Sigurgeir Jónasson
Sigurgeir Jónasson er fæddur 19. september 1934. Foreldrar hans voru Jónas Sigurðsson og Guðrún Kristín Ingvarsdóttir. Sigurgeir var kvæntur Jakobínu Guðlaugsdóttur, en hún lést árið 2004. Þau eiga þrjú börn, Sigrúnu Ingu, Guðlaug og Guðrúnu Kristínu.
Sigurgeir býr í Skuld við Smáragötu 11, en hann færði nafnið frá gömlu Skuld sem var rifin.
Sigurgeir var um árabil umboðsmaður Morgunblaðsins í Vestmannaeyjum.
Sigurgeir er löngu þekktur fyrir ljósmyndir sínar og hafa þær vakið mikla athygli. Árið 2005 stofnuðu Sigurgeir og fjölskylda hans fyrirtækið Sigurgeir ljósmyndari ehf. með það að markmiði að skrásetja og varðveita það mikla ljósmyndasafn sem hann hefur komið sér upp síðustu áratugina.
Sigurgeir var útnefndur bæjarlistamaður Vestmannaeyja árið 2006.
Tenglar
- Myndir Sigurgeirs er að finna inn á slóðinni www.sigurgeir.is.
Frekari umsögn
Sigurgeir Jónasson ljósmyndari fæddist 19. september 1934.
Foreldrar hans voru Jónas Sigurðsson í Skuld, f. 29. mars 1907, d. 4. janúar 1980, og kona hans Guðrún Kristín Ingvarsdóttir húsfreyja, f. 5. mars 1907, d. 26. mars 2005.
Kona Sigurgeirs var Jakobína Guðlaugsdóttir húsfreyja, f. 30. mars 1936, d. 4. febrúar 2004.
Börn Sigurgeirs og Jakobínu eru:
1. Sigrún Inga, f. 7. júlí 1954.
2. Guðlaugur, f. 16. júlí 1956.
3. Guðrún Kristín, f. 16. júlí 1965.
Úr fórum Árna Árnasonar símritara:
Bjargveiðimannatal.
Sigurgeir er hár vexti, þrekinn um herðar, en niðurmjór svo sem títt er um sterka menn. Hann er vel sterkur, þjálfaður vel af íþróttum, snar og liðugur. Hann er ljóshærður og bjartur yfirlitum. Hann er kátur og skemmtilegur í framkomu, prýðis félagi og drengur góður, fríður ásýndum, ósérhlífinn við alla vinnu, trúr og traustur.
Veiðimaður er hann orðinn vel góður, þótt ungur sé og á eflaust eftir að þjálfast í þeirri íþrótt.
Lífsstarf hans er verkstjórn hjá Bæjarútgerð Vestmannaeyja og nýtur hann verðskuldaðs trausts undir- og yfirmanna sinna í hvívetna. Hann er Álseyingur í húð og hár, hefir ekki enn verið í annari útey til veiða, maður, sem nýtur fyllsta trausts og vináttu félagsbræðra sinna þar.
Úr fórum Árna Árnasonar, efnisyfirlit
Heimildir
- Samantekt: Víglundur Þór Þorsteinsson.