Helgi Bernódusson (skrifstofustjóri Alþingis)
Helgi Bernódusson frá Borgarhól við Kirkjuveg 11 í Eyjum, cand. mag., kennari, skrifstofustjóri Alþingis fæddist 6. ágúst 1949 í Eyjum.
Foreldrar hans voru Bernódus Þorkelsson frá Sandprýði, vélstjóri, skipstjóri, f. 3. júní 1920, d. 11. febrúar 1957, og kona hans Aðalbjörg Jóhanna Bergmundsdóttir, f. 27. desember 1919 á Strönd, d. 8. september 2003.
Síðari maður Aðalbjargar Magnús Magnússon verslunarmaður, sjómaður, verkamaður, f. 18. ágúst 1926, d. 27. júní 2018.
Börn Aðalbjargar og Bernódusar:
1. Birna Berg Bernódusdóttir húsfreyja, bankastarfsmaður í Hafnarfirði, f. 8. september 1938 í Stakkholti, d. 31. mars 2021.
2. Þorkell Birgir Bernódusson, f. 14. nóvember 1939 á Haukfelli, d. 17. mars 1943 úr berklum.
3. Elínborg Bernódusdóttir húsfreyja, verslunarmaður, fiskverkakona í Eyjum, f. 4. desember 1940 í London, d. 17. október 2021.
4. Þóra Birgit Bernódusdóttir húsfreyja, verkakona, klinikdama í Eyjum, f. 8. desember 1942 í London, d. 26. janúar 2013.
5. Aðalbjörg Jóhanna Bernódusdóttir, (Lilla), húsfreyja, útgerðarmaður í Eyjum, f. 28. júní 1944 í London.
6. Birgir Bernódusson stýrimaður, f. 4. apríl 1946 að Faxastíg 11, fórst með v/b Ver 1. mars 1979.
7. Helgi Bernódusson cand. mag. í íslensku og almennum málvísindum, skrifstofustjóri Alþingis, f. 6. ágúst 1949.
8. Jón Einarsson Bernódusson skipaverkfræðingur, forstöðumaður skipasviðs Siglingamálastofnunar, síðar fagstjóri rannsókna og þróunar hjá Samgöngustofu, f. 18. febrúar 1952, d. 22. september 2021.
9. Þuríður Bernódusdóttir húsfreyja, fiskverkakona, þjónustufulltrúi, f. 13. nóvember 1954.
Börn Aðalbjargar og Magnúsar Magnússonar, síðari manns hennar:
10. Jóhannes Þórarinsson sölumaður í Reykjavík, f. 1. nóvember 1959. Hann varð kjörbarn Ásu Bergmundsdóttur systur Aðalbjargar, f. 2. maí 1926, d. 28. nóvember 2004, og Þórarins Kristjánssonar sjómanns, kaupmanns, f. 13. júní 1920, d. 11. janúar 1983.
11. Elín Helga Magnúsdóttir húsfreyja, skrifstofumaður í Eyjum og Reykjavík, f. 16. september 1963.
Helgi var með foreldrum sínum fyrstu ár sín, en faðir hans lést, er Helgi var á áttunda árinu.
Hann ólst upp hjá móður sinni og síðan henni og Magnúsi síðari manni hennar.
Helgi lauk gagnfræðaprófi í Gagnfræðaskólanum 1966, var nemandi í Danebod Höjskole Fynshavn, Als, Danmörku 1966-1967, tók kennarapróf í Kennaraskólanum 1970, stúdentspróf þar (utan skóla) 1971. Hann átti vetrardvöl í LaGrange College í Georgíu, Bandaríkjunum 1972-1973.
Helgi tók BA-próf í íslensku, bókasafnsfræði og almennum málvísindum í Háskóla Íslands 1976 og kandídatspróf (cand. mag.-próf) í íslenskri málfræði þar 1982 og sama ár próf í uppeldis- og kennslufræðum í Kennaraháskólanum.
Helgi var kennari í Gagnfræðaskólanum í Eyjum 1970-1971, stundakennari í Barnaskólanum í Eyjum 1969 og 1970, Kennaraháskóla Íslands 1977 Lögregluskóla ríkisins 1978, Framhaldsskólanum í Eyjum 1981-1982, í Verslunarskóla Íslands 1983 og Háskóla Íslands 1988.
Hann var bókavörður í Eyjum 1978-1982, starfsmaður bókaforlagsins Arnar og Örlygs hf. 1982-1983.
Með háskólanáminu vann Helgi við prófarkalestur og fleiri störf hjá Alþingi 1973-1978 og 1983 varð hann deildarstjóri á skrifstofu Alþingis. Frá 1989 til 1996 var hann forstöðumaður þingmálasviðs, sem var áður annað af tveimur meginsviðum skrifstofunnar, og staðgengill skrifstofustjóra frá 1993.
Helgi var ráðinn skrifstofustjóri Alþingis 2005 og gegndi starfinu til 2019.
Stjórnmálaþátttaka:
1. Helgi var formaður Eyverja, Félags ungra sjálfstæðismanna í Eyjum 1970-1971, sat í stjórn Sambands ungra sjálfstæðismanna 1971-1975.
Útgáfustarfsemi:
1. Ritsafn Snorra Sturlusonar. Mál og menning 2002. Helgi var í ritnefnd.
2. Kristni á Íslandi. Hjalti Hugason. Helgi var í ritnefnd.
3. Fjöldi blaðagreina.
Þau Gerður giftu sig 1975, eignuðust tvö börn. Þau bjuggu að Áshamri 75 í Eyjum, hafa búið í Granaskjóli 86 í Reykjavík.
I. Kona Helga, (26. september 1975), er Gerður Guðmundsdóttir M.A. í hagnýtum málvísindum frá Readingháskóla á Englandi, kennari, f. 9. mars 1948 á Hellissandi á Snæfellsnesi.
Börn þeirra:
1. Árni Helgason lögmaður í Reykjavík, f. 25. júlí 1981. Kona hans Sigríður Guðmundsdóttir, f. 16. janúar 1981.
2. Kristinn Helgason námsmaður, f. 27. júní 1988.
Heimildir
- Samantekt: Víglundur Þór Þorsteinsson.
- Frjáls verslun 1.tbl. 2005. Útg. Heimur h.f. Ritstjóri Jón G. Hauksson.
- Helgi.
- Íslendingabók.is.
- Kennaratal á Íslandi. Ólafur Þ. Kristjánsson og fleiri. Prentsmiðjan Oddi 1958-1988.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.