Stefán Runólfsson (Búðarfelli)

Helga og Stefán.

Stefán Guðlaugur Runólfsson framkvæmdastjóri frá Búðarfelli fæddist 10. september 1933 á Búðarfelli.

Ætt og uppruni

Foreldrar Stefáns voru Runólfur Runólfsson verkamaður á Búðarfelli, f. 29. maí 1892, d. 16. janúar 1979, og kona hans Guðný Petra Guðmundsdóttir húsfreyja, f. 28. febrúar 1901, d. 30. desember 1976.

Bræður Stefáns voru
1. Einar Guðmundur Ólafsson vélstjóri, síðar húsvörður í Hafnarfirði, f. 13. mars 1921, d. 2. desember 1984. Hann var hálfbróðir Stefáns, sammæddur.
2. Ólafur Helgi Runólfsson húsasmiður, matsveinn, framkvæmdastjóri, síðar húsvörður í Reykjavík, f. 2. janúar 1932, d. 7. desember 2009.

Stefán.

Stefán á mynd Sigmunds.

Starfsferill

Stefán lauk gagnfræðaprófi í Vestmannaeyjum 1950.
Hann hóf fullt starf í Hraðfrystistöðinni hjá Einari Sigurðssyni að því loknu, en hafði unnið þar á sumrum og í leyfum áður.
Hann varð verkstjóri þar 16 ára og yfirverkstjóri 19 ára og til ársins 1962, er hann tók að sér framkvæmdastjórastörf fyrir Einar í Hraðfrystistöð Keflavíkur. Því starfi gegndi hann til ársins 1963, er hann tók að sér yfirverkstjórn í Fiskiðjunni h.f. og gegndi því starfi 1964-1974.
Þá var hann ráðinn framkvæmdastjóri Vinnslustöðvarinnar h.f. og þjónaði 1974 til 1988.
Hann varð þá framkvæmdastjóri Hraðfrystihúss Stokkseyrar 1988-1992.
Hann lauk starfsferli sínum hjá Frumherja sem skoðunarmaður sjávarafurða og ráðgjafi.

Félagsmál

Stefán var valinn í stjórn Sölusambands íslenskra fiskframleiðenda (SÍF), Samlags skreiðarframleiðenda, Umbúðamiðstöðvarinnar, Félags síldarsaltenda á Suður- og Vesturlandi og var fulltrúi á fjölmörgum þingum Fiskifélags Íslands.
Þá sat Stefán í stjórn Íþróttafélagsins Þórs í mörg ár, var formaður ÍBV um árabil. Hann var formaður bygginganefndar Íþróttamiðstöðvarinnar í Eyjum.
Við stofnun Herjólfs h.f. var hann kjörinn í undirbúningsnefnd að byggingu Herjólfs og þar sat hann í stjórn.
Einnig var hann vara- og aðalbæjarfulltrúi fyrir Sjálfstæðisflokkinn í bæjarstjórn og fjölda nefnda á vegum bæjarins og formaður Sjálfstæðisfélags Vestmannaeyja í átta ár, en sat 15 ár í stjórn þess.
Hann var félagi í Oddfellowstúkunni Herjólfi í Eyjum og stofnfélagi stúkunnar Hásteins á Selfossi. Þá var hann félagi í Rotaryklúbbi Vestmannaeyja, sat í stjórn hans og var forseti um skeið.

Útgáfa

Árið 2008 gaf Bókaútgáfan Hólar út æviminningar Stefáns. Bókin STEBBI RUN – Annasamir dagar og ögurstundir. Bókin var rituð af Óskari Þór Karlssyni.
Í bókina er skráð nánast í smáatriðum saga fiskvinnslu í Vestmannaeyjum frá upphafi flökunar og frystingar 1938 til starfsloka Stefáns. Er hún mikilvægt innlegg í sögu útgerðar og fiskvinnslu í Eyjum, sem hefur aðeins verið rituð í köflum til þessa.
Jón Þ. Þór sagnfræðingur fjallar um bókina í DV í nóvember 2008 og ber henni mjög vel söguna sem stórfróðlegri og vel skrifaðri sögu.

Viðurkenningar

1. Heiðraður af Sjómannadagsráði Vestmannaeyja fyrir björgun tveggja barna úr sjó.
2. Gullmerki Þórs.
3. Gullmerki ÍSÍ.
4. Gullkross ÍSÍ.
5. Kjörinn heiðursfélagi ÍSÍ.
6. Gullmerki KSÍ.
7. Gullkross ÍBV.
8. Riddarakross hinnar íslensku fálkaorðu fyrir störf að félags- og sjávarútvegsmálum.
9. Kjörinn heiðursfélagi ÍSÍ.

Fjölskylda

Kona Stefáns, (19. nóvember 1966), er Helga Víglundsdóttir húsfreyja, f. 15. ágúst 1944.
Börn þeirra eru:
1. Sóley Stefánsdóttir fyrsta lögreglukona í Eyjum, húsfreyja, uppeldisfræðingur, kennari, f. 13. ágúst 1967. Maður hennar er Þorsteinn Kristvinsson rafeindavirki og framkvæmdastjóri.
2. Smári Stefánsson skrifstofustjóri, f. 21. júní 1970. Kona hans er Guðrún Jóna Sæmundsdóttir húsfreyja, skrifstofukona.
3. Guðný Stefanía Stefánsdóttir íþróttafræðingur, kennari á Ísafirði, f. 12. september 1976. Maður hennar er Jón Hálfdán Pétursson íþróttafræðingur og kennari.

---

Heimildir

• Samantekt: Víglundur Þór Þorsteinsson.
• DV 2008.
• Morgunblaðið 10. september 2013.
• Stebbi Run – Annasamir dagar og ögurstundir. Óskar Þór Karlsson. Bókaútgáfan Hólar 2008.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---