Erling Adolf Ágústsson (rafvirki)

Erling Adólf Ágústsson.

Erling Adólf Ágústsson rafvirki, tónlistarmaður fæddist 9. ágúst 1930 í Nýhöfn og lést 8. janúar 1999 á Borgarspítalanum.
Foreldrar hans voru Ágúst Ólafur Ólafsson frá Borgargerði á Djúpavogi, vélstjóri, f. þar 14. ágúst 1899, d. 14. maí 1976, og kona hans Elínborg Jónína Björnsdóttir frá Efranesi á Skaga, Skagaf., húsfreyja, f. þar 5. október 1913, d. 10. desember 1969.

Börn Elínborgar og Ágústs:
1. Erling Adolf Ágústsson, f. 9. ágúst 1930 í Nýhöfn, (Skólavegi 23), d. 8. janúar 1999.
2. Ágústa Ágústsdóttir húsfreyja í Reykjavík, f. 23. september 1945 á Brekastíg 24. Maður hennar Gunnlaugur Viðar Guðjónsson.

Erling var með foreldrum sínum í æsku.
Hann nam rafvirkjun við Iðnskólann og hjá Lárusi Guðmundssyni frá Akri, lauk sveinsprófi 1953. Hann lærði einnig útvarpsvirkjun hjá Hauki og Eggerti.
Erling vann við viðgerðir á kæli- og heimilistækjum og við verslun. Hann stundaði mikið tónlist og tónlistarflutning, var í hljómsveitum í Eyjum. Hann söng inn á hljómplötur, söng í Eyjum með ýmsum tónlistarmönnum og lengst af með hljómsveit Guðjóns Pálssonar. Þegar lögin voru tekin upp í hljóðveri í Reykjavík, sá hljómsveit Eyþórs Þorlákssonar um undirleik. Lög eins og Maja litla, Oft er fjör í Eyjum, Við gefumst aldrei upp og Nonni (ungur enn). Flest ljóðin samdi hann sjálfur.
Þegar Haraldur Guðmundsson prentari og tónlistarmaður, kom til Eyja var stofnaður HG sextett, sem var hljómsveit og blandaður kvartett, sem í voru, auk Erlings, Hallgrímur Þórðarson, Aldís Sveinsdóttir og Jakobína Hjálmarsdóttir.
Síðar fór Erling að syngja einn með hljómsveitum í Höllinni og með HG sextett í Kaffistjörnunni í Alþýðuhúsinu.
Erling söng mikið með hljómsveit Guðjóns Pálssonar, þar sem fyrir voru Guðni Hermansen, Gísli Bryngeirsson, Siggi á Háeyri o.fl.
Einnig kom hann sér upp litlu hljóðveri og því eru margar upptökur frá blómatíma jazzins í Eyjum til í dag. Einnig hafa varðveist upptökur frá kabarettum, þar sem margir efnilegir söngvarar komu fram.
Þá kom hann sér upp hljóðupptökutækjum til að hljóðrita tónlist erlendra "sjóræningjastöðva" sem svo voru kallaðar og þessu efni útvarpaði hann síðan í Eyjum frá eigin útvarpsstöð, en það var honum bannað af einokunarástæðum Ríkisins.
Árið 1962 fluttist Erling með fjölskyldu sinni til Reykjavíkur. Þar söng hann um skeið með hljómsveit Árna Elfars á Röðli. Síðan flutti hann í Njarðvíkur. Þar setti hann á stofn eigin raftækjavinnustofu, sem hann starfrækti lengi. Hann starfaði á Keflavíkurflugvelli við ýmsar viðgerðir.
Erling opnaði síðan gæludýraverslun, sem hann rak nánast til æviloka.
Þau Ingibjörg giftu sig 1953, eignuðust þrjú börn. Þau bjuggu í kjallaranum á Brekastíg 24, byggðu snemma bakhús við það hús. Þar rak Erling verkstæði og síðar litla verslun og tilraun til útvarps. Nafnið Elding festist við húsið.
Erling Adólf lést 1999 og Ingibjörg Kristín 2021.

1. Kona Erlings Adólfs, (26. desember 1953), var Ingibjörg Kristín Gísladóttir frá Hvanneyri, húsfreyja, fiskverkakona, verslunarmaður, f. 11. apríl 1935, d. 4. janúar 2021.
Börn þeirra:
1. Gísli Erlingsson húsasmíðameistari, atvinnurekandi, f. 31. október 1953 að Brekastíg 24. Kona hans Þuríður Bernódusdóttir.
2. Ágúst Erlingsson í Kaupmannahöfn, slökkviliðsmaður, f. 4. október 1954 í Eyjum, d. 25. september 2018. Kona hans Gitte Sörensen.
3. Sigurborg Erlingsdóttir býr í Indiana í Bandaríkjunum, skrifstofumaður, f. 4. mars 1958 í Eyjum. Maður hennar Robert Violette.

---

Heimildir

• Samantekt: Víglundur Þór Þorsteinsson.
• Íslendingabók.is.
• Manntöl.
• Morgunblaðið í janúar 1999. Minning.
• Prestþjónustubækur.
• Rafvirkjatal. Ritstjóri: Þorsteinn Jónsson, Gunnar Guðmundsson og fleiri. Þjóðsaga hf. 1995.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---