Blik 1961/Gísli Engilbertsson, verzlunarstjóri, kona hans og börn

Efnisyfirlit 1961

kona hans og börn

Gísli Engilbertsson, verzlunarstjóri, kona hans og börn.

Fremri röð frá vinstri: Engilbert Gíslason, málarameistari, f. 12. okt 1877.
Gísli Engilbertsson, f. 14. ágúst 1834 að Syðri-Mörk, Eyjafjöllum, d. 8. ágúst 1919.
Ragnhildur Þórarinsdóttir, f. 14. okt 1844, frá Neðri-Dal, Eyjafjöllum, d. 12. maí 1925.
Aftari röð frá v.: Þórarinn Gíslason, gjaldkeri, f. 4. júní 1880, d. 12. febr. 1930.
Elínborg Gísladóttir, húsfreyja í Laufási, f. 1. nóv. 1883, kona Þorsteins Jónssonar, fyrrv. skipstj. og útgerðarmanns.
Guðfinna Gísladóttir, f. 15. júlí 1870, d. 2. ágúst 1955. Var gift Halldóri Guðmundssyni, rafmagnsfræðingi í Reykjavík.
Katrín Gísladóttir, f. 20. jan. 1875. Var gift Páli Ólafssyni, verzlunarmanni.
Árið 1869 fluttist Gísli Engilbertsson til Vestmannaeyja með heitmey sína Ragnhildi Þórarinsdóttur. Þau fluttu frá Mörk undir Eyjafjöllum og settust að í Sjólyst í Eyjum. Á jóladag sama ár voru þau gefin saman í hjónaband eftir að lýst hafði verið með þeim þrívegis í Landakirkju.
Eftir að Gísli Engilbertsson fluttist hingað, gerðist hann verzlunarþjónn við Tangaverzlun eða Verzlunina Júlíushaab, eins og hún hét þá. Hann reyndist dyggur og trúr í starfi og hygginn í verkum og viðskiptum Hann var starfsmaður fyrstu árin hjá J.P.T. Bryde, sem eignaðist verzlunina 1852, þá tvítugur að aldri. Þegar faðir hans, N. N. Bryde, dó, 9. ágúst 1879, erfði J.P.T. Bryde Garðsverzlun í Eyjum. En með því að enginn mátti eiga tvær verzlanir í Eyjum, eða reka tvær verzlanir á sama stað, leigði J.P.T. Bryde Gísla Engilbertssyni Júlíushaabverzlun. Það gerðist 1880. Næstu 9 árin rak síðan Gísli Tangaverzlunina á sínu nafni, en það ár gaf J.P.T Bryde syni sínum Herlug Bryde Tangaverzlunina. Eftir það var Gísli talinn verzlunarstjóri þeirrar verzlunar, þar til H. Bryde hætti verzlunarrekstri 1893.
Síðustu æviárin dvöldust þau hjón, Gísli og Ragnhildur, hjá syni sínum Þórarni gjaldkera að Lundi í Eyjum og konu hans Matthildi Þorsteinsdóttur (leiðr.).
Gísli Engilbertsson var góður hagyrðingur. Við birtum hér eilítið sýnishorn af kveðskap hans.

BRÚÐKAUPSKVÆÐI

ort, er Þorsteinn Jónsson í Laufási og

Elínborg Gísladóttir, dóttir Gísla

verzlunarstjóra, giftu sig, 22. nóvember 1903.

Saklaus gleðin helg og hrein,

hún skal með oss vera,

ávöxt mun á grænni grein

guðs í nafni bera.

Látum brosin lauga kinn

ljóss í geislum björtum,

syngjum gleði í sálir inn,

sorg og hryggð úr hjörtum.

Gott er ei, var Adam tjáð,

einsamall að búa.

Þótt sé gamalt þetta ráð,

því samt flestir trúa.

Meðan varir vatn og grund,

vermir sól og eldur,

sér mun festa halur hrund.

Helg því ástin veldur.

Undra máttar gegnum geim

gengur náðarljóminn.

Hann í sálarsólar heim

sýnir kærleiks blómin.

Sýnir tryggð sem grein við grein,

guðs með krafti styður,

út svo breiðast blöðin hrein.

Blómstri hjónafriður.

Tryggðum bundin hjá oss hjón

hér sem blóm nú standa

ung og fjörug, fríð i sjón,

frjáls og hrein í anda.

Eiga þau sér græna grein,

guð sem blessað hefur.

Móðurástin helga. hrein

hana örmum vefur.

Hjálpar lifðu engir án,

öllum dug þótt beittu.

Barnavinur barnalán

börnum þínum veittu.

Drottinn hjónum leggi lið

lífs í sæld og þrautum,

að þau víki aldrei við

út af skyldubrautum.

Guðdómsnáðar geislasól

gleðji hjón og blessi,

trú og von og vinaskjól

vegum á þau hressi.

Guð vors auðs síns gnægtum af

gjafir veiti hjónum.

Sólin, loftið, láð og haf

líti þau hýrum sjónum.

Drottinn okkar blessi byggð,

blessi hjónafriðinn,

upp mót sólu, dáð og dyggð

dagur unz er liðinn.

S T Ö K U R .

Vínið og vitið

Brennivíns nú bunar lind

bragnar róminn hækka.

Ýmsra fýkur vit í vind,

við það krónur fækka.

Jómfrúhitinn

Jómfrúhitinn ekki er

orðinn á marga fiska.

Einhver skollinn burt hann ber,

bágt er á að gizka.

Eftír 1. des. 1918

Danir Ísland vingast við,

vilja hvorir annars frið.

Árin líða, tími og tíð,

tekur enda sérhvert stríð.

Vertu iðinn

Sé iðjusemin okkur kær,

oft í sálu friður grær,

þá margur háu marki nær

og margur hjálpað öðrum fær.

Iðjuleysi eyðir þrótt,

iðjuleysi svæfir drótt.

Oft því fylgir eyðslusótt,

óhóf, svall og slark um nótt.

Iðjusemi um ævistund

oft hún færir gull í mund,

iðulega styttir stund,

styrkir heilsu, gleður lund.

---

RITNEFND BLIKS að þessu sinni skipa:

Þorsteinn Þ. Víglundsson, formaður.

Sigríður Jakobsdóttir, 3. bóknáms.

María Gunnardóttir, 3. bekk verkn.

Áki Haraldsson, 1. bekk C.

Kristján Eggertsson, 1. bekk B.

Stefán Jónsson, 1. bekk A.

Kristján Óskarsson, 2. bekk A.

Rut Óskarsdóttir, 2. bekk B.

Steinar Árnason, 2. bekk C.

Prentsmiðja Þjóðviljans h.f.

---

S P A U G

Þrír strákar fóru á vakningarsamkomu. Þegar henni lauk, var komið til þeirra með samskotabauk. Þá leið yfir einn, en hinir báru hann út.

Sonurinn: „Pabbi, hvað er eiginlega fjármálasnillingur?“ Faðirinn: „Það er maður, sem aflar meiri peninga en konan hans getur eytt.“