Hannes Hansson
Hannes Hansson fæddist í Vestmannaeyjum 5. nóvember 1891 og lést 18. júní 1974. Hann ólst upp hjá hjónunum Ögmundi Ögmundssyni og konu hans Vigdísi Árnadóttur ásamt dóttur þeirra Þórönnu og öðrum fóstursyni, Þorbirni Arnbjörnssyni. Þau bjuggu í tómthúsinu Landakoti sem stóð nálægt Stakkagerði. Kona Hannesar var Magnúsína Friðriksdóttir frá Gröf.
Hannes byrjaði ungur 14 ára gamall sem beitudrengur hjá Þorsteini í Laufási á Unni Hannes byrjaði að róa á vetrarvertíð 1910 á Gnoð, með Sigurði Ingimundarsyni. Var formaður; með Friðþjóf Nansen 1912, hætti formennsku eftir vertíðina og var vélstjóri hjá Gísla Magnússyni í Skálholti, til ársins 1919. Varð þá formaður með; Gideon 1920, Ara 1921-1923, Tjald 1924-1925, Freyju 1926-1927, Freyju (2) 1928-1930, Vin 1931-1937 og Haföldu 1938-1939. Hannes átti hlut í báðum Freyjunum, en Vin og Haföldu átti hann einn.
Hannes hætti sjómennsku árið 1940 og gerðist afgreiðslumaður á Básaskersbryggju hjá Olíusamlagi Vestmannaeyja á olíu til flotans. Hann var einn af stofnendum Skipstjóra- og stýrimannafélagsins Verðandi og var hann kjörinn heiðursfélagi þess árið 1963.
Heimildir
- Viðbót við heimildir Gísli Eyjólfsson frá Bessastöðum.