Guðmundur Kristjánsson (Bjarkarlundi)

Guðmundur og Guðrún.

Guðmundur Kristjánsson verkamaður frá Grísatungu í Mýrasýslu, síðar í Bjarkarlundi, (Vallargötu 6) fæddist 14. mars 1884 og lést 22. febrúar 1964.
Faðir hans var Kristján bóndi í Grísatungu, f. 11. janúar 1842, d. 11. júní 1934, Jónsson bónda í Lækjarkoti í Borgarhreppi, f. 18. desember 1815, d. 5. nóvember 1873, Halldórssonar bónda á Litlu-Brekku í Borgarhreppi, f. 1791, d. 14. september 1870, Guðmundssonar, og konu Halldórs, Guðrúnar húsfreyju, f. í janúar 1788, á lífi 1833, Jónsdóttur.
Móðir Kristjáns í Grísatungu og kona Jóns í Lækjarkoti var Kristín húsfreyja, f. 1816, d. 10. október 1899, Guðmundsdóttir bónda á Grímsstöðum í Breiðavík á Snæfellsnesi, f. 1790, Jónssonar, og konu Guðmundar á Grímsstöðum, Karítasar húsfreyju, f. 1793, Nikulásdóttur.

Móðir Guðmundar og kona Kristjáns í Grísatungu var Sigurbjörg húsfreyja, f. 10. júlí 1850, d. 7. apríl 1908, Sigurðardóttir bónda á Ölvaldsstöðum í Borgarhreppi, f. 8. mars 1802, d. 7. desember 1859, Sigurðssonar bónda síðast á Desey í Norðurárdal, f. 1771, d. 10. mars 1839, Jónssonar, og konu Sigurðar Jónssonar, Sigríðar húsfreyju, f. um 1767, d. 13. júlí 1846 á Ölvaldsstöðum, Oddsdóttur.
Móðir Sigurbjargar í Grísatungu og kona Sigurðar bónda á Ölvaldsstöðum var Guðríður húsfreyja, f. 2. desember 1809, d. 4. mars 1891, Gísladóttir bónda í Rauðanesi í Borgarhreppi, f. 1776, d. 17. febrúar 1859, Gilssonar, og fyrri konu Gísla í Rauðanesi, Guðríðar húsfreyju, f. 1764, d. 6. september 1833, Jónsdóttur.

Kona Guðmundar Kristjánssonar var Guðrún Jónsdóttir húsfreyja, f. 6. febrúar 1882, d. 17. september 1959.
Þau gengu í hjónaband 31. júlí 1906.
Guðmundur var vinnumaður hjá foreldrum sínum í Krumshólum í Mýrasýslu, á Bóndhóli 1902. Á Bóndhóli var Guðrún Jónsdóttir vinnukona og þar kynntust þau. Hann var vinnumaður í Eskiholti þar 1905-1906, húsmaður á Eystra-Miðfelli á Hvalfjarðarströnd 1906-1907.
Guðmundur var verkamaður í Reykjavík 1907-1913, síðan bóndi í Sólheimatungukoti (Norðurkoti) í Mýrasýslu 1913-1914, húsmaður í Litla-Skarði þar 1914-1920, bóndi á Laugalandi í Stafholtstungum 1920-1929, í Bjargarsteini þar 1929-1930.
Þá fluttust þau Guðrún til Eyja. Þar var hann verkamaður, stundaði gúmmíviðgerðir í Baðhúsinu við Bárugötu, nefndur „Guðmundur gúmmílímari“.
Þau bjuggu í Langa-Hvammi, Ásnesi og á Reynifelli,
Síðast dvöldu þau hjá dóttur sinni Guðrúnu Margréti í Bjarkarlundi.

Börn Guðrúnar og Guðmundar voru:
1. Kristinn verkamaður á Skagaströnd, f. 11. ágúst 1903, d. 1. desember 1986. Kona hans var Þórunn Sigurðardóttir.
2. Guðlaugur Sigurbjörn, f. 25. júní 1907, d. 22. júlí 1908.
3. Guðrún Margrét húsfreyja á Reynifelli og í Bjarkarlundi, f. 20. júní 1909, d. 7. júlí 2000, gift Guðsteini Þorbjörnssyni sjómanni.
4. Sigurbjörg Guðmundsdóttir, f. 9. ágúst 1910, d. 20. febrúar 1911.
5. Kristján verkamaður, síðar bóndi á Skagaströnd, f. 2. desember 1911, d. 16. apríl 1979. Hann var fyrr kvæntur Guðnýju Ingibjörgu Einarsdóttur frá Siglufirði, síðar Fjólu Gísladóttur.
6. Sigrún, f. 23. janúar 1915, d. 18. ágúst 2008. Hún var fyrr gift Guðmundi Guðmundssyni málarameistara, síðar gift Þórði Ólafssyni sjómanni í Eyjum og Grindavík.
7. Jónína Lilja húsfreyja, f. 21. maí 1920, d. 14. febrúar 2004. Sambýlismaður hennar var Axel Sveinsson verkamaður, sjómaður, en síðari maður hennar var Einar Jónsson sjómaður á Kalmanstjörn.

---

Heimildir

• Samantekt: Víglundur Þór Þorsteinsson.
• Borgfirzkar æviskrár. Margir höfundar. Sögufélag Borgarfjarðar 1969-2007
• Garður.is.
• Heimaslóð.
• Íslendingabók.is.
• Manntöl.
• Reynir Guðsteinsson.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---