Guðlaug Ólafsdóttir (Fagurhól)

Guðlaug Ólafsdóttir húsfreyja í Fagurhól fæddist 3. júní 1889 í Skarðshlíð u. Eyjafjöllum og lést 27. október 1970 í Reykjavík.
Faðir hennar var Ólafur bóndi í Skarðshlíð, f. 23. janúar 1865, d. 14. júní 1927, Jónsson bónda á Lambafelli u. Eyjafjöllum 1870, f. 3. maí 1837 í Heiðarseli á Síðu, d. 31. júlí 1908 á Lambafelli, Jónssonar bónda í Heiðarseli á Síðu, f. 13. janúar 1802 í Arnardrangi í Landbroti, d. 16. október 1863 í Heiðarseli, Jónssonar, og konu Jóns í Heiðarseli, Ólafar húsfreyju, f. 13. mars 1802 í Heiðarseli á Síðu, d. 22. febrúar 1865 þar, Sveinsdóttur.
Móðir Ólafs í Skarðshlíð og kona Jóns á Lambafelli var Guðný húsfreyja, f. 25. nóvember 1835 í Lambafellssókn, d. 29. maí 1914, Vigfúsdóttir bónda í Efri-Mörk á Síðu, f. 18. janúar 1807 í Hlíð u. Eyjafjöllum, d. 30. maí 1866 í Efri-Mörk, Jónssonar, og konu Vigfúsar, Sigríðar húsfreyju, f. 28. apríl 1807 á Lambafelli, d. 18. apríl 1878 í Efri-Mörk, Árnadóttur.

Móðir Guðlaugar í Fagurhól og kona Ólafs í Skarðshlíð var Anna húsfreyja, f. 22. desember 1859, d. 13. janúar 1932, Skæringsdóttir bónda í Skarðshlíð, f. 1830, Árnasonar bónda í Drangshlíð 1835, f. 1800, Brandssonar, og konu Árna, Önnu húsfreyju, f. 1798, d. 17. ágúst 1868, Ólafsdóttur.
Móðir Önnu Skæringsdóttur og kona Skærings var Guðlaug húsfreyja, f. 2. janúar 1821, d. 3. september 1886, Eiríksdóttir bónda í Litla-Klofa og á Borg á Landi, f. 1766, d. 1. mars 1828, Gíslasonar, og þriðju konu Eiríks, Steinvarar húsfreyju, f. 10. mars 1792, d. 26. júlí 1863, Jónsdóttur.

Börn Önnu Skæringsdóttur og Ólafs Jónssonar í Eyjum:
1. Guðlaug Ólafsdóttir húsfreyja í Fagurhól f. 3. júní 1889, d. 27. október 1970.
2. Skæringur Ólafsson bóndi í Skarðshlíð, f. 7. desember 1890, d. 28. júlí 1984.
3. Jón Ólafsson útgerðarmaður á Hólmi, f. 7. mars 1892, d. 21. desember 1946.
Móðurfaðir þeirra, Skæringur Árnason, var ættfaðir fjölda Eyjafólks.

Guðlaug var með foreldrum sínum til fullorðinsára. Hún fluttist til Eyja og giftist Markúsi 1913. Þau leigðu á Skaftafelli á því ári, bjuggu á Brekku 1914-1915, voru komin að Fagurhól 1916 og bjuggu þar síðan, uns þau fluttust til Reykjavíkur 1947 og bjuggu þar síðast á Vífilsgötu 2. Guðlaug lést 1970 og Markús 1980.

Maður Guðlaugar, (26. desember 1913), var Markús Sæmundsson sjómaður, verkamaður og útvegsmaður, f. 27. desember 1885 í Nikulásarhúsi í Fljótshlíð, d. 5. apríl 1980 í Reykjavík.
Börn þeirra voru:
1. Guðný Svava Markúsdóttir húsfreyja, f. 14. september 1914 á Skaftafelli, d. 9. febrúar 1941.
2. Ólafur Jón Markússon sjómaður, f. 5. júní 1916 í Fagurhól, fórst 6. febrúar 1938.
3. Ásta Markúsdóttir, f. 26. ágúst 1919, d. 14. janúar 1923.
4. Ástþór Sveinn Markússon sjómaður, forstöðumaður, f. 18. desember 1923, d. 14. júlí 2011.
5. Viktor Markússon, f. 2. febrúar 1930, d. 26. nóvember 1930.

---

Heimildir

• Samantekt: Víglundur Þór Þorsteinsson.
• Íslendingabók.is.
• Manntöl
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---