Ingibjörg Stefánsdóttir (Presthúsum)
Ingibjörg Stefánsdóttir húsfreyja í Presthúsum fæddist 19. ágúst 1831 á Refsstöðum í Landbroti, V-Skaft. og lést 27. júlí 1907 í Eyjum.
Faðir hennar var Stefán bóndi víða en síðast í Hörgslandskoti á Síðu, f. 1796, d. 10. júlí 1868, Jónsson bónda á Ytri-Ásum í Skaftártungu 1801, f. 1769, d. 1801, Jónssonar bónda víða, en síðast á Flögu í Skaftártungu, f. 1736, Ólafssonar og konu Jóns á Flögu, Þóru húsfreyju, f. 1745, Jónsdóttur.
Móðir Stefáns í Hörgslandskoti og kona Jóns á Ytri-Ásum (trúlofuðust 25. maí 1794) var Sigríður húsfreyja, f. 1772 á Undirhrauni í Meðallandi, d. 9. júní 1822 á Syðri-Steinsmýri þar, Jónsdóttir bónda og meðhjálpara á Undirhrauni, f. 1734, d. 3. desember 1787 á Undirhrauni, Ólafssonar, og konu Jóns á Undirhrauni, Arndísar húsfreyju, f. 1737, Ormsdóttur.
Móðir Ingibjargar og kona Stefáns í Hörgslandskoti (12. ágúst 1826) var Guðlaug húsfreyja, f. 30. mars 1804 í Hörgslandskoti, d. 22. janúar 1837 þar, Pálsdóttir bónda í Hörgslandskoti, f. 1781 í Hörgslandskoti, Hreiðarssonar bónda í Hörgslandskoti, f. 1731, d. 20. febrúar 1810, Pálssonar, og konu Hreiðars, Ingibjargar húsfreyju í Hörgslandskoti, f. 1748, d. 24. júní 1829 þar.
Móðir Guðlaugar í Hörgslandskoti og kona Páls Hreiðarssonar (18. október 1802) var Valgerður húsfreyja, f. 1774, Jónsdóttir.
Maður Ingibjargar Stefánsdóttur (6. ágúst 1853, skildu) var Jón Jónsson bóndi og formaður í Presthúsum, f. 2. júní 1831, d. 27. september 1907.
Þau voru sjálfra sín í Hörgslandskoti á Síðu 1860 með Stefán eins árs hjá sér, á Brattlandi (Ytri-Dal) á Síðu 1861-1862, en þá fóru þau til Eyja. Þau bjuggu í Presthúsum 1870 og 1880, voru hjá Guðlaugi í Gerði 1890. Jón fór til Vesturheims 1892, en Ingibjörg var áfram í Gerði og er þar skráð 1901, skilin.
Börn þeirra Jóns:
1. Jón Jónsson bóndi og formaður í Norður-Gerði, f. 22. júlí 1854, d. 1. apríl 1925, kvæntur Guðbjörgu Björnsdóttur húsfreyju, f. 28. júní 1854, d. 4. maí 1933.
2. Guðlaugur Jóhann Jónsson bóndi og útvegsmaður í Stóra-Gerði, f. 11. nóvember 1866, d. 25. apríl 1948, kvæntur Margréti Eyjólfsdóttur húsfreyju, f. 24. júní 1865, d. 29. janúar 1937.
3. Stefán Jónsson, f. 1859. Hann er hjá þeim eins árs í Hörglandskoti 1860 og 10 ára í Presthúsum 1870.
Heimildir
- Samantekt: Víglundur Þór Þorsteinsson.
- Vestur- Skaftfellingar 1703-1966. Björn Magnússon. Leiftur 1970-1973.
- Manntöl.
- Heimaslóð.