Pálmi Guðmundsson (Stíghúsi)
Pálmi Guðmundsson kennari og sjómaður í Stíghúsi fæddist 31. ágúst 1866 í Burðarholti í Ásahreppi í Rang. og drukknaði 20. maí 1901.
Foreldrar hans voru Guðmundur Benediktsson bóndi, f. 11. september 1828 í Búð í Þykkvabæ, d. 12. apríl 1879, og kona hans Ragnhildur Sigurðardóttir húsfreyja, f. 17. júlí 1827 í Saurbæ í Holtum, d. 7. janúar 1898 á Háfshóli þar.
Pálmi var niðursetningur og ólst upp í Stóra-Rimakoti í Holtum hjá Magnúsi Andréssyni bónda og Jórunni Pétursdóttur húsfreyju, en hún var hálfsystir föður hans. Hann var vinnumaður þar 1890.
Hann var kennari í Þykkvabæ 1891-1892, í A-Landeyjum 1892-1893 og 1895-1897. Einnig kenndi hann börnum í Eyjum.
Hann fluttist til Eyja 1893 og kvæntist Guðbjörgu í nóvember á því ári.
Þau bjuggu í París, sem þau nefndu síðar Stíghús. Þar stóð fyrr Sæmundarhjallur.
Þau eignuðust Jóhann Pétur 1895.
Í Eyjum stundaði Pálmi einnig sjómennsku.
Hann drukknaði í fiskiróðri nálægt Bjarnarey 20. maí 1901. Með honum fórust
1. Jón Eyjólfsson bóndi á Kirkjubæ
2. Magnús Guðlaugsson í Fagurlyst
3. Árni Jónsson húsmaður í Stíghúsi
4. Hreinn Þórðarson í Uppsölum.
5. Eyjólfur Guðmundsson frá Kirkjulandi í A-Landeyjum.
Jón Eyjólfsson var kvæntur Sigríði Sighvatsdóttur hálfsystur Guðbjargar konu Pálma.
Kona Pálma, (2. nóvember 1893), var Guðbjörg Sighvatsdóttir húsfreyja í Stíghúsi, f. 22. desember 1865, d. 29. apríl 1951.
Barn þeirra var
1. Jóhann Pétur Pálmason sjómaður, múrari, síðar í Reykjavík, f. 4. mars 1895, d. 7. janúar 1988. Þau Ólafía voru m.a. foreldrar Inga R. Jóhannssonar skákmeistara.
Heimildir
- Samantekt: Víglundur Þór Þorsteinsson.
- Íslendingabók.is.
- Holtamannabók II – Ásahreppur. Valgeir Sigurðsson og fleiri. Ritstjórn: Ragnar Böðvarsson. Ásahreppur 2007.
- Holtamannabók III –Djúpárhreppur. Valgeir Sigurðsson og fleiri. Ritstjórn: Ragnar Böðvarsson. Rangárþing ytra 2010.
- Kennaratal á Íslandi. Ólafur Þ. Kristjánsson og fleiri. Prentsmiðjan Oddi 1958-1988.
- Manntöl.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.