Guðbjörn Guðjónsson (Reykjum)

Guðbjörn Guðjónsson.

Guðbjörn Guðjónsson frá Reykjum, vélvirkjameistari fæddist 14. apríl 1925 að Ásbyrgi og lést 24. apríl 2012 í Hjúkrunarheimilinu Sóltúni í Reykjavík.
Foreldrar hans voru Guðjón Jónsson skipstjóri, verkamaður, slátrari, f. 10. febrúar 1892 á Selalæk á Rangárvöllum, d. 14. maí 1967, og kona hans Bergþóra Jónsdóttir húsfreyja, f. 10. október 1894 í Bakkakoti u. Eyjafjöllum, d. 20. desember 1989.

Börn Bergþóru og Guðjóns:
1. Jón Óskar Guðjónsson, f. 26. júní 1917 í Steinum u. Eyjafjöllum, d. 25. apríl 1940 ú berklum.
2. Guðmundur Guðjónsson rekstrarstjóri í Kópavogi, f. 9. febrúar 1920, d. 5. ágúst 2008. Kona hans Ása Gissurardóttir.
3. Þórhallur Ármann Guðjónsson, f. 8. febrúar 1921 á Eystri-Gjábakka, d. 14. maí 1921.
4. Jóhanna Guðjónsdóttir húsfreyja, sjúkraliði, f. 5. júní 1922 í Ásbyrgi, d. 26. júní 2017.
5. Guðbjörn Guðjónsson vélvirkjameistari, verksmiðjustjóri, f. 14. apríl 1924 í Ásbyrgi, d. 24. apríl 2012.
6. Þorleifur Guðjónsson vélstjóri, skipstjóri, útgerðarmaður, f. 23. júní 1926 á Reykjum, d. 24. nóvember 1974.
7. Magnús Guðjónsson bifreiðastjóri, f. 24. janúar 1929 á Reykjum.
8. Þórhallur Ármann Guðjónsson verkstjóri, f. 27. október 1931 á Reykjum.
9. Lilja Guðjónsdóttir, f. 10. apríl 1933 á Reykjum, d. 3. janúar 1941.
10. Haukur Guðjónsson bifreiðastjóri, f. 13. mars 1938 á Reykjum.

Guðbjörn var með foreldrum sínum í æsku.
Hann lauk vélstjóraprófi í Mótorvélskóla Fiskifélags Íslands er haldinn var í Vestmannaeyjum. Hann fór síðan í nám í Vélsmiðjunni Héðni hf. árið 1943 í Reykjavík, samhliða námi í Iðnskólanum í Reykjavík. Hann fékk sveinsbréf í vélvirkjun 1949 og meistarabréf 1953.
Hann var sjómaður í Eyjum á vertíð 1941, vann hjá Héðni í Reykjavík víðsvegar um land við uppsetningu á frystihúsum og fiskimjölsverksmiðjum. Þá varð hann verksmiðjustjóri í Fiskimjölsverksmiðju Eskifjarðar 1962-1970, en lauk starfsferli sínum hjá sjávarafurðadeild Sambands Íslenskra samvinnufélaga, var starfsmaður í umbúða- og veiðarfæradeildinni og annaðist sölu og þjónustu á ýmsum vélum, tækjum og fleiri rekstrarvörum, sem deildin útvegaði og seldi til framleiðenda innan vébanda sinna.
Þau Katrín giftu sig 1948, eignuðust eitt barn. Þau bjuggu í Reykjavík á Sogavegi 220, en síðar í Haukanes 5 í Garðabæ.
Katrín lést 2009 og Guðbjörn 2012.

I. Kona Guðbjörns, (8. júní 1948), var Katrín Sesselja Valtýsdóttir frá Vallholti og Selárbakka á Árskógsströnd í Eyjafirði, f. 8. júni 1923 í Vallholti og lést 16. október 2009 á Landspítalanum í Fossvogi. Foreldrar hennar voru Valtýr Jónsson bóndi frá Hrafnagili í Þorvaldsdal í Eyjafirði, f. 28. september 1896, d. 29. október 1976, og kona hans Rakel Jóhanna Jóhannsdóttir frá Selárbakka, húsfreyja, f. 28. ágúst 1891, d. 17. nóvember 1958.
Barn þeirra:
1. Bergþóra Guðbjörnsdóttir húsfreyja, f. 20. september 1947. Hún hefur búið í Bandaríkjunum frá 1968. Maður hennar Karl Ásmundsson.

---

Heimildir

• Samantekt: Víglundur Þór Þorsteinsson.
• Íslendingabók.is.
• Manntöl.
• Morgunblaðið 4. maí 2012 og 2. nóvember 2009. Minning Guðbjörns og Katrínar.
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---