Edvin Jóelsson

Edvin Jóelsson fæddist 2. júní 1922 og lést 25. mars 1971. Hann bjó á Urðavegi 17 og Hásteinsvegi 6, Kiðjabergi. Foreldrar hans voru Jóel Eyjólfsson og Oktavía Einarsdóttir.

Edvin tók mótorvélstjórapróf 1941 og skipstjóranámskeið 1943 í Vestmannaeyjum. Fiskimannapróf tók hann frá Sjómannaskólanum í Reykjavík 1948. Hann var vélstjóri á Kára VE-27 og vélstjóri og stýrimaður á Kára VE 47. Skipstjóri á Álsey 1949-50, Emmu 1951, Helga Helgasyni 1952, var með Skaftfelling 1955-1957 í flutningum og síðast með Lagarfoss 1964. Vann síðast við fiskmat.

Óskar Kárason samdi formannavísu um Edvin:

Jóels sonur Áls- með ey

Edvins gegnir heiti,

dregur í hið forna fley

fisk úr djúpa reiti.

Óskar samdi seinna aðra vísu um hann:

Þriðja skal njóta niðja

nefna son Jóels, gefna.

Edvin sá heitir svinnur,

seggur, er Skafta leggur,

hríð út í storma stríða,

straumur þó æstur kraumi.