Júlíana Sigurðardóttir (Búastöðum)

Júlíana Guðríður Ingveldur Sigurðardóttir húsfreyja á Vestri-Búastöðum fæddist 19. júlí 1886 og lést 29. október 1976.

Júlíana Sigurðardóttir og Pétur Lárusson.

Foreldrar hennar voru Sigurður, snikkari í Nýborg, f. 28. júlí 1841 að Rauðafelli undir Eyjafjöllum, d. 11. maí 1929, Sveinsson, og barnsmóðir hans Sigríður Sighvatsdóttir frá Vilborgarstöðum, þá ráðskona í Nýborg, f. 1864, síðar kona Jóns bónda Eyjólfssonar á Kirkjubæ, sem drukknaði 20. maí 1901.
Þau Júlíana og Loftur Jónsson á Vilborgarstöðum voru hálfsystkini, — af sömu móður. Einnig var Jónína Steinunn Sigurðardóttir húsfreyja á Háeyri, kona Guðmundar Jónssonar, hálfsystir Júlíönu, - af sama föður
Júlíana ólst í fyrstu upp hjá Þórönnu Ingimundardóttur húsfreyju og ljósmóður og Sigurði föður sínum í Nýborg, en var síðan með móður sinni og fjölskyldu á Kirkjubæ meðan móður hennar naut við. 1910 var hún komin að Búastöðum og bjó þar með Pétri og Kristínu móður hans. Júlíana og Pétur bjuggu allan sinn búskap að Búastöðum. Síðustu árin dvaldi hún á Elliheimilinu.
Maður Júlíönu var Jóhann Pétur Lárusson verslunarmaður á Vestri- Búastöðum, f. 16. desember 1876, d. 18. október 1953.
Júlíana og Pétur voru barnlaus. Hjá þeim bjó Lárus Árnason bifreiðarstjóri, í fyrstu í uppeldi ömmu sinnar, Kristínar.

---

Heimildir

• Samantekt: Víglundur Þór Þorsteinsson.
• Manntöl.
• Íslendingabók.is.
• Garður.is.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---