Sigurður Ögmundsson (Brekkuhúsi)

Sigurður Ögmundsson bóndi á Bryggjum í A-Landeyjum, síðar í Brekkuhúsi, fæddist 28. mars 1834 í Miðeyjarhólmi í A-Landeyjum og fluttist til Vesturheims 1905.
Faðir hans var Ögmundur bóndi í Litla-Rimakoti í Þykkvabæ í Holtum, f. 10. maí 1806, d. 15. febrúar 1876, Guðmundsson bónda í Káragerði í V-Landeyjum og Hárlaugsstöðum í Holtum, skírður 25. júlí 1765, d. 11. maí 1846, Ögmundssonar bónda í Tungu á Rangárvöllum, f. 1722, d. í október 1772, Sigurðssonar.
Móðir Ögmundar í Litla-Rimakoti og barnsmóðir Guðmundar í Káragerði var Níelsína Friðrika Níelsdóttir, síðar húsfreyja í Miðeyjarhólmi, f. 1785 á Eyrarbakka.

Móðir Sigurðar í Brekkuhúsi og kona Ögmundar var Valgerður húsfreyja, f. 10. júlí 1804, d. 1. febrúar 1887, Ólafsdóttir bónda í Seli í Holtum, f. 24. apríl 1769, d. 14. nóvember 1827, Jónssonar bónda á Ægissíðu í Holtum, f. 1731, á lífi 1769, Þorsteinssonar, og konu Jóns á Ægissíðu, Guðrúnar húsfreyju, f. um 1742, Brandsdóttur.
Móðir Valgerðar í Litla-Rimakoti og kona Ólafs bónda í Seli var Ingveldur húsfreyja, f. 1779, d. 27. október 1867, Ísleifsdóttir bónda á Ásmundarstöðum í Holtum, f. 1756, d. 2. ágúst 1839, Hafliðasonar og fyrri konu hans, Halldóru húsfreyju, f. 1742, d. 31. desember 1814, Einarsdóttur.

Sigurður var albróðir Guðmundar Ögmundssonar vitavarðar og járnsmiðs í Batavíu.

Sigurður var eins árs með foreldrum sínum, vinnufólki, á Krossi í A-Landeyjum 1835, 7 ára með þeim, vinnufólki, á Snotru í Holtum 1840.
Hann var 12 ára með húsfólkinu foreldrum sínum í Litla-Rimakoti í Holtum 1845, 16 ára með bændahjónunum foreldrum sínum í Stöðlakoti í Holtum 1850.
Við manntal 1855 var hann 23 ára vinnumaður á Bryggjum í A-Landeyjum hjá foreldrum Sigríðar Magnúsdóttur, og þar er hún 32 ára vinnukona.
Árið 1857 varð hann bóndi á Bryggjum og var þar, uns þau hjón fluttust til Eyja 1879.
Í Brekkuhúsi bjuggu þau Sigríður meðan henni entist líf, en hún lést 1894.
Hann bjó ekkill hjá Guðlaugi bónda, syni sínum, í Brekkuhúsi 1901.
Sigurður fór til Vesturheims 1905, ásamt Guðlaugi og fjölskyldu hans, konu Guðlaugs og þrem börnum þeirra.

Kona Sigurðar Ögmundssonar, (25. júní 1855), var Sigríður Magnúsdóttir húsfreyja á Bryggjum og í Brekkuhúsi, f. 12. júní 1824, d. 5. september 1894.
Börn þeirra í Eyjum:
1. Guðrún Sigurðardóttir, f. 28. júní 1860, d. 6. desember 1883, ógift.
2. Valgerður Sigurðardóttir húsfreyja í Jakobshúsi, f. 10. nóvember 1862, d. 21. nóvember 1906, fyrri kona Jakobs Tranberg.
3. Guðlaugur Sigurðsson bóndi og sjómaður í Brekkuhúsi, síðar í Vesturheimi, f. 6. október 1864, kvæntur Margréti Árnadóttur.
4. Guðrún Sigurðardóttir húsfreyja í Sandhól á Reykjanesi syðra, f. 23. janúar 1866, d. 6. apríl 1937.
Önnur börn þeirra Sigríðar:
5. Magnús Sigurðsson bóndi á Heylæk, f. 1858.
Barn Sigurðar með Margréti Ögmundsdóttur, síðar húsfreyju á Miðbælisbökkum, f. 1834:
6. Benedikt Sigurðsson, f. 1859, d. 1859.
Barn Sigurðar með Önnu Salómonsdóttur, síðar húsfreyju á Minni-Borg, f. 1840:
7. Salvör Sigurðardóttir húsfreyja á Stóra-Moshvoli í Hvolhreppi, f. 1859.

---

Heimildir

• Samantekt: Víglundur Þór Þorsteinsson.
• Íslendingabók.is.
• Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
• Manntöl.
• Prestþjónustubækur.
• Rangvellingabók. Valgeir Sigurðsson. Rangárvallahreppur, Hellu 1982.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---