Jón Jónsson (Brautarholti)

Úr Heimaslóð, Sögusetri Vestmannaeyja
Útgáfa frá 11. ágúst 2013 kl. 10:45 eftir Viglundur (spjall | framlög) Útgáfa frá 11. ágúst 2013 kl. 10:45 eftir Viglundur (spjall | framlög)
Fara í flakk Fara í leit
Jón í Brautarholti.
Jón níræður.

Sjá aðgreiningarsíðuna fyrir aðra sem hafa borið nafnið „Jón Jónsson“


Jón Jónsson í Brautarholti fæddist 15. júlí 1869 í Norðurbænum á Vilborgarstöðum og lést 4. september 1964. Jón fluttist með foreldrum sínum að Dölum árið 1880.
Foreldrar hans voru hjónin Jón Jónsson hreppsjóri í Dölum og kona hans Jóhanna Gunnsteinsdóttir. Eina systur átti hann, Dómhildi, en hún flutti ung til Ameríku.

Eiginkona Jóns var Guðríður Bjarnadóttir í Svaðkoti, f. 1875. Þau eignuðust 5 börn, Bjarna f. 1896, dó ungur, Jónu Jóhönnu, f. 1899, dó í Canada, Bjarneyju Ragnheiði f. 1905 í Canada, Jónu Jóhönnu f. 1907, d. 2005 og Ólaf Gunnstein f. 1911, d. 1984.

Jón og Guðríður hófu búskap í Svaðkoti hjá móður Guðríðar, en byggðu síðan nýtt Svaðkot á svipuðum stað og Suðurgarður stendur núna. Þetta var lítið einlyft hús.

Jón og Guðríður fluttu til Kanada um aldamótin og bjuggu í Selkirk. Þau fluttu aftur heim árið 1907 og byggðu Brautarholt við Landagötu 3b árið 1908.

Jón stundaði sjómennsku, þar af 13 ár á Gideon, gerði út báta, vann við byggingu Fiskimjölsverksmiðjunnar og vann þar síðan til ársins 1933, en gerðist þá ráðsmaður á Sjúkrahúsi Vestmannaeyja í fjölda ára.

Jón var heiðursfélagi í Bjargveiðifélagi Álseyinga. Hann hélt upp á áttræðisafmæli sitt í Álsey. Veiðistaður einn í eynni er nefndur eftir honum, heitir hann Jónsnef.

Jón lést árið 1964, 93 ára að aldri.

Sjá nánar um Jón við fiskveiðar á Austfjörðum með Magnúsi á Vesturhúsum, - í Bliki 1969/Endurminningar, II. hluti og áfram.

Frekari umfjöllun

Jón Jónsson í Brautarholti, fæddist 15. júlí 1869 og lést 4. september 1962.
Foreldrar hans voru Jón Jónsson hreppstjóri í Dölum, áður (1869-1881) á Vilborgarstöðum, f. 16. júní 1843 í Jórvík í Álftaveri, d. 17. apríl 1916, og kona hans Jóhanna Gunnsteinsdóttir húsfreyja, f. 23. mars 1841 í Neðri-Dal í Mýrdal, d. 1. ágúst 1923.

Kona Jóns í Brautarholti (1897) var Guðríður húsfreyja, f. 28. febrúar 1875, d. 3. september 1950.
Börn Jóns og Guðríðar voru:
1. Bjarney Ragnheiður húsfreyja á Þrúðvangi, f. 4. desember 1905 í Selkirk í Kanada, d. 9. nóvember 2006 að Hraunbúðum, gift Sigurði Ólasyni forstjóra, f. 25. ágúst 1900, d. 6. júní 1979.
2. Jóna Jóhanna, f. 29. desember 1907, gift Kristni Ólafssyni fulltrúa á Reyni, síðar í Hafnarfirði, f. 21. nóvember 1897, d. 18. október 1959.
3. Ólafur Gunnsteinn , f. 12. desember 1911, d. 30. mars 1984, kvæntur Sigrúnu Lúðvíksdóttur, f. 5. september 2003, d. 5. september 2003.

Úr fórum Árna Árnasonar símritara:
Bjargveiðimannatal.

Þau Jón og Guðríður skildu samvistir og gerðist Jón þá umsjónarmaður á sjúkrahúsinu og gegndi því starfi til 1949-1950 með bestu prýði og sóma. Jón og Guðríður dvöldu í USA í um 6 ár, en komu þá heim aftur og bjuggu hér síðan. Stundaði Jón alla vinnu og komst ávallt vel af með fjölskyldu sína.
Jón byrjaði sem unglingur að fara til fuglaveiða og lá við í Álsey og Bjarnarey. Ekki fór hann í sig svo nokkru næmi og sagði hann, að til þess hefði hann alltaf verið of lofthræddur. En undirsetumaður var hann traustur og góður og iðkaði það mjög mikið. Lundaveiðimaður var Jón í meðallagi, en of stirður að líkamsbyggingu til þess að ná langt í þeirri íþrótt. Hann fann ágætan veiðistað í Álsey, sem nefndur var hans nafni og heitir Jónsnef. Er sá staður í fullri notkun enn í dag og þykir ágætur til veiða. Jón er stilltur maður og gætinn, orðvar og prúður, kátur innan sinna félagsbanda, ræðinn og vel fróður um margt, fremur tilbaka en lifnar og kætist fljótt í viðræðum.


Úr fórum Árna Árnasonar, efnisyfirlit


Heimildir

  • Samantekt: Víglundur Þór Þorsteinsson.
  • Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
  • Íslendingabók.is.
  • Manntöl.
  • Vestur-Skaftfellingar 1703-1966. Björn Magnússon. Leiftur 1970-1973.

Myndir