Kristín Einarsdóttir (Heiðarvegi 26)

Kristín Einarsdóttir húsfreyja á Heiðarvegi 26 fæddist 29. apríl 1914 og lést 7. febrúar 1995.
Faðir hennar var Einar bóndi á Steinavöllum í Flókadal í Skagafirði, f. 23. október 1869, d. 26. desember 1941 á Siglufirði, Baldvinsson bónda lengst á Sjöundastöðum í Fljótum, mikils hagleiksmanns, spónasmiðs m.m., f. 7. febr. 1841 í Höfn í Fljótum, d. 31. des. 1909 í Sigríðarstaðakoti í Flókadal, Skag., Sveinssonar bónda í Höfn í Fljótum 1845, f. 24. ágúst 1792 á Siglunesi, d. 2. maí 1855 á Bjarnargili í Fljótum, Sveinssonar, og konu Sveins Sveinssonar, (7. október 1816) Halldóru húsfreyju, f. 2. ágúst 1797 í Skarðdal í Siglufirði, d. 25. maí 1878 á Illugastöðum í Fljótum, Torfadóttur.
Móðir Einars á Steinavöllum og kona Baldvins (1863) var Björg húsfreyja, f. 27. september 1836, d. 1904 á Sigríðarstöðum, Einarsdóttir bónda, lengst og síðast í Garðakoti í Hjaltadal, f. um 1797 á Hrappsstöðum í Hólasókn, d. 1863 í Garðakoti, Guðbrandssonar, og konu Einars í Garðakoti, Þórdísar húsfreyju, f. um 1800 í Hofssókn í Skagafirði, d. 1855 í Garðakoti, Bjarnadóttur.

Móðir Kristínar og kona Einars á Steinavöllum var Anna Sigurbjörg húsfreyja á Steinavöllum, f. 30. ágúst 1872, d. 29. júlí 1918, Jónsdóttir bónda á Steinavöllum og á Ljótsstöðum í Hofssókn, f. 1835 á Þrándarstöðum á Höfðaströnd, d. 1899 á Steinavöllum, Stefánssonar bónda víða í Skagafirði, en síðast bónda og ekkjumanns í Garðshorni 1845, f. 1810 í Stóru-Brekku á Höfðaströnd, d. 1866 á Miklabæ, Jónssonar, og barnsmóður Stefáns, Sigurbjargar, síðar húsfreyju í Hornbrekku á Höfðaströnd, f. 1802, d. 1887, Ólafsdóttur .
Móðir Önnu Sigurbjargar húsfreyju á Steinavöllum og kona (1857) Jóns bónda Stefánssonar var Guðrún húsfreyja, f. 12. október 1835 á Bjarnastöðum í Unadal í Skagafirði, d. 1910 í Nesi í Flókadal, Sigmundsdóttir bónda á Bjarnastöðum í Unadal, f. 31. júlí 1795 á Hamri í Hegranesi, d. 14. maí 1858 á Bjarnastöðum, Jónssonar, og konu Sigmundar, Þuríðar húsfreyju, f. um 1794, d. 11. júní 1838, Erlendsdóttur bónda á Vatni á Höfðaströnd Jónssonar.

Systir Kristínar Einarsdóttur í Eyjum var Stefanía Einarsdóttir, f. 19. janúar 1904 að Steinavöllum, d. 22. september 1982, síðast búsett á Hrafnistu í Hafnarfirði, kona Guðmundar Vigfússonar skipstjóra frá Holti, en dóttir þeirra var Erla Guðmundsdóttir kona Stefáns Vigfúsar Þorsteinssonar Víglundssonar rafvirkjameistara í Hafnarfirði.

Maður Kristínar var Bjarni Bjarnason rakari frá Hoffelli, fæddur 12. maí 1916, dáinn 26. desember 1998.
Kristín veiktist af berklum og þurfti að dvelja á Vífilsstöðum. Líf hennar var markað afleiðingum þeirra veikinda. Fjölskyldan leystist upp um skeið, en gat sameinast aftur. Þó var Guðbjörg Helga áfram hjá móðursystur sinni Guðbjörgu Einarsdóttur húsfreyju í Hafnarfirði og manni hennar Helga Þórarinssyni.

Börn Bjarna og Kristínar:
1. Jónína öryrki, fædd 9. janúar 1942, búsett að Hátúni í Reykjavík.
2. Anna Erna húsfreyja og starfsmaður Íslensk ameríska verslunarfélagsins, fædd 16. apríl 1943, dáin 3. febrúar 1996, gift Magnúsi Karlssyni vélvirkja og tollverði.
3. Bjarni sjómaður, fæddur 20. nóvember 1946, dáinn 19. ágúst 1966.
4. Guðbjörg Helga húsfreyja og hjúkrunarfræðingur, fædd 2. maí 1948, gift Hjalta Jóhannssyni tæknifræðingi í Hafnarfirði.
5. Einar Bjarnason frystihússeigandi í Eyjum, f. 8. ágúst 1956, kvæntur Ester Ólafsdóttur Runólfssonar.

---

Heimildir

• Samantekt: Víglundur Þór Þorsteinsson.
• Skagfirskar æviskrár – Tímabilið 1850-1890. Margir höfundar, en aðalhöfundur: Guðmundur Sigurður Jóhannsson. Umsjón og ritstjórn: Hjalti Pálsson frá Hofi. Sögufélag Skagfirðinga, Sauðárkróki 1981-1999.
• Guðbjörg Helga Bjarnadóttir.
• Manntöl.
• Íslendingabók.is.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---