Sigríður Friðriksdóttir (Mosfelli)
Sigríður Friðriksdóttir húsmóðir, fiskverkakona og verkstjóri fæddist að Rauðhálsi í Mýrdal 3. júlí 1908 og lést 28. febrúar 2011, 102 ára að aldri. Hún var búsett að Hrafnistu í Reykjavík síðustu árin.
Ætt og uppruni
Foreldrar hennar voru Friðrik Vigfússon bóndi á Rauðhálsi, f. 2. apríl 1871 á Ytri-Sólheimum í Mýrdal, d. 17. nóvember 1916 á Rauðhálsi og kona hans Þórunn Sigríður Oddsdóttir húsfreyja, f. 5. júlí 1875 í Pétursey í Mýrdal, d. 23. júlí 1959 í Eyjum.
Æviferill
Sigríður missti föður sinn frá 14 börnum er hún var 8 ára. Heimilið var leyst upp. Þegar hún var 10 ára fór hún í fóstur til hjónanna á Mosfelli í Eyjum, þeirra Jennýjar Guðmundsdóttur og Jóns Guðmundssonar. Þar ólst Sigríður upp og dvaldi, þar til hún giftist 1934.
Þau Halldór Elías Halldórsson hófu búskap á Mosfelli, en þá var Jón fóstri hennar látinn. Síðan eignuðust þau húsið að Heimagötu 22 og bjuggu þar til ársins 1941, er þau byggðu húsið að Helgafellsbraut 23 og þar bjuggu þau til Goss 1973. Þá fluttust þau til Reykjavíkur og keyptu sér íbúð að Efstalandi 12. Þar bjuggu þau unz Halldór Elías lézt 1975, en hún ein eftir það til ársins 2004, er hún flutti á Hrafnistu í Reykjavík. Þar bjó hún til dauðadags 2011, og var vel ern að sögn.
Sigríður vann fiskvinnslustörf um 40 ára skeið, verkstjóri lengi. Þótti hún harðduglegur og traustur starfsmaður. Við handflökun var hún margra manna maki. Hún var ákveðin í skoðunum og þótti sérlega fylgin sér.
Maki (1934): Halldór Elías Halldórsson sjómaður, stýrimaður, f. 23. júlí 1902, d. 8. október 1975.
Barn (kjörbarn): Jón Berg skipstjóri, verkstjóri, f. 1. júlí 1935.
Börn Þórunnar og Friðriks:
1. Vigfús Friðriksson vinnumaður á Rauðhálsi, f. 13. febrúar 1897, d. 3. júní 1918 í Eyjum.
2. Sigurður Friðriksson útgerðarmaður, síðar verkstjóri, Hásteinsvegi 17, f. 22. ágúst 1898, d. 7. maí 1980, kvæntur Elísabet Hallgrímsdóttur.
3. Þorbergur Friðriksson skipstjóri, f. 10. des. 1899, fórst með b/v Sviða 2. desember 1941.
4. Þórunn Friðriksdóttir húsfreyja að Birtingarholti við Vestmannabraut 61, f. 28. apríl 1901 (V-Skaftf. 30. apríl), d. 13. júlí 1972, kona Ingvars Þórólfssonar.
5. Ragnhildur Friðriksdóttir húsfreyja að Brekastíg 3, Sólbergi, f. 5. júní 1902, d. 16. ágúst 1977, kona Guðlaugs Halldórssonar.
6. Oddsteinn Friðriksson útgerðarmaður, vélstjóri, f. 27. júní 1903, d. 21. sept 1987, kvæntur, (skildu), Þorgerði Hallgrímsdóttur, systur Elísabetar konu Sigurðar.
7. Árþóra Friðriksdóttir húsfreyja í Stykkishólmi, f. 23. desember 1904, d. 17. marz 1990.
8. Högni Friðriksson sjómaður, f. 2. júlí 1907, d. 17. júní 1929.
9. Sigríður Friðriksdóttir húsfreyja, fiskverkakona, verkstjóri, f. 3. júlí 1908, d. 28. febrúar 2011. Maður hennar Halldór Halldórsson.
10. Kristín Friðriksdóttir húsfreyja á Norður-Hvoli í Mýrdal, f. 4. maí 1910, d. 23. október 2009.
11. Ólafur Friðriksson verkamaður á Selfossi, síðast í Hveragerði, f. 29. ágúst 1911, d. 26. jan. 1984.
12. Ragnheiður Friðriksdóttir húsfreyja, f. 6. ágúst 1912, d. 12. júlí 1984, kona Haraldar Þorkelssonar.
13. Þórhallur Friðriksson bifreiðastjóri í Eyjum, síðar smiður og umsjónarmaður í Skógum u. Eyjafjöllum, en síðast búsettur á Selfossi, f. 3. nóv. 1913, d. 29. janúar 1999, kvæntur Elínu Þorsteinsdóttur.
14. Þórhalla Friðriksdóttir húsfreyja, verslunarmaður, f. 15. apríl 1915, d. 7. nóvember 1999, kona Þorvalds Guðjónssonar, (skildu), síðar kona Ásmundar Friðrikssonar. Að lokum giftist hún Brynjólfi Hallgrímssyni bróður Elísabetar og Þorgerðar. Þau bjuggu í Kópavogi.
15., 16. og 17. Þrjú börn fædd andvana.
Fóstursystkini Sigríðar á Mosfelli voru:
- Kristinn Jónsson bóndi, smiður og póstur á Mosfelli.
- Þórður Arnfinnson sjómaður á Þingeyri og í Keflavík.
- Leifur Þórðarson klæðskeranemi.
Myndir
Heimildir
- Upphaflega grein ritaði Víglundur Þór Þorsteinsson.
- Björn Magnússon: Vestur-Skaftfellingar. Reykjavík: Prentsmiðjan Leiftur, 1970-1973.
- Jón Berg Halldórsson.
- Legstaðaskrá.
- Pers.
Þessi grein tilheyrir Æviskrám Eyjafólks eftir Víglund Þór Þorsteinsson.