Ingiríður Einarsdóttir (Norðurgarði)
Ingiríður Einarsdóttir húsfreyja á Ketilsstöðum í Mýrdal, síðast í Norðurgarði, fæddist 2. nóvember 1832 í Fjósum í Mýrdal og lést 18. janúar 1913 í Norðurgarði.
Faðir hennar var Einar bóndi víða, en síðast á Ketilsstöðum, f. 1790 í Vindási í Hvolhreppi, d. 3. júní 1866 í Hryggjum í Mýrdal, Jónsson bónda á Brekkum í Hvolhreppi, f. 1762, d. 12. febrúar 1842, Þorbjörnssonar bónda í Ártúnakoti á Rangárvöllum, f. 1727, d. 15. september 1805, Brandssonar, og konu Þorbjörns, Guðrúnar húsfreyju, f. 1729, d. 11. júní 1803, Gunnarsdóttur.
Móðir Einars á Ketilsstöðum og kona Jóns Þorbjörnssonar var Vilborg húsfreyja, f. 1763, d. 14. febrúar 1843, Jónsdóttir bónda í Uppsölum í Hvolhreppi og á Lágafelli í A-Landeyjum, f. 1736, Guðbrandssonar, og konu Jóns Guðbrandssonar, Ingibjargar húsfreyju, f. 1735, d. 13. júní 1814, Pálsdóttur.
Móðir Ingiríðar og kona Einars á Ketilsstöðum var Salgerður húsfreyja, f. 1789 í Eyjum, d. 10. júní 1862 á Ketilsstöðum í Mýrdal, Bjarnadóttir bónda á Skíðbakka í A-Landeyjum, síðast í Hrúðurnesi í Leiru, Gull., f. 20. maí 1766 á Ljótarstöðum í A-Landeyjum, d. 25. júlí 1826 í Hrúðurnesi, Guðmundssonar bónda á Skíðbakka, f. 1725, d. 25. maí 1792, Þorleifssonar, og konu Guðmundar, Guðríðar húsfreyju, f. um 1730, d. 1784, Einarsdóttur.
Móðir Salgerðar og kona Bjarna var Guðrún húsfreyja, úr Eyjum, f. 1765, d. 10. júní 1836, Björnsdóttir.
Ingiríður var með foreldrum sínum í Mýrdal til um það bil 1855. Hún var gift kona á Giljum þar 1855-1859, húskona þar 1859-1860, húsfreyja þar 1860-1868, á Litlu-Hólum þar 1868-1871.
Hún missti Jón 1871, var vinnukona á Haugnum þar 1871/2-1875, í Nykhól þar 1875-1879. Þá fór hún að Kirkjulandshjáleigu í A-Landeyjum. Þar var hún vinnukona 1880.
1890 var Ingiríður komin til Eyja og var húskona í Helgahjalli á því ári. Hún fór til Vesturheims frá Ofanleiti 1892 á vit Bjarna sonar síns, kom aftur 1907 og var hjá Arngrími og Guðrúnu dóttur sinni á Kirkjubæ 1910, hafði þá alið 11 börn og misst 6 þeirra.
Maður Ingiríðar, (1852), var Jón Þorkelsson bóndi í Mýrdal, f. 1. mars 1830, d. 20. mars 1871, drukknaði í Dyrhólahöfn.
Börn Ingiríðar og Jóns, sem voru í Eyjum:
1. Vilborg Jónsdóttir húsfreyja á Kirkjubæ og í Hólshúsi, f.28. febrúar 1855, látin að líkum í Utah.
2. Einar Jónsson bóndi og sjómaður í Norðurgarði, f. 12. júní 1859, d. 8. ágúst 1937, kvæntur Árnýju Einarsdóttur.
3. Guðrún Jónsdóttir húsfreyja á Kirkjubæ, f. 27. mars 1862, d. 14. janúar 1939, kona Arngríms Sveinbjörnssonar.
4. Bjarni Jónsson í Norðurgarði, bóndi og málari í Utah, f. 19. apríl 1863.
5. Salgerður Jónsdóttir vinnukona á Kirkjubæ og í Hólshúsi f. 28. desember 1869 á Litlu-Hólum í Mýrdal.
Heimildir
- Samantekt: Víglundur Þór Þorsteinsson.
- Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
- Íslendingabók.is.
- Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
- Prestþjónustubækur.
- Rangvellingabók. Valgeir Sigurðsson. Rangárvallahreppur, Hellu 1982.
- Vestur-Skaftfellingar 1703-1966. Björn Magnússon. Leiftur 1970-1973.
Þessi grein tilheyrir Æviskrám Eyjafólks eftir Víglund Þór Þorsteinsson.