Jón Ísak Sigurðsson
Sjá aðgreiningarsíðuna fyrir aðra sem hafa borið nafnið „Jón Sigurðsson“
Jón Ísak Sigurðsson fæddist í Merkisteini í Vestmannaeyjum 7. nóvember 1911 og lést 28. júní 2000. Foreldrar hans voru Sigurður Björnsson bátasmiður og Sigríður Árnadóttir. Árið 1939 kvæntist Jón Klöru Friðriksdóttur frá Látrum í Vestmannaeyjum. Þau eignuðust fjögur börn, Friðrik, Svövu Sigríði, Guðjón Þórarinn og Ragnar.
Að loknu barnaskólaprófi fór Jón í unglingaskóla sem þá var starfræktur í Eyjum. Seinna, árið 1933, lauk hann prófi frá vélstjórnarnámskeiði sem veitti 50 hestafla réttindi sem síðar voru hækkuð í 250 hestöfl.
Jón á Látrum, eða Jón lóðs eins og hann var oft kallaður, var hafnsögumaður í tugi ára. Jón sat í bæjarstjórn á vegum Sjálfstæðisflokksins um árabil og var formaður hafnarstjórnar í áratugi. Ýmsum fleiri ábyrgðarstöðum gegndi hann, lengi í stjórn Bátaábyrgðarfélagsins, formaður í Björgunarfélagi Vestmannaeyja í 28 ár, formaður í Starfsmannafélagi Vestmannaeyja í 20 ár og ræðismaður Norðmanna um langt skeið svo nokkuð sé nefnt. Þá var Jón einn af hvatamönnum þess að reyndur var svifnökkvi - loftpúðaskip milli lands og Eyja.
Jón Ísak var kjörinn heiðursborgari Vestmannaeyja á 75 ára afmæli kaupstaðarins, þann 14. febrúar 1994.
Sjá einnig Blik 1957/Hafnsögumannsstörfin áður fyrr, grein eftir Jón Ísak.
Heimildir
- Morgunblaðið, 15. júlí 2000. Minningargreinar um Jón Ísak Sigurðsson.
Jón Ísak Sigurðsson hafnsögumaður á Látrum fæddist 7. nóvember 1911 og lést 28. júní 2000.
Foreldrar hans voru Sigurður Björnsson bátasmiður á Rauðafelli, síðar í Merkisteini, f. 29. maí 1886 í Árnatóft á Stokkseyri, d. 9. júní 1928, og kona hans Sigríður Árnadóttir húsfreyja á Rauðafelli, síðar í Merkisteini, f. 10. apríl 1886, d. 19. september 1972.
Kona Jóns Ísaks var Klara Friðriksdóttir húsfreyja á Látrum, f. 26. september 1916, d. 30. desember 2008.
Börn Jóns Ísaks og Klöru:
Friðrik, f. 18. september 1939.
Svava Sigríður, f. 30. september 1942.
Guðjón Þórarinn, f. 29. júní 1949.
Ragnar, f. 14. október 1952.
Jóns er getið í bjargveiðimannatali Árna Árnasonar, en án sérstakrar umsagnar.
Úr fórum Árna Árnasonar, efnisyfirlit
Heimildir
- Samantekt: Víglundur Þór Þorsteinsson.
- Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
- Íslendingabók.is.
- Manntöl.
