Guðrún Þorláksdóttir (Presthúsum)

Guðrún Þorláksdóttir (Guðrún Guðlaugardóttir og Guðrún Laugudóttir) frá Kornhól fæddist 2. júlí 1789 og lést 11. ágúst 1846.
Móðir hennar var Guðlaug (eftirnafns hennar var ekki getið við skírn Guðrúnar). Faðir var lýstur Þorlákur Jónsson kvæntur bóndi á Oddsstöðum, en hann neitaði.
Guðrún var nefnd Guðlaugardóttir við giftingu og Laugudóttir við eina af barneignum sínum.

Guðrún var vinnukona á Gjábakka 1813, síðar á Miðhúsum.
Hún var til heimilis í Kornhól við giftingu, var húsfreyja í Presthúsum til dd.
Hún lést 1846 úr „mislingum og brjóstveiki“.

I. Barnsfaðir Guðrúnar var Peterson skipsmaður.
Barnið þeirra var
1. Margrét Guðrúnardóttir, f. 13. apríl 1813, d. 25. apríl úr „Barnaveikleika“.

II. Barnsfaðir hennar var Árni Ólafsson „giftur maður.“
Barnið var
2. Guðmundur Árnason, f. 26. apríl 1816. Mun hafa dáið ungur.

III. Barnsfaðir Guðrúnar var Guðni Jónsson frá Garðsvika í Hvolhreppi. Barnið var
3. Hjálmar Guðnason, (Hjálmar Guðrúnarson), f. 4. desember 1817, d. 13. desember 1817 „af Vestmannaeyja Barnaveikin“, þ.e. ginklofi.

IV. Barnsfaðir var Magnús Jónsson á Löndum.
Barnið þeirra var
4. Anna Magnúsdóttir, f. líkl. í mars 1826 í Kornhól, d. 28. apríl úr ginklofa, 28 daga gömul. Móðurinnar 5. brot.

V. Barnsfaðir hennar var Þorsteinn Vernharðsson vinnumaður á Gjábakka, f. 1795. Barn þeirra var
5. Arnfríður Þorsteinsdóttir, f. 18. júlí 1822, d. 26. júlí 1822 úr barnaveiki.

VI. Maður hennar, (28. desember 1828), var Gísli Jónsson, þá 25 ára vinnumaður í Kornhól. (f. 1803), síðar bóndi og hreppstjóri í Presthúsum.
Húsvitjun 1832: Gata: Gísli Jónsson 25 ára. Kona hans Guðrún Guðlaugardóttir 39 ára, f. í Kornhól.
Þau voru hjón í Kornhól 1829.
Barn þeirra:
6. Andvana fætt stúlkubarn 13. mars 1829 í Kornhól.

---

Heimildir

• Samantekt: Víglundur Þór Þorsteinsson.
• Manntöl.
• Prestþjónustubækur.