Magnús Jónsson (steinhleðslumeistari)

Úr Heimaslóð, Sögusetri Vestmannaeyja
Stökkva á: flakk, leita

Magnús Jónsson steinhleðslumeistari í Bjarnleifshúsi fæddist 17. maí 1875 u. Eyjafjöllum og lést 25. október 1958.
Foreldrar hans voru Jón Valdason bóndi í Steinum u. Eyjafjöllum, f. 1851, d. 15. janúar 1907, og kona hans Þuríður Jónsdóttir húsfreyja, f. 26. mars 1849, d. 1. júní 1911.

Börn Jóns Valdasonar og Þuríðar Jónsdóttur í Eyjum voru:
1. Guðjón Jónsson formaður á Sandfelli, f. 21. mars 1873, d. 1. júlí 1941.
2. Valdi Jónsson sjómaður í Sandgerði, f. 21. júní 1874, d. 21. ágúst 1947.
3. Magnús Jónsson steinhleðslumeistari, f. 1875, d. 1958.
4. Árni Jónsson sjómaður, húsmaður í Stíghúsi, f. 16. maí 1878, fórst með Sjólyst við Bjarnarey 20. maí 1901.

Magnús var með foreldrum sínum í Steinum í bernsku, var léttadrengur í Vesturholti þar 1890, vinnumaður í Steinum 1901.
Þau Guðríður voru ógift hjú í Steinum 1901, höfðu eignast Ragnhildi 1900, en hún var tökubarn hjá Ragnhildi móðurmóður sinni í Hrútafellskoti ytra 1901. Árni fæddist 1902. Þau Guðríður giftu sig 1906 og voru bændur á Minni-Borg u. Eyjafjöllum 1910 með börnin hjá sér.
Þau fluttust að Dvergasteini 1911 með börnin og þeim fylgdu Ragnhildur móðir Guðríðar og Margrét systir Guðríðar. Þau bjuggu í Dvergasteini til 1915, voru leigjendur í Heklu 1916, á Háeyri 1917 og enn 1922 og þá fylgdu þeim börnin og Helgi Kristinn maður Ragnhildar. Þau bjuggu í Nikhól 1924 ásamt Ragnhildi móður Guðríðar, Ragnhildi dóttur þeirra, Helga Kristni Halldórssyni, barni þeirra og Alexander syni hennar.
Þau voru á Bergstöðum 1927, á Miðhúsum 1930, Kirkjuvegi 41 (Langa-Hvammi) 1940 og 1945, Bjarnleifshúsi 1949 og síðan, en þegar Bjarnleifshús var fjarlægt fékk Magnús búsetu á Flötum.
Magnús vann verkamannavinnu í Eyjum vann við múrverk, var snilldar steinhleðslumaður og mátti víða líta handarverk hans í vörðum, vegköntum og víðar. Hann sá einnig um dýnamítsprengingar hjá bænum. Var hann af þessum sökum uppnefndur Grjót-Mangi. Það var einnig aukavinna hans að fást við klukkuviðgerðir.
Guðríður lést 1950 og Magnús 1958.

I. Kona Magnúsar, (1906), var Guðríður Jónsdóttir húsfreyja, f. 10. ágúst 1876, d. 6. febrúar 1950.
Börn þeirra:
1. Ragnhildur Magnúsdóttir húsfreyja í Ólafsfirði, f. 19. febrúar 1900, d. 14. janúar 1939.
2. Árni Magnússon bóndi á Kröggólfsstöðu í Ölfusi, síðast í Þorlákshöfn, f. 26. febrúar 1902, d. 1. október 1961.

II. Barnsmóðir Magnúsar var Margrét Jónsdóttir mágkona hans, f. 21. ágúst 1874, d. 3. ágúst 1941.
Barn þeirra var
3. Jóna Gíslína Magnúsdóttir húsfreyja í Hólmgarði, f. 6. júní 1915, d. 19. nóvember 1995.

Fósturdóttir þeirra, dótturdóttir þeirra, var
4. Guðbjörg María Helgadóttir, f. 6. desember 1923. Dóttir Guðbjargar Maríu, sem ólst upp í Bjarnleifshúsi og á Flötunum var
5. Ragna María Pálmadóttir f. 27. mars 1941.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.