Matthías Jónsson (klæðskeri)
Matthías Guðlaugur Jónsson klæðskeri fæddist 20. nóvember 1891 á Bólstað í Mýrdal og lést 25. janúar 1977.
Foreldrar hans voru Jón Gunnsteinsson bóndi, útvegsmaður og söðlasmiður í Dölum, f. 10. desember 1844, d. 19. júlí 1924, og síðari kona hans Þorgerður Hjálmarsdóttir húsfreyja, f. 4. júní 1855 að Ketilsstöðum Mýrdal, d. 2. mars 1939.
Matthías var með foreldrum sínum á Bólstað til 1904, fluttist með fjölskyldunni til Eyja og var með þeim í Dölum 1920.
Hann fór til Reykjavíkur og nam klæðskeraiðn, nam einnig og starfaði í Noregi. Hann var klæðskeri í Reykjavík 1930.
Matthías rak klæðskeraverkstæði í Oddfellowhúsinu við Heimagötu um áratugi.
Hann var kominn til Eyja 1940, leigði á Kanastöðum 1940 og eignaðist Guðgeir með Unni í desember, en hún leigði þá í Grafarholti.
Þau Unnur bjuggu á Sandi 1942 við fæðingu Þorgerðar, en þau misstu hana rúmlega 10 vikna gamla, bjuggu þar enn 1943 við fæðingu Þorsteins Pálmars.
Þau voru komin í Vinaminni, Urðavegi 5 1945 og bjuggu þar uns þau slitu samvistir um 1966. Matthías bjó hjá sonum sínum í Grænuhlíð 24 og Vestmannabraut 46 fram að Gosi, en dvaldi á Elliheimilinu í Hveragerði eftir gos og til æviloka.
Matthías lést 1977 og Unnur 2000.
I. Sambýliskona Matthíasar var Unnur Pálsdóttir húsfreyja, forstöðukonu, f. 3. mars 1911 á Borg í Njarðvík eystra, d. 12. maí 2000.
Börn þeirra:
1. Guðgeir Matthíasson verkamaður, sjómaður, listamaður, f. 14. desember 1940.
2. Þorgerður Matthíasdóttir, f. 28. febrúar 1942, d. 12. maí 1942.
3. Þorsteinn Pálmar Matthíasson Badermaður í Vinnslustöðinni, síðan saltfiskverkandi á Höfn í Hornafirði, f. 22. júlí 1943.
Heimildir
- Samantekt: Víglundur Þór Þorsteinsson.
- Íslendingabók.is.
- Manntöl.
- Prestþjónustubækur.
- Vestur-Skaftfellingar 1703-1966. Björn Magnússon. Leiftur 1970-1973.
Þessi grein tilheyrir Æviskrám Eyjafólks eftir Víglund Þór Þorsteinsson.