Ragnheiður Gísladóttir (Svaðkoti)

Ragnheiður Gísladóttir húsfreyja í Svaðkoti.

Ragnheiður Gísladóttir húsfreyja í Svaðkoti fæddist í Litla-Kollabæ í Fljótshlíð 28. september 1833 og lést 7. júlí 1911.
Faðir hennar var Gísli bóndi í Litla-Kollabæ og Miðkoti í Fljótshlíð, f. 14. september 1794, d. 10. júlí 1876, Sveinsson bónda í Stöðlakoti og á Arngeirsstöðum í Fljótshlíð, f. 25. ágúst 1761, d. 13. september 1818, Arnbjörnssonar bónda á Kvoslæk í Fljótshlíð og konu Arnbjarnar á Kvoslæk, Sigríðar húsfreyju, f. 1734, d. 17. maí 1814, Ólafsdóttur. Þau Arnbjörn og Sigríður eru ættforeldrar Kvoslækjarættar.
Móðir Gísla og kona Sveins á Arngeirsstöðum var Þórný húsfreyja, f. 1767, d. 21. júní 1823, Jónsdóttir (líklega) Sigmundssonar og Hallberu Jónsdóttur, f. 1740.
Ragnheiður í Svaðkoti og Jón Guðmundsson í Suðurgarði voru þremenningar frá Arnbirni og Sigríði á Kvoslæk.
.
Móðir Ragnheiðar og kona Gísla í Litla-Kollabæ var Steinunn húsfreyja, f. 5. ágúst 1794, d. 19. mars 1860, Þorleifsdóttir vinnumanns í Kirkjulækjarkoti, f. 15. september 1773, d. um 1794, Sveinbjörnssonar bónda á Kirkjulæk og Torfastöðum í Fljótshlíð, f. 1741, d. 8. janúar 1824 í Vatnsdal þar, Þorleifssonar, og konu Sveinbjarnar, Híldar húsfreyju, f. 1729, d. 15. mars 1819, Pálsdóttur.
Móðir Steinunnar í Litla-Kollabæ og barnsmóðir Þorleifs vinnumanns var Björg, síðar húsfreyja á Núpi og í Gerðakoti undir Eyjafjöllum, þá síðari kona Orms Ormssonar bónda; hún f. 1771 á Dúðu í Fljótshlíð, d. 16. febrúar 1840, Benediktsdóttir, bónda á Kirkjulæk, f. (1750), Þorsteinssonar og ókunnrar barnsmóður Benedikts.

Ragnheiður var eins árs með fjölskyldu sinni í Litla-Kollabæ 1835, átta ára með fjölskyldunni í Miðkoti 1840, 13 ára þar 1845, 17 ára þar 1850.
Hún fluttist til Eyja 1856 og varð vinnukona á Vestri-Búastöðum hjá Sigurði Torfasyni hreppstjóra. Þar var þá Bjarni Ólafsson vinnumaður.
Þau Bjarni hófu búskap sinn í Litlakoti, síðar nefnt Veggur.
Þau fluttust að Svaðkoti 1860 og hófu landbúskap, en gerðu einnig út lítinn bát í Klaufinni.
Ragnheiður var gift húsfreyja í Svaðkoti með Bjarna og barninu Ólafi tveggja ára 1860, 37 ára húsfreyja þar 1870, með Bjarna og fjórum börnum þeirra.
Bjarni fórst með allri skipshöfn sinni 16. júní 1883 og þar á meðal var Ólafur sonur þeirra Ragnheiðar.
Við manntal 1890 var Ragnheiður 57 ára ekkja í Svaðkoti með Guðríði 15 ára hjá sér.
Við manntal 1901 var hún 68 ára í Svaðkoti, í heimili hjá Guðríði og manni hennar Jóni, síðar í Brautarholti.
Við manntal 1910 var Ragnheiður komin til Sveinseyrar í Tálknafirði og þar var hún hjá dóttur sinni Höllu og manni hennar Kristjáni Jóni Guðmundssyni.
Ragnheiður lést vestra 1911.

Maður Ragnheiðar var, (9. október 1858), Bjarni Ólafsson bóndi í Svaðkoti, f. 1836 að Steinmóðarbæ undir Eyjafjöllum, fórst 16. júní 1883.
Börn Ragnheiðar og Bjarna voru:
1. Gísli, f. 27. október 1857, d. 3. nóvember 1857 „af hér algengri barnaveiki“.
2. Ólafur, f. 9. ágúst 1859, d. 8. maí 1861 „af kyrkingarveiki“.
3. Jón, f. 22. júní 1861, d. 23. júní sama ár. „Dauðfætt“ er skráð.
4. Ólafur Bjarnason, f. 6. ágúst 1862, d. 16. júní 1883, drukknaði með föður sínum.
5. Sæmundur, f. 4. okt. 1864, d. 26. júní 1873 úr „andarteppu“.
6. Steinunn Bjarnadóttir, f. 11. júí 1867, fór til Rvk, giftist þar Jóhannesi skipstjóra.
7. Gísli, f. 10. maí 1870, hrapaði úr sunnanverðum Ofanleitishamri á hvítasunnu 13. maí 1883, 13 ára.
8. Guðjón, f. 16. marz 1873, d. 23. mars 1873, jarðsettur 30. mars.
Við dánarskráningu barnsins er ritað: „Þetta barn er hinn 1. dáni, sem grafinn er í nýjum kirkjugarðsreiti, (er liggur austan þvert fyrir hinum gamla kirkjugarði), sem vígður var um leið og það var jarðað.“
9. Guðríður, f. 28. febr. 1875, d. 3. september 1950.
10. Halla, f. 2. nóvember 1878, d. 25. desember 1930.

Saga Ragnheiðar og Bjarna er rakin frekar í Bliki 1961: Hjónin í Svaðkoti.

---

Heimildir

• Samantekt: Víglundur Þór Þorsteinsson.
• Saga Vestmannaeyja. Sigfús M. Johnsen. Ísafoldarprentsmiðja h.f. 1946.
• Bliki 1961: Hjónin í Svaðkoti.
• Manntöl.
• Íslendingabók.is.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---