Halldór Kolbeins
![](/images/thumb/8/89/Halld%C3%B3r_Kolbeins_og_fr%C3%BA.jpg/200px-Halld%C3%B3r_Kolbeins_og_fr%C3%BA.jpg)
Halldór Kolbeins var prestur Vestmannaeyinga frá 1945 til 1961. Hann var fæddur að Staðarbakka í Miðfirði 16. febrúar 1893 og lést 29. nóvember 1964. Foreldrar hans voru séra Eyjólfur Kolbeins Eyjólfsson á Staðarbakka og kona hans Þórey Bjarnadóttir. Eiginkona Halldórs var Lára Ágústa Ólafsdóttir. Þau áttu saman sex börn, auk þess að ala upp tvö fósturbörn.
Halldór varð stúdent í Reykjavík árið 1915 og lauk síðan cand. theol. prófi frá Háskóla Íslands árið 1920. Hann lauk einnig kennaraprófi sama ár. Halldór var mikill tungumálamaður og var víðlesinn.
![](/images/thumb/3/3a/Halld%C3%B3rKolbeins_og_fj%C3%B6lskylda.jpg/200px-Halld%C3%B3rKolbeins_og_fj%C3%B6lskylda.jpg)
Halldór fékk veitingu fyrir Flatey 1921, Stað í Súgandafirði 1925 og síðar Mælifelli árið 1941. Hann var settur til prestþjónustu í Vestmannaeyjum frá 1938 til 1939. Halldór fékk veitingu fyrir Vestmannaeyjaprestakalli árið 1945 og gegndi því til ársins 1961. Hann sat að Ofanleiti alla sína prestskapartíð í Eyjum og var næst síðasti presturinn sem þar bjó en Þorsteinn Lúther Jónsson bjó þar á í einn vetur. Eftir það var húsið leigt ýmsum, allt þar til það var rifið, árið 1977. Halldór stundaði einnig kennslu, bæði í Barnaskólanum og Gagnfræðaskólanum.
Heimildir
- Guðlaugur Gíslason: Eyjar gegnum aldirnar. Frásagnir af mannlífi og atburðum í Vestmannaeyjum frá gamalli tíð og nýrri. Reykjavík, 1982.