Björg Sigurjónsdóttir (Víðidal)

From Heimaslóð
Jump to navigation Jump to search
Björg Sigurjónsdóttir.

Björg Sigurjónsdóttir frá Víðidal, póstfulltrúi, skrifstofustjóri fæddist 19. janúar 1917 á Hrafnagili við Vestmannabraut 29 og lést 2. mars 2004 á Landspítalanum.
Foreldrar hennar voru Sigurjón Jónsson sjómaður, útgerðarmaður, f. 3. júlí 1887 að Vesturholtum u. Eyjafjöllum, d. 20. júní 1933, og kona hans Guðríður Sigurbjörg Þóroddsdóttir húsfreyja, f. 17. júní 1886 í Dalseli u. V. -Eyjafjöllum, d. 16. ágúst 1956.

Börn Guðríðar og Sigurjóns:
1. Sigríður Anna Sigurjónsdóttir, f. 15. ágúst 1915, d. 5. október 1989.
2. Björg Sigurjónsdóttir, f. 19. janúar 1917, d. 2. mars 2004.
3. Guðbjörg Sigríður Sigurjónsdóttir, f. 29. desember 1921, d. 1. maí 2012.
4. Þóra Sigurjónsdóttir, f. 17. júní 1924 í Víðidal, d. 1. maí 2012.
5. Soffías Sigurjónsson, f. 8. maí 1926 í Víðidal, d. 5. ágúst 1931 af slysförum.

Björg var með foreldrum sínum í æsku, en faðir hennar lést, er hún var á sautjánda árinu. Hún var með móður sinni í Víðidal.
Björg var í sveit á sumrin og bjó í Eyvindarholti u. Eyjafjöllum hjá Oddgeiri ömmubróður sínum og konu hans Þórunni frá 8-10 ára aldurs.
Hún lauk prófi í 2. bekk í Gagnfræðaskólanum 1933, en þá voru þar aðeins 1. og 2. bekkur. Síðan nam hún í Húsmæðraskóla Suðurlands að Laugarvatni.
Hún vann í brauðsöluverslun Jóns Waagfjörðs á neðstu hæð í Skuld, síðan vann hún í Drífanda í 7 ár. Á þeim árum var hún í kaupavinnu eitt sumar á Skáney í Reykholtsdal.
Eftir skóladvölina á Laugarvatni var hún ráðskona að Ásatúni Hrunamannahreppi eitt sumar. Veturinn 1943-1944 var hún vistráðin í Reykjavík. Þá vann hún í Vinnufatagerð Íslands í 13 ár. Í tvö summur á þeim árum var hún við síldarvinnslu á Siglufirði.
Hún flutti til Eyja 1957 eftir lát Halldórs Ágústssonar manns Guðbjargar systur sinnar, bjó hjá henni og hjálpaði til við að gæta barna hennar, bjó á Faxastíg 6A við Gosið 1973.
Björg vann á skrifstofu Ólíufélags Íslands, síðan hjá Pósti & síma til Goss 1973, var síðar á árinu póstfulltrúi í Eyjum til 1979, er hún flutti til Reykjavíkur og síðustu starfsár sín var hún skrifstofustjóri hjá Póst- og símamálastofnuninni í Ármúla.
Hún var ógift og barnlaus.
Björg lést 2004.


Heimildir

  • Samantekt: Víglundur Þór Þorsteinsson.
  • Íslendingabók.
  • Morgunblaðið 9. mars 2004. Minning.
  • Æviágrip Bjargar í höndum Ingibergs systursonar hennar.


Þessi grein tilheyrir Æviskrám Eyjafólks eftir Víglund Þór Þorsteinsson.