Ásgeir Sigurvinsson

Ásgeir á æfingu í Stuttgart árið 1984.

Ásgeir Sigurvinsson fæddist í Vestmannaeyjum þann 8. maí árið 1955. Hann á að baki 45 landsleiki og fimm mörk. Ásgeir á einnig að baki að minnsta kosti 232 leiki með ÍBV. (21), Standard Liege, Stuttgart og Bayern München (211). Einnig þjálfaði hann eitt sumarið Fram og starfaði sem landsliðsþjálfari til ársins 2005.

Yngri árin

Um leið og Ásgeir gat þá var hann kominn með bolta við fæturnar. Hann lék sér með boltann ásamt bróður sínum Ólafi Sigurvinssyni og var oft erfitt að fá þá til að koma inn á réttum tíma. Þriðji bróðirinn, Andrés Sigurvinsson, hafði hins vegar engan áhuga á fótbolta og sneri hann sér að leiklist. Ásgeir gekk snemma til liðs við strákafélagið Vísi. Um leið og hann gat gekk hann til liðs við Knattspyrnufélagið Tý og kynntist þar Adolfi Óskarssyni sem ýtti mjög undir íþróttaáhuga Ásgeirs. Knattspyrnuhæfileikar Ásgeirs komu fljótt í ljós og þegar hann var aðeins 17 ára bauð Skotinn Hal Stewart, framkvæmdastjóri Morton í Skotlandi, Ásgeiri til æfinga með liðinu. Ásgeir var fyrst lítið spenntur fyrir þessu en um haustið þáði hann boðið. Þegar allt var tilbúið og hann var kominn með farseðilinn, kom rautt ljós frá KSÍ, svo draumurinn var búinn í bili. En svo kom í ljós að aðeins hafði verið greitt fyrir aðra leiðina fyrir Ásgeir og þótti það frekar ótraustvekjandi. En þá kom Albert Guðmundsson til hjálpar og útvegaði Ásgeiri boð um að koma á æfingar með úrvalsdeildarliðinu „Glasgow Rangers“ í Skotlandi. Reyndist dvölin vera erfið og leiðinleg.

Þegar eldgosið byrjaði leit allt út fyrir að knattspyrnulið ÍBV myndi leysast upp. En ÍBV hélt áfram og var með heimavöll í Njarðvík.

Það var svo þann 23. júlí 1973 að líf Ásgeirs breyttist en hann skrifaði undir samning við Standard Liege frá Belgíu.

Frekari umfjöllun

Ásgeir Sigurvinsson, knattspyrnumaður fæddist 8. maí 1955 í Eyjum.
Foreldrar hans voru Sigurvin Þorkelsson, sjómaður, verkamaður, f. 21. desember 1922 á Hellissandi, d. 29. desember 1973, og kona hans Vilborg Ingibjörg Andrésdóttir frá Snotrunesi á Borgarfirði eystra, húsfreyja, f. 4. september 1924, d. 13. ágúst 2009.

Börn Vilborgar og Sigurvins:
1. Andrés Bjarni Sigurvinsson kennari, bæjarfulltrúi, leikstjóri, framkvæmdastjóri, f. 17. júní 1949 í Snotrunesi í Borgarfirði eystra. Fyrrum kona hans Lovísa Matthíasdóttir. Kona hans Rebekka Sigríður Friðgeirsdóttir.
2. Ólafur Þór Sigurvinsson knattspyrnumaður, f. 8. apríl 1951 í Snotrunesi. Kona hans Margrét Þóra Guðmundsdóttir.
3. Ásgeir Sigurvinsson knattspyrnumaður, f. 8. maí 1955 í Eyjum. Kona hans Ásta Vilhelmína Guðmundsdóttir.

Þau Ásta Vilhelmína giftu sig, eignuðust tvö börn. Þau bjuggu í Stuttgart í Þýskalandi, síðar í Rvk.

1. Kona Ásgeirs er Ásta Vilhelmína Guðmundsdóttir, húsfreyja, f. 6. júní 1963. Foreldrar hennar Guðmundur Jónatan Kristjánsson, málarameistari, f. 2. ágúst 1929 á Eyrarbakka, d. 17. desember 2010, og Jóna Laufey Hallgrímsdóttir, f. 6. mars 1920 í Sætúni, d. 24. febrúar 2011.
Börn þeirra:
2. Tanja Rut Ásgeirsdóttir, f. 7. mars 1983 í Stuttgart.
3. Ásgeir Aron Ásgeirsson, f. 12. júní 1986.

---

Heimildir

• Samantekt: Víglundur Þór Þorsteinsson.
• Heimaslóð.
• Íslendingabók.
• Íslenskir málarar - Saga og málaratal. Kristján Guðlaugsson. Málarameistarafélag Reykjavíkur 1982.
• Valdaætt. Niðjatal Valda Ketilssonar bónda á Sauðhúsvöllum undir Eyjafjöllum og k.h. Katrínar Þórðardóttur. Magnea Árnadóttir. Handrit 1992.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---