Minningarvefur um Pál Steingrímsson/Um Pál Steingrímsson

From Heimaslóð
Jump to: navigation, search
PállStein2.png

Um Pál Steingrímsson

Páll sem barn

Páll Steingrímsson fæddist þann 25. júlí árið 1930 í Vestmannaeyjum. Foreldrar Páls voru þau Steingrímur Benediktsson og Hallfríður Ingibjörg Kristjánsdóttir. Páll var einn sex bræðra, þeirra Benedikts, Jón Helga, Gísla, Svavars og Braga en einnig áttu þeir bræður systurina Björgu en hún lést í bernsku. Fyrri kona Páls var Edda Guðrún Sveinsdóttir og áttu þau saman Gunnhildi, Steingrím Dufþak og Ólöfu Sylvíu. Seinna giftist Páll listakonunni Þuríði Fannberg, betur þekkt sem Rúrí (Ólafur J. Engilbertsson, 2009).

Páll starfaði sem kennari um árabil (Ólafur J. Engilbertsson, 2009) og var hann elskaður og dáður af nemendum sínum sem enn minnast hans með þakklæti og virðingu (Áfangar.com, 2018). Öll listsköpun var honum hugleikin og átti hann meðal annars stóran þátt í stofnun Myndlistaskóla Vestmannaeyja. Þekktastur er hann þó fyrir framlag sitt til kvikmyndagerðar en þær heimilda- og náttúrulífsmyndir sem Páll ýmist tók upp, stjórnaði eða framleiddi eru tæplega sextíu talsins og hafa margar þeirra hlotið viðurkenningar víðsvegar um heim (Ólafur J. Engilbertsson, 2009).