Arnbjörn Ögmundsson (Presthúsum)
Arnbjörn Ögmundsson útvegsbóndi og landverkamaður fæddist 5. apríl 1853 í Reynisholti í Mýrdal og lést 1. júní 1941 í Eyjum.
Foreldrar hans voru Ögmundur Árnason bóndi í Reynisholti, síðar í Eyjum, f. 10. október 1809, d. 10. janúar 1888 í Eyjum, og kona hans Þóra Jónsdóttir húsfreyja í Reynisholti, f. 1814, d. 14. apríl 1860 í Reynisholti.
Bræður Arnbjarnar voru:
1. Jón Ögmundsson í Dalbæ, f. 8. júlí 1840.
2. Ögmundur Ögmundsson á Landakoti, f. 6. ágúst 1848, d. 8. október 1932.
Systir þeirra var Málfríður Ögmundsdóttir föðurmóðir Auðuns Oddssonar formanns á Sólheimum.
Arnbjörn var með foreldrum sínum í Reynisholti til ársins 1860, er móðir hans lést, síðan var hann þar með föður sínum 1860-1861, með honum í Reynishólum í Mýrdal 1861-1862, á Reyni þar 1862-1864, í Hraungerði þar 1864-1869. Hann var vinnudrengur í Klausturhjáleigu (Norðurhjáleigu) í Álftaveri 1869-1870, vinnumaður á Reyni 1870-1871, á Herjólfsstöðum í Álftaveri 1871-1873.
Hann fluttist úr Álftaveri að Jónshúsi 1873, var sjómaður í Eyjum 1880, kvæntist Elísabetu 1881, þau þá búandi í Helgahjalli, var kvæntur vinnumaður í Jómsborg 1890. Þau bjuggu á Oddsstöðum 1899.
Arnbjörn var útvegsbóndi í Eyjum 1901, kvæntur bóndi og útvegsmaður í Presthúsum 1910. Þau Elísabet skiptu bústöðum við hjónin í Hvíld, Kára Sigurðsson og Þórunni Pálsdóttur, á öðrum áratug aldarinnar.
Hann var kvæntur landverkamaður í Hvíld 1920, ekkill á Faxastíg 14 1930, bjó þar með Guðbjörgu dóttur sinni og Elísabetu Hrefnu dóttur hennar.
Hann lést 1941.
Kona Arnbjörns, (1. desember 1881), var Elísabet Bergsdóttir húsfreyja frá Vilborgarstöðum, f. 1. desember 1857, d. 6. júlí 1928.
Börn Arnbjörns og Elísabetar voru:
1. Bergmundur Arnbjörnsson í Nýborg, f. 17. október 1883 í Helgahjalli, d. 28. nóvember 1952.
2. Þorbjörn Arnbjörnsson á Reynifelli, f. 8. október 1886 í Helgahjalli, d. 10. nóvember 1965.
3. Guðbjörg Arnbjörnsdóttir, f. 22. desember 1891 í Jómsborg, d. 18. maí 1944.
4. Ágústa Arnbjörnsdóttir húsfreyju í Hvíld við Faxastíg, f. 11. ágúst 1899 á Oddsstöðum, d. 24. maí 1989.
Fósturdóttir hjónanna var
5. Elísabet Hrefna Eyjólfsdóttir, f. 8. júní 1913 í Presthúsum, d. 13. júlí 1984, síðast að Brekastíg 7c. Hún var dóttir Guðbjargar Arnbjörnsdóttur og Eyjólfs Ólafssonar bakara í Reykjvík.
Heimildir
- Samantekt: Víglundur Þór Þorsteinsson.
- Árni Árnason.
- Íslendingabók.is.
- Manntöl.
- Prestþjónustubók.
- Vestur-Skaftfellingar 1703-1966. Björn Magnússon. Leiftur 1970-1973.
Þessi grein tilheyrir Æviskrám Eyjafólks eftir Víglund Þór Þorsteinsson.