Magnús Kristjánsson mormóni

Úr Heimaslóð, Sögusetri Vestmannaeyja
Fara í flakk Fara í leit

Magnús Kristjánsson járnsmiður og mormóni fæddist 1844.
Foreldrar hans voru Kristján Kristjánsson bóndi á Rauðarhóli í Flóa, f. 20. maí 1817, d. 21. júlí 1867, og fyrri kona hans Katrín Magnúsdóttir húsfreyja, f. 1819, d. 1847.

Magnús var tveggja ára með foreldrum sínum á Rauðarhóli 1845, var með föður sínum og stjúpu á Syðsta-Kekki þar 1850.
Hann var vinnumaður á Ásgautsstöðum þar 1860, var á Tjörnum u. Eyjafjöllum 1870, 26 ára.
Magnús fluttust að Gerði frá Tjörnum u. Eyjafjöllum 1872 og var vinnumaður þar 1872.
Við húsvitjun prests 1873 voru Magnús Kristjánsson og Þuríður Sigurðardóttir á Oddsstöðum, Magnús skráður vinnumaður, hún „ekkja-vinnukona“.
Magnús og Þuríður skírðust til mormónasiðar undir handleiðslu Lofts Jónssonar í Þorlaugargerði.
Loftur gifti þau síðan.
Það var talin ólögleg vígsla. Yfirvöldin töldu þau búa saman óvígð, en það var óleyfilegt samkvæmt gildandi lögum.
Þau óskuðu þá eftir lúterskri vígslu, en kirkjuleg yfirvöld töldu það óhæfu.
Málið endaði hjá danska kónginum, sem loks úrskurðaði, að þau fengju borgaralega giftingu. Hana framkvæmdi Aagaard sýslumaður 30. mars 1876. Þetta þótti mikill viðburður í Eyjum og er talin fyrsta borgaralega hjónavígslan á landinu.
(Sjá Saga séra Brynjólfs Jónssonar, V.).
Við sóknarmannatal 1874 voru þau Magnús húsfólk í Helgahjalli, skráð „gift að mormónasið“ og hjá þeim var Jóhanna Sigríður Árnadóttir frá Vilborgarstöðum léttakind.
1875 voru þau húsfólk á Löndum, skráð „gift að mormónasið“ og hjá þeim var Jóhanna Árnadóttir léttakind.
1876 voru þau húsfólk í Dölum, Þuríður skráð „kona hans“, Jóhanna Sigríður léttastúlka.
1877 var heimili hið sama.
1878 var sama stand, en Jóhanna skráð fósturbarn.
Þau Magnús fluttust frá Dölum til Eyrarbakka 1879 ásamt fósturdóttur sinni Jóhönnu Sigríði Árnadóttur frá Vilborgarstöðum, síðar í Utah.
Þau bjuggu síðan í Útgörðum (Ölhóli) í Stokkseyrarhreppi, þurrabúð þar.

Kona Magnúsar, (30. mars 1876), var Þuríður Sigurðardóttir húsfreyja, f. 23. september 1821, d. 8. mars 1910.
Fósturbarn þeirra var
2. Jóhanna Sigríður Árnadóttir frá Vilborgarstöðum, síðar í Utah, f. 9. júlí 1864, d. 7. febrúar 1938. Hún fór til Utah 1883 frá Fagurlyst.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.