Auðunn Jónsson (Húsavík)
Auðunn Jónsson í Húsavík, útvegsmaður, sjómaður, trésmiður fæddist 20. mars 1865 í V-Landeyjum og lést 30. mars 1935.
Foreldrar hans voru Jón Jónsson bóndi á Strönd í V-Landeyjum, f. 4. mars 1819, d. 13. júní 1872, og kona hans Þuríður Jónsdóttir húsfreyja, f. 27. mars 1821, d. 23. nóvember 1898.
Auðunn var með foreldrum sínum á Strönd 1870 og með ekkjunni móður sinni þar 1880.
Hann bjó í Eyvakoti í Stokkseyrarsókn 1890 með bústýrunni Guðrúnu Gísladóttur. Þau voru húsfólk á Vegamótum þar 1891 og enn 1896.
Hann var kvæntur vinnumaður á Skeggjastöðum í V-Landeyjum 1901, en Guðrún var þá skráð skilin vinnukona á Glæsistöðum þar.
Þau komu frá Árbæ í Holtum að Hólminum í Landeyjum 1904 og bjuggu í Skipgerði þar 1906 við fæðingu Guðlaugar.
Þau Guðrún fluttust til Eyja 1907, bæði frá Skipagerði í V-Landeyjum og þeim fylgdi Guðlaug dóttir þeirra, en Jón skósmíðalærlingur fluttist til þeirra frá Hallgeirsey í A-Landeyjum og Þuríður systir hans fluttust til þeirra frá Arnarhóli í V-Landeyjum 1910. Alls höfðu þau eignast 7 börn og misst eitt fyrir manntal 1910.
Fjölskyldan bjó á Breiðabliki 1910 og Auðunn var útvegsmaður og háseti á vélbát. Hjónin voru í Húsavík 1911 með börnin Guðmund og Guðlaugu, 1912 með þau og Þuríði, 1913-1915 með Guðmund og Guðlaugu, 1916 var Jóhanna Viktoría komin á heimilið með barnið Hermann Karl nýfæddan.
Þau voru í Húsavík 1927 með Guðlaugu dóttur sinni, Jóni Auðunssyni, konu hans og börnum, en komin að Grettisgötu 52 í Reykjavík 1930.
Guðrún lést í byrjun árs 1930 og Auðunn bjó á Grettisgötu 52, vann við smíðar.
Hann lést 1935.
Kona Auðuns, (6. júní 1891), var Guðrún Gísladóttir húsfreyja, f. 7. nóvember 1865, d. 9. janúar 1930.
Börn þeirra:
1. Jón Auðunsson skósmiður í Eyjum, f. 12. ágúst 1891 á Vegamótum, d. 15. mars 1975.
2. Þuríður Auðunsdóttir húsfreyja í Reykjavík, f. 29. september 1892 á Vegamótum, d. 22. apríl 1934.
3. Guðmundur Auðunsson vélstjóri í Eyjum, síðar kaupmaður í Reykjavík, f. 31. júlí 1896 á Vegamótum, d. 18. maí 1966.
4. Ásgeir Auðunsson, fósturbarn í Vetleifsholti á Rangárvöllum 1910, f. 24. janúar 1898 í Gerðum, V -Landeyjum, d. 30. júlí 1967. Kona hans Jónína Gróa Jónsdóttir.
5. Guðlaug Auðunsdóttir húsfreyja í Reykjavík, f. 14. september 1906 í Skipagerði í V-Landeyjum, d. 14. desember 1985.
Heimildir
- Samantekt: Víglundur Þór Þorsteinsson.
- Íslendingabók.is.
- Magnús Haraldsson.
- Manntöl.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.