Jes A. Gíslason
Skýring við fjölskyldumynd frá Hlíðarhúsum samkv. Þóri Óskarssyni, Kárasonar og Jes Einari Þorsteinssyni, Einarssonar.
Fremsta röð frá vinstri: Friðrik Gísli ljósmyndari, f. 1870, d. 1906, Gísli Stefánsson kaupmaður, húsbóndi, f. 1842, d. 1903, heldur á (líklega) Rebekku, sem dó 3-4 ára, Soffía Lísbet húsfreyja, f. 1847, d. 1936, heldur á Kristjáni sjómanni, f. 1891, d. 1948.
Miðröð frá vinstri: Anna Ásdís, síðar Johnsen, húsfreyja, f. 1878, d. 1945, Guðbjörg Jónína, síðar Petersen og síðast kona Sæmundar Jónssonar, húsfreyja, f. 1880, d. 1969, Jóhann sjómaður og verkamaður, f. 1883, d. 1944 og Lárus ljósmyndari, f. 1885, d. 1950.
Aftasta röð frá vinstri: Ágúst útvegsbóndi, f. 1874, d. 1922, Jes Anders á Hól, prestur, verzlunarstjóri, kennari, bókasafnsvörður, f. 1872, d. 1961 og Stefán útvegsbóndi og veitingamaður á Sigríðarstöðum, f. 1876, d. 1953.
Séra Jes A. Gíslason var fæddur 22. maí 1872 og lést 7. febrúar 1961. Foreldrar hans voru Gísli Stefánsson kaupmaður í Hlíðarhúsi og Soffía Lisbeth Andersdóttir.
Hann var 9 ára er hann hóf nám í Barnaskóla Vestmannaeyja og yngstur nemenda í fyrsta árgangi skólans. Þrátt fyrir að vera yngstur var hann með hæstu einkunn ásamt bróður sínum, Friðriki. Hann var albróðir Friðriks Gíslasonar frá Hlíðarhúsi.
Kona Jes var Kristiana Ágústa Eymundsdóttir. Á meðal barna þeirra voru Friðrik og Anna.
Jes var bókasafnsvörður á árunum 1942–1949, auk þess að vera kennari og prestur.
Heimildir
- Þorsteinn Víglundsson. Saga barnafræðslunnar í Vestmannaeyjum. Blik. 23. árg 1962.