Katrín Unadóttir

Katrín Unadóttir og Pálína dóttir hennar.

Katrín Unadóttir frá Hólakoti u. Eyjafjöllum, húsfreyja, verkakona fæddist 13. september 1878 og lést 8. ágúst 1950.
Foreldrar hennar voru Uni Runólfsson frá Skagnesi í Mýrdal, bóndi, síðar í dvöl á Sandfelli, f. 25. mars 1833 á Skagnesi, d. 5. nóvember 1913 og kona hans Elín Skúladóttir frá Skeiðflöt í Mýrdal, húsfreyja, f. þar 28. mars 1836, d. 8. júní 1879.

Börn Elínar og Una í Eyjum:
1. Ingveldur Unadóttir húsfreyja á Sandfelli, f. 10. ágúst 1869, d. 29. desember 1940.
2. Sigurður Unason vinnumaður á Sveinsstöðum 1901, sjómaður, f. 8. janúar 1876, fórst með skipinu Oak 1903.
3. Katrín Unadóttir sjókona, húsfreyja, verkakona, f. 13. september 1878, d. 8. ágúst 1950.

Katrín var á fyrsta ári, þegar móðir hennar lést. Hún var með föður sínum og nokkrum systkinum á Eyvindarhólum u. Eyjafjöllum 1880, með honum í Syðra-Hólakoti þar 1890, hjú hjá Ingveldi systur sinni í Steinum 1901. Hún stundaði sjóróðra við Fjallasand.
Katrín fluttist til Eyja vinnukona frá Steinum 1903, sama ár og Ingveldur og Guðjón maður hennar fluttu þangað.
Hún var vinnukona á Sandfelli 1906 til 1908, í Bræðraborg 1909, lausakona þar 1912 og 1913, vinnukona á Sandfelli 1914, vinnukona í Bræðraborg 1915.
Katrín var með Páli Einarssyni á Hrafnagili 1916, ,,hans stúlka“, sama á Löndum 1917.
Páll Einarsson fórst 3. mars 1918 með v.b. Adólfi, líklega á Rófuboða í austan stórviðri og byl.
Katrín var ekkja á Löndum við húsvitjun 1918, eignaðist Pálínu á því ári, var 41 árs ekkja á Löndum með Pálínu dóttur sína 1919.
Hún var verkakona, ekkja á Löndum 1920, á Búlandi 1922, Grímsstöðum 1923 og enn 1925, og stund á Laugalandi.
Katrín réðst í húsbyggingu með Magnúsi Magnússyni netagerðarmeistara. Þau byggðu húsið við Vestmannabraut 76 og þar bjuggu mæðgurnar frá 1927 og enn 1940 og með Haraldi manni Pálínu 1945 og 1949.
Katrín lést 1950.
Sjá Blik 1976, — Atorku- og gæðakonu minnzt í tilefni kvennaársins 1975.

I. Sambýlismaður Katrínar var Páll Einarsson frá Nýjabæ u. Eyjafjöllum, sjómaður, f. 22. júlí 1888, d. 3. mars 1918. Foreldrar hans voru Einar Sveinsson bóndi, f. 31. janúar 1857, d. 2. október 1928, og kona hans Kristín Pálsdóttir húsfreyja, f. 4. október 1861, d. 14. júní 1919.
Barn þeirra:
1. Pálína Kristjana Guðleif Pálsdóttir húsfreyja, síðast í Keflavík, f. 4. september 1918, d. 7. janúar 1972. Maður hennar var Haraldur Guðjónsson frá Skaftafelli.

---

Heimildir

• Samantekt: Víglundur Þór Þorsteinsson.
• Blik 1976.
• Íslendingabók.is.
• Manntöl.
• Prestþjónustubækur.
• Sjómannadagsblað Vestmannaeyja 1976.
• Vestur-Skaftfellingar 1703-1966. Björn Magnússon. Leiftur 1970-1973.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---