Guðríður Ólafsdóttir (Jónshúsi)
Guðríður Ólafsdóttir húsfreyja fæddist 4. október 1860 á Ketilsstöðum í Mýrdal og lést 1. nóvember 1943 í Gvendarhúsi.
Foreldrar hennar voru Ólafur Ólafsson bóndi, f. 28. desember 1828 í Holti í Álftaveri, og fyrri kona hans Helga Þorsteinsdóttir húsfreyja, f. 7. nóvember 1831 á Norður-Hvoli í Mýrdal, d. 2. febrúar 1869 á Ketilsstöðum.
Guðríður var með foreldrum sínum á Ketilsstöðum í Mýrdal til 1870, var tökubarn á Skeiðflöt þar 1870-1878, vinnukona á Brekkum þar 1877-1879, í Neðri-Dal þar 1879-1886.
Hún fluttist úr Mýrdal að Jónshúsi 1886, var þar við fæðingu Þórunnar 1889, en hún var send í fóstur að London. Guðríður eignaðist Ólaf í Jónshúsi 1890, var vinnukona hjá Jóni Vigfússyni ekkli í Túni í lok ársins með Ólaf hjá sér, en Þórunn var í fóstri í Landakoti, og Sigurður faðir þeirra var vinnumaður í Jónshúsi. Á árinu 1891 var Sigurður vinnumaður hjá Ólöfu Lárusdóttur og Guðjóni Björnssyni á Kirkjubæ, en Guðríður var með Ólaf í Túni.
Þau Sigurður voru vinnufólk á Kirkjubæ 1892 með Ólaf með sér, en Þórunn var enn fósturbarn í London.
Þau fluttust frá Kirkjubæ með Ólaf 1895 og stefndu á Reyðarfjörð. Þau voru bændahjón í Sigurðarhúsi á Eskifirði 1901, í Kristjánshúsi þar 1910. Þau misstu Ólaf í maí á því ári, voru í ,,Húsi Sigurðar og Árna“ þar 1920.
Hjónin fluttust til Eyja 1929, bjuggu í Vallartúni 1930, í Sigtúni 1940.
Sigurður lést 1941. Guðríður var að síðustu í Gvendarhúsi og lést þar 1943.
Maður Guðríðar, (1898), var Sigurður Sigurðsson bóndi, verkamaður, f. 26. febrúar 1860 í Fljótshlíð, d. 6. apríl 1941.
Börn þeirra voru:
1. Þórunn Sigurðardóttir húsfreyja, f. 14. janúar 1889, d. 22. nóvember 1948.
2. Ólafur Sigurðsson, f. 12. júlí 1890, d. 1910.
Heimildir
- Samantekt: Víglundur Þór Þorsteinsson.
- Íslendingabók.is.
- Manntöl.
- Prestþjónustubækur.
- Vestur-Skaftfellingar 1703-1966. Björn Magnússon. Leiftur 1970-1973.
Þessi grein tilheyrir Æviskrám Eyjafólks eftir Víglund Þór Þorsteinsson.