Helga Guðmundsdóttir (Nöjsomhed)

Helga Guðmundsdóttir.

Helga Guðmundsdóttir húsfreyja og ljósmóðir fæddist 24. júní 1863 á Ertu í Selvogi og lést 18. mars 1931 í Eyjum.
Foreldrar hennar voru Guðmundur Halldórsson bóndi á Litla-Leðri og Ertu, síðar útvegsbóndi á Hvalsnesi, ættaður frá Torfastöðum í Grafningi, f. um 1832, drukknaði 23. maí 1868, og kona hans Guðrún Eiríksdóttir húsfreyja, ættuð frá Litla-Landi í Ölfusi, f. 11. júní 1836, d. 28. mars 1894.

Helga var móðurmóðir Helgu Hinriksdóttur ljósmóður, f. 12. ágúst 1946.

Eftir dauða föður síns ólst Helga upp hjá Vilborgu Eiríksdóttur húsfreyju og ljósmóður, móðursystur sinni, og Katli Ketilssyni útvegsbónda í Kotvogi í Höfnum.
Helga lauk ljósmæðraprófi 27. janúar 1886 í Reykjavík. Hún tók aldrei ljósmæðraumdæmi, en mun hafa stundað ljósmóðurstörf áður en hún fluttist til Eyja 1886.
Helga giftist Gísla 1885. Þau bjuggu fyrst í Uppsölum, en fluttust í Nöjsomhed. Hjá þeim var Halla móðir Gísla. Þau Gísli eignuðust 6 börn. Hann andaðist 1896.
Helga bjó ekkja og húsmóðir í Nöjsomhed 1901 með Einari Halldórssyni og hjá henni var Jórunn dóttir hennar.
Við manntal 1910 var hún gift húsfreyja í Sandprýði með Einari og þrem börnum þeirra og þrem börnum hennar frá fyrra hjónabandi.
Hún missti Einar 1912, þegar skipshöfnin á Íslandi drukknaði í Höfninni í ofsaveðri.
1920 var hún ekkja í heimili hjá Jóni Gíslasyni syni sínum í Sandprýði. Þar voru Þórunn Markúsdóttir húsfreyja, kona Jóns, Markús sonur þeirra og þrjú börn Helgu frá hjónaböndum hennar.
1930 var Helga bústýra hjá Jóni syni sínum í Ármótum, (Skólavegi 14). Hann var þá ekkill.
Helga lést 1931.

Hjónin frú Helga Guðmundsdóttir og og Gísli Gíslason Bjarnasen „snikkari“, með börn sín. Þau eru þessi frá vinstri: Halldóra, Jórunn og Jón („Jón frá Ármótum“). (Mynd úr Bliki)

Helga Guðmundsdóttir var tvígift.
I. Fyrri maður hennar, (19. nóvember 1885), var Gísli Gíslason Bjarnasen smiður, beykir og verslunarmaður, f. 27. júlí 1858, d. 6. maí 1897.
Börn þeirra voru:
1. Halldóra Gísladóttir vinnukona, f. 12. desember 1885, d. 10. júní 1965.
2. Gíslína Gísladóttir, f. 12. desember 1885, d. 12. mars 1890.
3. Jón Gíslason útgerðarmaður, verslunarmaður á Ármótum, f. 4. janúar 1888 á Uppsölum, d. 20. febrúar 1970.
4. Jórunn Gísladóttir húsfreyja, f. 27. júní 1889, d. 3. nóvember 1961.
5. Sigríður Gíslína Gísladóttir, f. 13. ágúst 1891, d. 18. janúar 1892.
6. Halla Sigríður Gísladóttir, f. 29. desember 1892 í Nöjsomhed, d. 17. mars 1893.
7. Guðmundur Gíslason, f. 16. júní 1894, d. 12. nóvember 1894.
8. Karolína Vilborg Gísladóttir, f. 5. janúar 1896 í Nöjsomhed, d. 25. júlí 1896.

II. Barnsfaðir Helgu var Einar Jónsson sjómaður frá Káragerði í V-Landeyjum, f. 12. júní 1863, d. 27. nóvember 1941.
Barn þeirra var
9. Gíslína Sigríður Helga Einarsdóttir húsfreyja í Stafholti, f. 18. ágúst 1900, d. 12. ágúst 1967.

III. Síðari maður Helgu, (22. desember 1901), var Einar Halldórsson útgerðarmaður og sjómaður í Sandprýði, f. 25. október 1866, drukknaði í Höfninni 10. janúar 1912.
Börn þeirra hér:
10. Gunnar Ármann Einarsson vélstjóri, f. 31. júlí 1902 í Hvammi, fórst með Minervu VE-241 24. janúar 1927.
11. Geir Einarsson, f. 9. febrúar 1905, d. 7. apríl 1906.
12. Vilmunda Einarsdóttir húsfreyja, f. 10. október 1908, d. 23. júní 1988.
Sonur Einars og stjúpsonur Helgu var
12. Ólafur Einarsson bátsformaður á Búðarfelli, f. 10. janúar 1897, d. 27. janúar 1928.
Fóstursonur Helgu, sonur Helgu Gísladóttur hálfsystur hennar var
13. Ketill Eyjólfsson bifreiðastjóri, útgerðarmaður, framkvæmdastjóri í Hafnarfirði, síðar starfsmaður Hafnarfjarðarbæjar, f. 20. apríl 1911, d. 11. október 2006.

---

Heimildir

• Samantekt: Víglundur Þór Þorsteinsson.
• Íslendingabók.is.
• Ljósmæður á Íslandi 1-2. Ritstjóri Björg Einarsdóttir. Ljósmæðrafélag Íslands 1984.
• Manntöl.
• Minningarrit. Páll Oddgeirsson. Vestmannaeyjum 1952.
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---