Rósa Eyjólfsdóttir (Norðurgarði)
Sjá aðgreiningarsíðuna fyrir aðra sem hafa borið nafnið „Rósa Eyjólfsdóttir“
Rósa Eyjólfsdóttir húfreyja í Norðurgarði fæddist 10. desember 1857 á Hellisfjörubökkum í Vopnafirði og lést 6. janúar 1907 í Norðurgarði.
Ætt og uppruni
Faðir Rósu var Eyjólfur frá Hraunfelli í Vopnafirði, bóndi í Leiðarhöfn þar 1855, á Bökkum (Hellisfjörubökkum) 1860, f. 24. september 1831, d. 19. mars 1863, Björnssonar bónda á Hraunfelli, f. 1773, d. 20. ágúst 1846, Péturssonar frá Reyðarfirði, f. 1715, d. 1778, Einarssonar og konu Péturs, Málfríðar húsfreyju, f. 1741, d. fyrir 1816, Ásmundsdóttur.
Móðir Eyjólfs á Bökkum og seinni kona Björns Péturssonar var Guðrún húsfreyja, f. 1800 á Kjólsstöðum í Möðrudalslandi, d. 17. júní 1866, Sveinsdóttir bónda á Kjólsstöðum og síðar á Einarsstöðum í Vopnafirði, Jónssonar, og konu Sveins, Guðrúnar yngri húsfreyju frá Vakursstöðum, Jónsdóttur.
Móðir Rósu og kona Eyjólfs var Anna Sigríður húsfreyja, f. 20. júní 1831, Grímsdóttir bónda í Leiðarhöfn í Vopnafirði („Álfa-Gríms“), f. 14. ágúst 1789, d. 26. mars 1833, Grímssonar. Hann er sagður „besti smiður og söngmaður“, f. 1789, d. 26. mars 1833, drukknaði út af Fúluvík í landi Strandhafnar í Vopnafirði, er hann sótti rekavið, „talinn besti sjómaður“.
Foreldrar Gríms Grímssonar í Leiðarhöfn voru Grímur bóndi í Strandhöfn og síðan í Leiðarhöfn, Jónsson, ættaður „vestan af landi“ Egilssonar og kona Gríms, Ingveldur húsfreyja, f. 1756, Jónsdóttir bónda í Strandhöfn, Guðmundssonar og konu Jóns, Elísabetar húsfreyju, f. 1725, Jónsdóttur bónda í Geitavík í Borgarfirði eystra og síðan í Strandhöfn í Vopnafirði, Árnasonar prests í Viðvík og síðan í Fagranessókn í Skagafirði og loks að Hofi á Skagaströnd, Jónssonar, og konu sr. Árna, Ingibjargar (Galdra-Imbu) Jónsdóttur prests á Tjörn í Svarfaðardal Gunnarssonar.
Móðir Önnu Sigríðar og seinni kona Gríms Grímssonar var Arndís húsfreyja frá Hofi í Fellum á Héraði, f. 1802, Hildibrandsdóttir bónda þar, f. 1779, d. 3. ágúst 1825, Einarssonar og barnsmóður Hildibrands, Guðrúnar frá Urriðavatni í Fellum, Guðmundsdóttur.
Lífsferill
Rósa ólst upp á Vakurstöðum í Vopnafirði og var þar vinnukona 1880. Hún var vinnukona að Eiríksstöðum í Seyðisfirði, er hún giftist. Þau Finnbogi giftust 26. september 1885 og fluttist hún með honum og tveim börnum þeirra, Birni Þórarni og Ágústi Kristjáni, til Eyja 1888. Hún var húsfreyja á annasömu heimili. Hún lézt að Norðurgarði 6. janúar 1907.
Börn þeirra Finnboga voru:
- Björn Þórarinn, f. 7. desember 1885, d. 4. apríl 1964.
- Ágúst Kristján, f. 1. ágúst 1887, d. 20. mars 1916.
- Stefán, f. 7. júlí 1889, d. 2. júní 1968.
- Finnbogi, f. 11. maí (20. í pr.þj.b.) 1891,d. 3. mars 1979.
- Árni Sigurjón, f. 16. desember (5. í pr.þj.bók) 1893, d. 22. júní 1992..
.
Heimildir
- Lára Halla Jóhannesdóttir frá Kirkjulundi vann rannsóknir á prestþjónustubókum, manntölum og ættartölum, en mest skrifaði hún eftir móður sinni Öldu Björnsdóttur fyrrum húsfreyju að Kirkjulundi, en Víglundur Þór Þorsteinsson skrifaði á Heimaslóð.
- Einar Jónsson. Ættir Austfirðinga. Reykjavík: Austfirðingafélagið í Reykjavík, 1953-1968.
- Manntöl.
- Íslendingabók.is
Þessi grein tilheyrir Æviskrám Eyjafólks eftir Víglund Þór Þorsteinsson.