Hafsteinn Guðmundsson (forstjóri)

From Heimaslóð
Revision as of 13:23, 1 July 2023 by Viglundur (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search
Hafsteinn Guðmundsson.

Hafsteinn Guðmundsson frá Lambhaga, bókaútgefandi og prentsmiðjustjóri fæddist 7. apríl 1912 í Lambhaga og lést 1. september 1999.
Foreldrar hans voru Guðmundur Helgason formaður, vigtarmaður í Heiðardal, f. 5.febrúar 1884, d. 15. desember 1977, og kona hans Guðrún Kristjánsdóttir húsfreyja, f. 23. júní 1889, d. 8. júní 1960.

Systkini Hafsteins voru:
1. Ágúst Kristmann Guðmundsson prentari, prentsmiðjustjóri í Reykjavík, f. 26. ágúst 1913, d. 26. apríl 1980.
2. Ásta Guðbjörg Guðmundsdóttir hárgreiðslukona, skrifstofukona, vann við bókaútgáfu Helgafells, f. 18. desember 1915, d. 4. júlí 1999. Hún var ógift og barnlaus.
Hálfsystur hans, sammæddar, voru:
3. Aldinía Sólbjört Ágústsdóttir húsfreyja (nefnd Alda og Sólbjört), f. 13. mars 1919 á Ekru, d. 1985. Hún fluttist til Noregs.
4. Kristín Ágústsdóttir, f. 23. janúar 1925 í Hólmgarði, d. 1987. Hún fluttist til Svíþjóðar.
Hálfbróðir Hafsteins, samfeðra, var
5. Friðrik Guðmundsson verslunarmaður, f. 15. september 1906, d. 20. apríl 1988.

Hafsteinn var með foreldrum sínum fyrstu árin í Lambhaga og síðan í Fagurhól.
Foreldrar hans skildu og Hafsteinn fór í fóstur til Sigríðar föðursystur sinnar að Gularási í A-Landeyjum.
Hann fluttist til Reykjavíkur.
Hafsteinn lauk iðnnámi í prentsetningu frá Iðnskólanum í Reykjavík árið 1932, var í Fagskolen for Boghaandsværk í Kaupmannahöfn 1939 og lauk sveinsprófi 1940.
Hann vann við Prentsmiðju Guðjóns Ó. í Eyjum 1926, var setjari hjá Ísafoldarprentsmiðju 1929-1942, prentsmiðjustjóri hjá Hólaprenti 1942-1966.
Hann var forstjóri hjá Prenthúsi Hafsteins Guðmundssonar 1967-1973 og loks forstjóri og eigandi bókaútgáfunnar Þjóðsögu frá 1954-1993.
Hann var meðfram öðrum störfum kennari í fagteikningu í Iðnskólanum í Reykjavík 1940-1960 og stjórnarmaður í Félagi íslenskra prentsmiðjueigenda um tveggja áratuga skeið.
Formaður skólanefndar Prentskólans var hann 1950-1980.
Hann hlaut hvatningarverðlaun Vísindasjóðs fyrir útgáfu Þjóðsögu á verkinu Íslensk þjóðmenning, var sæmdur riddarakrossi hinnar íslensku fálkaorðu 1976 og var gerður að heiðursfélaga í Félagi íslenskra bókaútgefenda 1984 og varð heiðursfélagi í Svifflugfélaginu 1971.
Árið 1994 var hann gerður að heiðursdoktor við Háskóla Íslands.
Hafsteinn lést á Droplaugarstöðum í Reykjavík 1999.

Hafsteinn var tvíkvæntur.
I. Fyrri kona hans, (12. janúar 1935, skildu), var Ólafía Jóhannsdóttir húsfreyja, f. 1. mars. 1915, d. 20. september 1998. Foreldrar hennar Jóhann Torfi Steinsson vélstjóri í Reykjavík, og kona hans Ólafía Guðbjörg Ólafsdóttir húsfreyja.
Barn þeirra er
1. Dröfn Hafsteinsdóttir Farestveit hússtjórnarkennari, f. 27. júní 1941. Maður hennar er Arthur Knut Farestveit framkvæmdastjóri, f. 13. júlí 1941. Þau eiga 3 börn

II. Síðari kona Hafsteins, (21. september 1946), er Helga Phyllis Hobbs húsfreyja, f. 13. september 1919. Foreldrar hennar Clifford Hobbs kaupmaður og kona hans Jósefína Anonía Helgadóttir Zoega.
Börn þeirra:
2. Jósefína Helga Hafsteinsdóttir húsfreyja og bankastarfsmaður, f. 4. febrúar 1948, gift Alexander Jóhannessyni kennara. Þau eiga 2 börn.
3. Guðmundur Hafsteinsson tónskáld, f. 22. febrúar 1953, kvæntur Önnu Benassí tónlistarkennara. Þau eiga 4 börn.
4. Guðrún Hafsteinsdóttir húsfreyja og skólaritari, f. 31. maí 1955, gift Jóni Árna Þórissyni kennara og flugumferðarstjóra. Þau eiga 3 börn.
Sonur Helgu af fyrra hjónabandi og uppeldissonur Hafsteins er
5. Gunnar Kvaran sellóleikari, f. 16. janúar 1944, kvæntur Guðnýju Guðmundsdóttur konsertmeistara. Þau eiga eitt barn, barn hennar og kjörbarn Gunnars.


Heimildir

  • Íslendingabók.is.
  • Manntöl.
  • Morgunblaðið 10. september 1999. Minning.
  • Prestþjónustubækur.


Þessi grein tilheyrir Æviskrám Eyjafólks eftir Víglund Þór Þorsteinsson.