Sigurður Óskarsson (Hvassafelli)

Úr Heimaslóð, Sögusetri Vestmannaeyja
Fara í flakk Fara í leit

Sigurður Óskarsson frá Hvassafelli, húsasmíðameistari, kafari, eftirlitsmaður, stjórnarformaður, útgerðarmaður, kennari, tónlistarmaður fæddist 24. maí 1944.
Foreldrar hans voru Óskar Sigurðsson endurskoðandi, f. 1. júní 1910 á Bólstað, d. 4. júní 1969, og kona hans Soffía Zóphoníasdóttir frá Stórubýlu í Innri-Akraneshreppi, f. 6. desember 1919 í Gröf í Skilmannahreppi í Borg., d. 5. ágúst 1985.

Börn Soffíu og Óskars:
1. Andvana stúlka, f. 11. júní 1943.
2. Sigurður Óskarsson húsasmiður, kafari, f. 24. maí 1944 á Bólstað. Kona hans Sigurbjörg Óskarsdóttir.
3. Friðrik Ingi Óskarsson forstjóri, skrifstofumaður, f. 16. febrúar 1948 á Hvassafelli. Fyrrum kona hans Auður Dóra Haraldsóttir. Fyrrum kona hans Lilja Dóra Hjörleifsdóttir. Sambúðarkona hans Guðlaug Kristófersdóttir.
4. Kolbrún Ósk Óskarsdóttir ritari, f. 29. september 1950. Maður hennar Sigmar Þór Sveinbjörnsson.

Sigurður var með foreldrum sínum í æsku.
Hann varð þriðja bekkjar gagnfræðingur í Gagnfræðaskólanum 1960, lærði húsasmíði í Smið h.f., varð sveinn 1967, fékk meistarabréf 1985.
Sigurður vann við smíðar, var í útgerð Hugins og Hugins II 1964-1975, var útgerðarstjóri. Hann var stjórnarformaður Vinnslustöðvarinnar 1976-1986. Þá rak hann kranafyrirtæki við hreinsun eftir Gosið 1973, var kafari í 35 ár.
Sigurður var um skeið eftirlitsmaður með byggingu sorphreinsistöðvar í Ánanaustum fyrir Reykjavíkurborg, var byggingaeftirlitsmaður hjá Hjúkrunar- og elliheimilinu Grund í Reykjavík í eitt og hálft ár og eftirlitsmaður við lagningu vatnsleiðslunnar til Eyja.
Þá stundaði hann plastbátasmíði, rak plastgluggaverksmiðjuna Gæsk í Eyjum í 9 ár.
Sigurður var kennari í köfun við Stýrimannaskólann í Eyjum.
Á yngri árum stofnaði hann Hljómsveit S. Ó. og lék aðallega fyrir dansi í Alþýðuhúsinu í 4-5 ár.
Þau Sigurbjörg giftu sig 1971, eignuðust þrjú börn. Þau bjuggu í fyrstu á Helgafellsbraut 31 til 1973, á Fjólugötu 21 í 25 ár, bjuggu í Vík í Mýrdal í eitt ár, á Selfossi í 6 mánuði, þá leigðu þau á Áshamri um skeið, síðan á Foldahrauni 4, þá við Strembugötu, en búa nú á Áshamri 36.

ctr
Sigurbjörg, Sigurður og börn.
Aftari röð frá vinstri: Sólveig, Óskar, Soffía.

I. Kona Sigurðar, (26. desember 1971), er Sigurbjörg Óskarsdóttir frá Hrafnabjörgum, húsfreyja, ræstitæknir, f. 20. júní 1945.
Börn þeirra:
1. Sólveig Sigurðardóttir verkakona, síðar í Reykjavík, f. 4. júlí 1965. Fyrrum eiginmaður Þórður Svansson Jónssonar. Fyrrum maður hennar Daði Ragnarsson.
2. Óskar Sigurðsson trésmiður, nú prédikari á Nýja-Sjálandi, f. 23. júlí 1971. Kona hans Gunnlaug Rósalind Sigurðardóttir.
3. Soffía Sigurðardóttir húsfreyja í Reykjavík, f. 2. desember 1978. Maður hennar Stefnir Snorrason Óskarssonar.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.