér nýtt hús fyrir Ofan hraun og gáfu því nafnið Gvendarhús.
Maður Katrínar Lovísu, (gift 1967), er Sigurgeir Jónsson frá Þorlaugargerði, kennari, sjómaður rithöfundur og blaðamaður, f. 26. júní 1942.
Börn þeirra eru:
1. Jarl Sigurgeirsson stýrimaður og tónlistarkennari í Vestmannaeyjum, f. 3. nóv. 1967. Kona hans er Sigurveig Steinarsdóttir matráður. Þau eiga fjögur börn.
2. Dís Sigurgeirsdóttir lögfræðingur, búsett í Brüssel, f. 2. ágúst 1970. Maður hennar er Jónas Jóhannsson lögfræðingur. Þau eiga fimm börn.
3. Hersir Sigurgeirsson stærðfræðingur með doktorspróf í stærðfræði, kennir við við Háskóla Íslands, f. 16. janúar 1972. Kona hans er Guðný Guðmundsdóttir matvælafræðingur. Þau eiga tvö börn.
4. Dögg Lára Sigurgeirsdóttir kennari í Reykjavík, f. 15. okt. 1974. Maður hennar Björgvin Ívar Guðbrandsson kennari. Þau eiga fjögur börn.
Dóttir Sigurgeirs fyrir hjónaband er
5. Fanney Sigurgeirsdóttir bókasafnsfræðingur í Kópavogi, f. 1. mars 1965. Maður hennar er Þórir Ólafur Skúlason tölvunarfræðingur. Þau eiga tvö börn.
Heimildir
- Samantekt: Víglundur Þór Þorsteinsson.
- Að mestu byggt á samantekt Sigurgeirs Jónssonar.
Þessi grein tilheyrir Æviskrám Eyjafólks eftir Víglund Þór Þorsteinsson.