Friðrik Gíslason (Hlíðarhúsi)
Friðrik Gísli Gíslason var fæddur 11. maí 1870 í Hlíðarhúsi í Vestmannaeyjum og lést 15. janúar 1906 í Reykjavík. Hann var sonur Gísla Stefánssonar bónda og verzlunarmanns og konu hans Soffíu Lisbeth Andersdóttur frá Stakkagerði. Móðir hennar var Ásdís Jónsdóttir. Kona Friðriks var Anna Thomsen. Bróðir Friðriks var Jes.
Friðrik stundaði sjóróðra en var annars lærður ljósmyndari. Friðrik tók fyrstur manna ljósmyndir í Vestmannaeyjum. Hann var föðurbróðir Friðriks Jessonar safnvarðar í Vestmannaeyjum.
Friðrik var fimur, snarpur og fylginn sér og glímumaður ágætur. Hann kenndi um skeið glímu hjá Glímu- og sundfélagi Vestmannaeyja, sem stofnað var 7. nóvember 1894 með 16 félagsmönnum.
Friðrik lést í byrjun árs 1906, aðeins 35 ára gamall.
Heimildir
- Þorsteinn Víglundsson. Saga barnafræðslunnar í Vestmannaeyjum. Blik. 23. árg 1962.
Frekari umfjöllun
Friðrik Gísli Gíslason ljósmyndari frá Hlíðarhúsi fæddist 11. maí 1870 og lést 15. janúar 1906.
Foreldrar hans voru Gísl Stefánsson kaupmaður, f. 28. ágúst 1842 d. 25. september 1903, og kona hans Soffía Lisebeth Andersdóttir húsfreyja, f. 8. október 1847, d. 10. júní 1936.
Kona Friðriks var Anna Thomsen (Anna Jesdóttir Gíslason á mt. 1910), f. 9. maí 1871 í Eyjum, d. 3. maí 1937, hálfsystir Guðmundar Thomsen Jessonar á Litlu-Grund, f. 13. nóvember 1867, d. 19. apríl 1931.
Börn Friðriks og Önnu voru:
1. Jóhanna, f. 4. júlí 1895 í Reykjavík, d. 20. júní 1979, gift Daníel Kr. Oddssyni loftskeytamanni, er fórst á Reykjaborg af styrjaldaraðgerðum. Hann var um tíma símastjóri í Eyjum.
2. Olga, f. 14. júní 1898 í Reykjavík, d. 30. júlí 1944.
3. Soffía, f. 22. júlí 1900 í Reykjavík, d. 12. ágúst 1968.
Úr fórum Árna Árnasonar símritara:
Bjargveiðimannatal.
Friðrik var hinn mesti léttleikamaður, kátur og skemmtilegur. Hann var mikið við fuglaveiðar og telur Jón Jónsson frá Dölum, að hann hafi verið efni í góðan bjargveiðimann, en sneri sér að öðru.
Hann var alinn upp hjá foreldrum sínum að Hlíðarhúsum og tók mikinn og virkan þátt í nýtingu þeirra leigumála, er faðir hans nytjaði.
En Friðrik fór snemma héðan og gerðist ljósmyndasmiður í Reykjavík og víðar og þótti prýðisgóður sem slíkur. Sundkennari var hann hér með þeim fyrstu og kenndi mörgum unglingum sund.
Hafði einu sinni rétt sleppt sér, er hann fór á lærvað suður af „Skerinu“ sem venjulega var farið, ef sjór var dauður, um 15 faðma sig. Vildi ekki láta binda sig, en var ekki útbúinn að veiðimannasið, t.d. í fjallamannabuxum. Þótti víst minnkun í að láta binda sig, sem er þó siður nær ævinlega.
Úr fórum Árna Árnasonar, efnisyfirlit
Heimildir
- Samantekt: Víglundur Þór Þorsteinsson.
- Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
- Manntöl.
- Íslendingabók.is.