Kláus Eyjólfsson
Kláus Eyjólfsson lögsagnari, f. um 1584.
Hann var sonur Eyjólfs Egilssonar bónda í sunnanverðum Borgarfirði eða Kjós, en Eyjólfur var bróðir sr. Ólafs Egilssonar að Ofanleiti. Móðir Kláusar var Guðríður Þorsteinsdóttir lögréttumanns í Höfn í Melasveit í Borgarfirði Sighvatssonar og f.k. hans Ástu (Ástríðar) Eiríksdóttur. Guðríður var því systir sr. Jóns Þorsteinssonar píslarvotts á Kirkjubæ.
Kona Kláusar var Ingibjörg Þorleifsdóttir húsfreyja. Hún var dóttir Þorleifs eldri Ásmundssonar bónda á Voðmúlastöðum og Hólmum í Landeyjum og konu hans Kristínar Vigfúsdóttur.
Kláus hafði því mikil tengsl til Eyja.
Hann bjó á Hólmum a.m.k. 1630-1674.
Lögréttumaður var hann orðinn 1622 og sat á þingi til 1671. Hans er getið sem lögsagnara (umboðsmanns sýslumanns) í Eyjum árið 1635 og 1658.
Hann samdi ritgerð um Tyrkjaránið, en hún er elzta rit um þann atburð, samin í júlí 1627 og prentuð í Tyrkjaránssögu.
Börn þeirra Ingibjargar voru:
Sr. Árni prestur á Kirkjubæ;
sr. Þorleifur á Útskálum í Garði;
Vilborg húsfreyja að Ofanleiti, kona sr. Péturs Gissurarsonar.
Kláus lézt 1674, níræður að aldri.
Sigfús M. Johnsen sýslumaður samdi ritgerð um Kláus 1927.
Heimildir
- Sýslumannaæfir IV, bls. 527. Bogi Benediktsson.
- Lögréttumannatal, bls. 353. Einar Bjarnason.
- Íslenzkar æviskrár III, bls. 361. Páll Eggert Ólason.
- Borgfirzkar æviskrár XII, bls. 392. Ritstjóri Þuríður J. Kristjánsdóttir.
- Landeyingabók – Austur Landeyingar, víða. Valgeir Sigurðsson og fleiri.
- Annálar – Vallannáll við árið 1674.