Björgvin Einars Guðmundsson
Björgvin Einars Guðmundsson frá Hilmisgötu 1, málari í Keflavík fæddist 9. nóvember 1929 á Karlsbergi og lést 31. ágúst 2005 á hjúkrunarheimilinu Garðvangi í Garði.
Foreldrar hans voru Guðmundur Jónsson frá Miðkekki (síðar Svanavatn) á Stokkseyri, skósmiður, f. 23. apríl 1899, d. 16. janúar 1989, og kona hans Jóhanna Ólafsdóttir frá Hólnum, húsfreyja, f. 26. júlí 1895 á Arngeirsstöðum í Fljótshlíð, d. 27. júlí 1984.
Börn Jóhönnu og Guðmundar:
1. Marinó Guðmundsson loftskeytamaður, innkaupastjóri í Reykjavík, tónlistarmaður, f. 28. nóvember 1927 á Hólnum, d. 27. janúar 2006.
2. Björgvin Einars Guðmundsson málari, tónlistarmaður, f. 9. nóvember 1929 á Karlsbergi, síðast í Keflavík, d. 31. ágúst 2005.
3. Andvana drengur, f. 9. nóvember 1930 á Karlsbergi.
4. Ólafur Guðmundsson málarameistari, tónlistarmaður, f. 11. maí 1934 á Hilmisgötu 1.
Fóstursonur þeirra er sonur Marinós og Birnu Einarsdóttur.
5. Jóhann Marinósson hjúkrunarframkvæmdastjóri Sjúkrahúss Suðurlands á Selfossi, f. 23. júlí 1947. Kona hans er Halldóra Jensdóttir.
Björgvin var með foreldrum sínum í æsku og fluttist með þeim til Selfoss 1945.
Hann nam málaraiðn hjá Ólafi bróður sínum og vann við hana í Keflavík. Hann var tónlistarmaður eins og bræður hans og lék í danshljómsveitum.
Þau Arnbjörg giftu sig 1953, eignuðust átta börn. Þau bjuggu í Keflavík.
Arnbjörg lést 1987 og Björgvin 2005.
Úr minningargrein eftir Gísli Brynjólfsson:
Í vetrarlok árið 1944 smalaði Marinó Guðmundsson saman sex unglingum í þeim tilgangi að stofna hljómsveit. Marinó 17 ára, Guðni Hermansen 16, Björgvin bróðir Marinós 15, Guðjón Kristófersson 15, Guðjón Pálsson 15 (þeir voru systkinasynir) og undirritaður 15. Hljómsveitin reyndi að spila jazz-skotna danstónlist og hljóðfæraskipan var þó nokkuð óvenjuleg. Marinó spilaði á trompet og ukolele-banjó, Björgvin á trommur en trommurnar voru gerðar úr skipasaums-kútum með strekktu skinni og skrautlega málaðar af Guðna. Fyrir það var hljómsveitin kölluð „Tunnubandið“. Guðjón Pálsson hafði orgel heima hjá sér og fór að reyna við orgelið, kannski meira af vilja en mætti en mjór er mikils vísir, hann var því píanóleikarinn. Guðni átti harmóniku, heldur litla og lélega. Þá fréttist af Hohner-harmoniku fjögurra kóra með fjórum skiptingum og tveimur í bassa. Verið var að senda nikkuna í pósti til Reykjavíkur en eigandinn afturkallaði hana úr póstinum. Nú vantaði peninga og þá varð það úr að íþróttafélögin Þór og Týr lánuðu okkur fyrir nikkunni. Undirritaður og Guðjón Kristófersson voru með gítara, má því segja að við höfum verið langt á undan Bítlunum með tvo gítara.
Mikið var æft um sumarið og svo var spilað á árshátíðum íþróttafélaganna um haustið. Við spiluðum einnig af og til á dansleikjum í Akógeshúsinu veturinn 1945. Síðan kom hið óumflýjanlega, foreldrar Marinós og Björgvins fluttu búferlum að Selfossi og þar með var draumurinn búinn.
I. Kona Björgvins Einars, (1953), var Arnbjörg Sigurðardóttir húsfreyja, f. 1. september 1934, d. 6. apríl 1987. Foreldrar hennar voru Sigurður Jóhann Guðmundsson sjómaður, bifreiðastjóri í Keflavík, f. 21. júlí 1906, d. 1. maí 1965, og Sigrún Hannesdóttir húsfreyja, ræstingakona, f. 22. september 1911, d. 24. júlí 2001.
Börn þeirra:
1. Jóhann Rúnar Björgvinsson hagfræðingur, f. 1. ágúst 1951. Kona hans er Birna Jónsdóttir.
2. Guðmundur Björgvinsson rafvirki, f. 23. febrúar 1953. Kona hans Ásdís Kristjánsdóttir.
3. Magnús Ingi Björgvinsson sjómaður, f. 30. september 1954. Kona hans Hólmfríður Hjördís Guðjónsdóttir.
4. Eygló Rut Björgvinsdóttir uppeldisfræðingur, f. 6. desember 1955. Maki hennar Jörn Olav Hansen.
5. Sigurður Björgvinsson kaupmaður, f. 22. mars 1959. Kona hans Hildur Þóra Stefánsdóttir.
6. Jóhanna Björgvinsdóttir öryggisvörður, f. 1. maí 1960. Maður hennar Hannes L. Jóhannsson.
7. Björgvin Arnar Björgvinsson rafvirki, f. 12. apríl 1961. Kona hans Katrín M. Eiríksdóttir.
8. Gréta Þóra Björgvinsdóttir verslunarmaður, f. 4. október 1963. Maður hennar Björn Finnbogason.
Heimildir
- Samantekt: Víglundur Þór Þorsteinsson.
- Íslendingabók.is.
- Málarameistarafélag Reykjavíkur 1982.
- Manntöl.
- Morgunblaðið 9. september 2005.Minning.
- Ólafur Guðmundsson.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.