Adólf Sigurgeirsson

Adólf Sigurgeirsson.

Adólf Sigurgeirsson og Anna Jenný White Marteinsdóttir.

Adólf Sigurgeirsson frá Stafholti, sjómaður, járnsmiður fæddist 15. ágúst 1930 á Sæbergi, (Urðavegi 9) og lést 7. september 2023 á Heilbrigðisstofnun Suðurnesja.
Foreldrar hans voru Sigurgeir Þorleifsson verkamaður á Sæbergi, f. 12. júlí 1902, d. 24. ágúst 1950, og kona hans Júlía Gísladóttir húsfreyja, f. 16. júlí 1904, d. 19. september 1933. Fósturforeldrar hans voru Gróa Þorleifsdóttir húsfreyja í Stafholti, f. 20. október 1896, d. 10. júlí 1991, og maður hennar Gunnsteinn Eyjólfsson verkamaður, f. 14. mars 1893, d. 27. mars 1972.

Hálfsystir Sigurgeirs er
1. Júlía Sigurgeirsdóttir húsfreyja, f. 31. ágúst 1937.

Börn Gunnsteins og Gróu og fóstursystkini Adólfs voru:
1. Kristín Þóra Gunnsteinsdóttir húsfreyja í Kópavogi, f. 13. ágúst 1919 í Fagradal, d. 17. september 2011. Maður hennar var Sigurvin Magnús Magnússon framleiðslustjóri, f. 11. mars 1918, d. 8. janúar 2006.
2. Jóhann Sigurður Gunnsteinsson stöðvarstjóri, f. 4. febrúar 1925, d. 1. mars 2008. Kona hans var Margrét Anna Jónsdóttir frá Ísafirði, f. 20. júlí 1925, d. 27. september 2016.

Adólf missti móður sína, er hann var þriggja ára. Hann fór í fóstur til Gróu föðursystur sinnar í Stafholti og ólst upp hjá henni og Gunnsteini og bjó þar fram á fullorðinsár.
Hann var sjómaður í 20 ár, varð starfsmaður í Vélsmiðjunni Magna 1964, var í námi í plötu- og ketilsmíði 1969-1972, er hann lauk sveinsprófi. Hann vann síðan í Magna fram að Gosi, en fluttist til Grindavíkur þar sem hann vann í Vélsmiðju Grindavíkur, sem síðar varð Áhaldahús Grindavíkur. Þar vann hann til sjötugs.
Hann var virkur félagi í Iðnsveinafélagi Vestmannaeyja, og síðar í Iðnsveinafélagi Suðurnesja, var m.a. skoðunarmaður reikninga, gerður að heiðursfélaga þess.
Adólf og Stefanía eignuðust tvö börn, en slitu sambandi sínu 1953.
Þau Anna Jenný bjuggu saman frá 1958, fyrst á Kirkjubæjarbraut 5, en síðan byggðu þau húsið að Grænuhlíð 25, fluttu inn 1965 og bjuggu þar til Goss.
Þau giftu sig 1959 og eignuðust fjögur börn, misstu eitt þeirra, Sigurgeir Halldór, tæpra átta ára.
Þau bjuggu síðan í Grindavík.
Anna Jenný lést 2018 og Adólf 2023.

I. Barnsmóðir Adólfs var Stefanía Guðmundsdóttir verkakona frá Hábæ, síðar húsfreyja og bóndi í Hallskoti í Fljótshlíð, f. 24. maí 1932 í Mandal, d. 27. febrúar 2019.
Börn þeirra:
1. Júlía Kristín Adólfsdóttir húsfreyja, starfsmaður á sambýli fyrir fatlaða í Reykjavík, f. 24. nóvember 1952, d. 5. desember 2020.
2. Elísa Beglind Adólfsdóttir húsfreyja á Selfossi, f. 24. desember 1953 að Skólavegi 1. Hún á fjögur börn.

II. Kona Adólfs, (17. maí 1959), var Anna Jenný White Marteinsdóttir frá Björgvin, (Sjómannasundi 3), f. 31. mars 1937 í Reykjavík, d. 16. maí 2018.
Börn þeirra:
1. Sigurgeir Halldór Adólfsson, f. 24. desember 1959, d. 18. ágúst 1967.
2. Kjartan Friðrik Adólfsson bókari, f. 6. nóvember 1964. Kona hans Geirlaug Geirdal.
3. Margrét Adólfsdóttir húsfreyja, ræstingastjóri, f. 27. september 1966. Maður hennar Ingi Birgir Sverrisson, látinn.
4. Sigrún Adólfsdóttir húsfreyja, tölvutæknir í Þýskalandi, f. 13. desember 1969. Maður hennar Thomas Gausepohl.

---

Heimildir

• Samantekt: Víglundur Þór Þorsteinsson.
• Íslendingabók.is.
• Anna Jenný og Adólf.
• Manntöl.
• Morgunblaðið 20. september 2023. Minning.
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---