Sigríður Sæmundsdóttir (Gjábakka)
Sigríður Sæmundsdóttir húsfreyja á Gjábakka fæddist 1796 á Sámsstöðum í Fljótshlíð og lést 8. nóvember 1878.
Foreldrar hennar voru Sæmundur bóndi á Vestustu Sámsstöðum 1801, f. 1752, Jónsson og kona hans Jódís húsfreyja, f. 1755 í Finnshúsum í Fljótshlíð, d. 18. ágúst 1821 á Götum í Mýrdal, Jónsdóttir.
Sigríður var systir Margrétar Sæmundsdóttur bústýru á Gjábakka.
Sigríður var hjá foreldrum sínum á Sámsstöðum 1801. Hún var vinnukona á Torfastöðum í Fljótshlíð 1816. Þá var Jón Einarsson vinnumaður á einum bænum þar.
Sigríður var komin að Gjábakka í Eyjum 1831 og giftist Jóni síðla á því ári.
Þau Sigríður bjuggu á Gjábakka meðan Jóni entist líf, til 1861.
Á Gjábakka var einnig bóndi Jón Einarsson eldri hálfbróðir Jóns yngri með konu sinni Margréti Vigfúsdóttur. Þau létust 1836 og 1838.
Þau Sigríður tóku að sér Margréti bróðurdóttur Jóns, er foreldrarnir létust. Einnig var þar um skeið Margrét Sæmundsdóttir systir Sigríðar húsfreyju, ógift.
Af 7 börnum, sem þau eignuðust 1832-1842, dóu 5 á fyrstu dögum lífsins úr ginklofa og eitt fæddist andvana. Eina barnið, sem lifði var Margrét, sem varð kona Ingimundar á Gjábakka og eru þau ættforeldrar mikils fjölda Eyjafólks.
1845 var Sigríður húsfreyja á Gjábakka með Jóni Einarssyni sjómanni og Margrétunum, dóttur þeirra 11 ára og bróðurdóttur Jóns 20 ára vinnukonu.
1850 voru þau þar með sama liði, en faðir Jóns, Einar Ormsson var hjá þeim, ekkill 89 ára.
1860 var hjá þeim Guðmundur Erlendsson 22 ára vinnumaður. Margrét dóttir þeirra var þar húskona með Ingimund húsmann og börnin Jón, Þórönnu og Stefán.
1870 var Sigríður ekkja og húskona á Gjábakka.
Hún lést 1878.
Maður Sigríðar, (18. nóvember 1831), var Jón Einarsson yngri, f. 1792, var á lífi 1860, oftast nefndur Jón Abel í skýrslum prestsins.
Börn Sigríðar og Jóns hér:
1. Guðrún Jónsdóttir, f. 7. ágúst 1832, d. 14. ágúst 1832 úr ginklofa.
2. Ragnhildur Jónsdóttir, f. 12. ágúst 1833, d. 20. ágúst 1833 úr ginklofa.
3. Ásdís Jónsdóttir tvíburi, f. 20. maí 1834, d. 26. maí 1834 „...af barnaveikindum“.
4. Þuríður Jónsdóttir tvíburi, f. 20. maí 1834, d. 26. maí 1834 „... af barnaveikindum“.
5. Margrét Jónsdóttir húsfreyja á Gjábakka, f. 26. maí 1835, d. 6. febrúar 1916. Maður hennar var Ingimundur Jónsson bóndi, formaður og hreppstjóri.
6. Andvana sveinbarn, f. 14. október 1839.
7. Kristín Jónsdóttir, f. 13 júní 1842, d. 21. júní 1842 úr ginklofa.
Heimildir
- Samantekt: Víglundur Þór Þorsteinsson.
- Íslendingabók.is.
- Manntöl.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.