Árni Árnason (símritari)
Sjá aðgreiningarsíðuna fyrir aðra sem hafa borið nafnið „Árni Árnason“
Árni Árnason símritari, fæddist að Búastöðum 19. mars 1901 og lést 13. október 1962. Hann var sonur Jóhönnu Lárusdóttur og Árna sem hlaut sitt uppeldi hjá Árna Einarssyni og konu hans á Vilborgarstöðum. Hann var dóttursonur hreppstjórahjónanna Lárusar Jónssonar og Kristínar Gísladóttur. Árið 1901 byggðu foreldrar hans íbúðarhús við Kirkjuveg sem ber nafnið Grund. Árni kvæntist Katrínu Árnadóttur árið 1926. Hún var dóttir Árna Filippussonar í Ásgarði. Þau eignuðust eina dóttur, Hildu.
Sjö ára fór hann fyrst út í eyju að veiða lunda. Var það út í Álsey með föður sínum. Árni var alla tíð frá því mikill veiðimaður. Tólf ára fór hann sinn fyrsta og eina fiskitúr. Það var á bát Sigurðs í Vegg. Lenti þeir í hremmingum við stórfiskinn Létti en fór þó allt vel. Ekki fór Árni aftur á sjóinn en Guðmundur á Borg sagði að hann hefði ekki sjómannshendi eftir að Árni færði Guðmundi maríufiskinn sinn.
Á veturna gekk Árni í barnaskólann frá 10-14 ára aldri og var hann góður námsmaður. Lauk hann fullnaðarprófi barnafræðslunnar í febrúar 1915 með einkunnina 7,19 en þá var hæst gefið 8. Árið 1919 hóf Árni störf sem símritari hjá Landssíma Íslands og hætti árið 1961 vegna veikinda.
Árni kom í verk að skrá mikinn sögulegan fróðleik síðustu æviár sín. Hann skrifaði meðal annars margar greinar um sögu Leikfélagsins í Vestmannaeyjum. Hann var auk þess í knattspyrnuliðinu sem Eyjamenn sendu til Reykjavíkur árið 1920 til þess að keppa við Val. Sá kappleikur vakti mikla athygli fyrir leikni ungu Eyjamannanna sem voru að keppa við þrautþjálfað lið Vals. Árni stundaði auk þess spjótkast og spretthlaup. Hann keppti á Þjóðhátíð og til að mynda vann hann spjótkastið árið 1922 og kastaði spjótinu 39,10 m. Hann var í veiðifélagi Álseyjar. Árni spilaði á harmonikku með Lúðrasveit Vestmannaeyja og þótti góður. Vestmannaeyjabær keypti ritsafn hans og er það varðveitt á Skjalasafni Vestmannaeyja.
Heimildir
- Árni Árnason. Tólf ára háseti. Heima er best. 1960.
- Eyjólfur Gíslason. Minning um Árna Árnason. Sjómannadagsblað Vestmannaeyja. 1963.
Frekari umfjöllun
Árni Árnason yngri frá Grund, fæddist 19. mars 1901 og lést 13. október 1962.
Foreldrar hans voru Árni Árnason verkamaður á Grund, f. 14. júlí 1870, d. 19. janúar 1924, og kona hans Jóhanna Lárusdóttir frá Búastöðum, f. 23. september 1868, d. 8. desember 1953.
Kona Árna yngri frá Grund var Katrín Árnadóttir, f. 12. október 1905, d. 8. maí 1981.
Barn Árna og Katrínar var:
1. Hilda Árnadóttir, f. 19. október 1926, d. 17. desember 2004, gift á Akureyri Herði prentara, f. 9. febrúar 1929, d. 9. september 2012, Svanbergs og fyrrverandi konu hans Aðalheiðar Jónsdóttur bónda í Einifelli.
2. Uppeldissonur Árna og Katrínar er Þórarinn Guðmundsson radíóvirki, f. 25. apríl 1929. Hann er sonur Guðmundar Árnasonar bróður Katrínar.
Úr fórum Árna Árnasonar símritara:
Bjargveiðimannatal.
Árni Árnason yngri er meðalmaður að hæð, ljóshærður og bláeygur, holdgrannur og smáger, léttur á velli og í lund, rjóður í andliti og ljós yfirlitum, snar í snúningum, lipur og líkamaléttur. Hann heldur sér vel í útliti nema hvað sjón er farin að daprast, svo að hann gengur með gleraugu að öllu jöfnu.
Hann hefir verið við veiðar síðan 1908 (frá 7 ára aldri) að mestu eða miklu leyti óslitið og verið í öllum úteyjunum nema Elliðaey. Hann þykir góður veiðimaður, þótt kraftamaður sé hann enginn. Hann hefir verið að veiðum í Suðurey, Álsey, Brandi, Bjarnarey og Heimakletti, velkunnugur veiðum á heimalandi og hvarvetna skilað sínum hlut. Hann hefir ávallt verið hlutgengur, veiðir daglega að sögn kunnugra, stilltur og gætinn og komið sér vel við félaga sína.
Hann þykir og afbragðs matreiðslumaður og afhaldinn af Álseyingum á því sviði.
Músikant er hann sjálflærður og hefir spilað mikið á fiðlu og harmoníku.
Hann var aðalhvatamaður að stofnun bjargveiðimannafélagsins og hefur verið formaður þess frá stofnun, ávallt endurkjörinn.
Hann hefur verið símritari síðan 1919 og er það enn, stundaði áður alls konar landvinnu.
Úr fórum Árna Árnasonar, efnisyfirlit
Heimildir
- Samantekt: Víglundur Þór Þorsteinsson.
- Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
- Garður.is
