Sigurður Þórðarson (Búastöðum)

From Heimaslóð
Jump to: navigation, search
Lilja Guðjónsdóttir og Sigurður Þórðarson.

Sigurður Sófus Þórðarson útgerðarmaður og fiskverkandi fæddist 10. mars 1918 á Kolmúla í Fáskrúðsfirði og lést 9. september 1991.
Foreldrar hans voru Þórður Vilhjálmsson sjómaður í Baldurshaga í Fáskrúðsfirði, f. 16. mars 1882, d. 1. september 1944, og kona hans Þorbjörg Þórarinsdóttir, f. 17. október 1892, d. 1. apríl 1921.
Fósturforeldrar Sigurðar voru Jón Samúel Stefánsson á Gili í Fáskrúðsfirði, f. 10. júní 1888, og kona hans Valgerður Eiríksdóttir húsfreyja, f. 30. september 1870, d. 7. júní 1963 í Eyjum.

Sigurður var tveggja ára fósturbarn á Gili í Fáskrúðsfirði 1920 hjá Samúel og Valgerði. Hann var á vertíðum í Eyjum á fjórða áratug tuttugustu aldar, en 1941 fluttist hann þangað nýkvæntur með fjölskylduna.
Þau bjuggu í fyrstu í Steinholti, en síðan um langt skeið á Búastöðum. Þau Lilja byggðu hús að Hólagötu 42 um 1960. Þar bjuggu þau, uns þau fluttust í Mosfellsbæ 1980. Bjuggu þau þar í húsi sínu að Bjarkarholti 3.

Sigurður aflaði sér vélstjóra og skipstjórnarréttinda í Eyjum, var skipstjóri og véstjóri á ýmsum bátum í Eyjum.
Útgerð hóf hann 1951 með öðrum og eignaðist bátinn Sæfara VE-104. Þá lét hann smíða Eyjabergið VE-130 1959 og gekk útgerð hans vel. Báturinn strandaði við Faxasker 1966, en mannbjörg varð.
Þá hóf Sigurður byggingu frystihúss, sem bar nafnið Eyjaberg. Einnig eignaðist hann bátinn Ölduljón VE-130 nokkru síðar. Þann rekstur stundaði hann til ársins 1980, er hann seldi fyrirtækið.
Sigurður tók þátt í ýmsu félagsstarfi útgerðarmanna og fiskverkenda. Hann átti sæti í stjórn Samtaka fiskvinnslustöðva um skeið og tók virkan þátt í starfi Sölumiðstöðvar Hraðfrystihúsanna sem framleiðandi. Þá átti hann sæti í stjórn Vinnslustöðvarinnar og Stakks h.f. í Eyjum. Sigurður lést af slysförum 1991.
„Hann verður samferðamönnum sínum minnisstæður vegna óbilandi elju og áhuga á viðgangi sjávarútvegs. Hann vildi öllum vel sem áttu við hann viðskipti og naut trausts þeirra sem störfuðu fyrir hann.“ (S.E. í Mbl. 1991).
Kona Sigurðar, (21. desember 1941), var Lilja Guðjónsdóttir húsfreyja, f. 11. apríl 1921, d. 17. október 2001.
Börn þeirra eru:
1. Bryndís Sigurðardóttir húsfreyja, f. 22. janúar 1941. Maður hennar er Kristinn Karlsson bifvélavirki, stöðvarstjóri.
2. Ásdís Sigurðardóttir húsfreyja, f. 27. október 1943. Maður hennar er Valgeir Sveinbjörnsson málari.
3. Svanhildur Sigurðardóttir húsfreyja, myndhöggvari, f. 16. febrúar 1945. Maður hennar er Haraldur Erlendsson læknir.
4. Vilhjálmur Sigurður Sigurðsson vélfræðingur, f. 3. október 1953. Kona hans er Guðrún Hrefna Sverrisdóttir húsfreyja, viðskiptafræðingur.
5. Lilja Huld Sigurðardóttir húsfreyja, f. 19. febrúar 1957. Hún býr með Hreini Birgissyni verkamanni.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.